പ്ലസ് വണ്‍ വിദ്യാര്‍ത്ഥിക്ക് സീനിയര്‍ വിദ്യാര്‍ത്ഥികളുടെ ക്രൂര മര്‍ദ്ദനം. ചട്ടഞ്ചാല്‍ എംഐസി കോളജിലെ പ്ലസ് വണ്‍ വിദ്യാര്‍ത്ഥി ബെണ്ടിച്ചാല്‍ എയ്യളയിലെ മുഹമ്മദ് കുഞ്ഞിയുടെ മകന്‍ മുനവ്വിറിനാണ് ഈ ദുര്‍ഗതി ഉണ്ടായത്. ഇന്നലെ ഒച്ചയ്ക്ക് ഒരു മണിയോടെ ഉച്ച ഭക്ഷണ സമയത്ത് ക്ലാസില്‍ നിന്നും പുറത്തിറങ്ങിയപ്പോള്‍ മുനവ്വിറിനെ 15 ഓളം വരുന്ന സീനിയര്‍ വിദ്യാര്‍ത്ഥികള്‍ ക്രൂരമായ റാഗിംഗിന് വിധേയമാക്കുകയായിരുന്നു.

സൂപ്പര്‍മാനെ പോലെ ജെട്ടി ഇട്ടുവരണം, ഷൂസ് ധരിക്കാന്‍ പാടില്ല, താടിവടിച്ചു കളയണം തുടങ്ങിയ ആവശ്യങ്ങളാണ് ഈ വിദ്യാര്‍ത്ഥി തള്ളിക്കളഞ്ഞത്. തുടര്‍ന്ന് കുട്ടിയെ വടി കൊണ്ട് അടിക്കുകയും പഞ്ചു കൊണ്ട് കുത്തുകയും ബ്ലേഡ് കൊണ്ട് മുറിവേല്‍പിക്കുകയും ചെയ്തു. ഗുരുതര പരിക്കുകളോടെ പ്ലസ് വണ്‍ വിദ്യാര്‍ത്ഥിയെ ആശുപത്രിയില്‍ പ്രവേശിപ്പിച്ചു. പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.