കുട്ടനാടന്‍ പാടശേഖരങ്ങളിലെ വെള്ളം വറ്റിക്കുന്നതില്‍ വീഴ്ച ഉണ്ടായതായി മന്ത്രി ജി സുധാകരന്‍. ധനമന്ത്രി ഡോ.തോമസ് ഐസക്കിനെതിരെ പരോക്ഷ വിമര്‍ശനവുമായി മന്ത്രി ജി.സുധാകരന്‍. പ്രളയം കഴി‍ഞ്ഞ് പത്ത് ദിവസമായിട്ടും പാടശേഖരങ്ങളിലേക്ക്പമ്പിങ് തുടങ്ങിയിട്ടില്ലെന്ന് സുധാകരന്‍ കുറ്റപ്പെടുത്തി. നവകേരള നിര്‍മാണത്തിന് പണം കണ്ടെത്തുന്നതിന്റെ ഭാഗമായുള്ള ലോട്ടറി പുറത്തിറക്കുന്ന ചടങ്ങില്‍ തോമസ് ഐസക്കിന്റെ സാന്നിദ്ധ്യത്തിലായിരുന്നു സുധാകരന്റെ വിമര്‍ശനം.

കൈനകരിയിലും കുട്ടനാട്ടിലും കുറച്ച്‌കൂടി ജാഗ്രതയോടെ കാര്യങ്ങള്‍ നടത്തേണ്ടതുണ്ട്. പാടശേഖരങ്ങളിലെ പമ്പിങ് തുടങ്ങാത്തതിന്റെ കാരണങ്ങളിലേക്ക് കടക്കുന്നില്ല. അസാദ്ധ്യമായത് സാദ്ധ്യമാക്കിയ ഒരു ജനതയ്ക്ക് പാടശേഖരങ്ങളിലെ വെള്ളം പമ്പ് ചെയ്യാന്‍ ഇത്രയേറെ കാത്തിരിക്കേണ്ടതുണ്ടോയെന്നതാണ് ചോദ്യം. ചോദിച്ചു. ഇതിനൊക്കെ പണം നല്‍കുന്ന അധികാരികള്‍ ഇക്കാര്യങ്ങള്‍ പരിശോധിച്ചാല്‍ നന്നായിരിക്കുമെന്നും സുധാകരന്‍ പറഞ്ഞു.

എന്നാല്‍ പമ്പുകളെല്ലാം വെള്ളത്തിനടിയിലായതിനാലാണ് കുട്ടനാട്ടിലെ വെള്ളം വറ്റിക്കാന്‍ സമയമെടുക്കുന്നതെന്ന് തോമസ് ഐസക് മറുപടി നല്‍കി. നിലവില്‍ കുട്ടനാട്ടിലെ 2000 പമ്പുകള്‍ വെള്ളത്തിനടിയിലാണ്. ഇവ പുറത്തെടുത്തതിന് ശേഷം നാല് ദിവസത്തിനുള്ളില്‍ പമ്പിങ് പുനരാരംഭിക്കും. വെള്ളം വറ്റിക്കാന്‍ ഒരാഴ്ച സമയമെടുക്കുമെന്നും തോമസ് ഐസക്ക് വ്യക്തമാക്കി. വെള്ളം കയറിയതിനെ തുടര്‍ന്ന് പമ്ബുകള്‍ കൂട്ടത്തോടെ കേടായിട്ടുണ്ട്. അവ നന്നാക്കിയെടുക്കാന്‍ ഒരാഴ്ച കൂടി എടുക്കുമെന്നും അദ്ദേഹം അറിയിച്ചു. പ്രളയബാധിതര്‍ക്കുള്ള 10,000 രൂപ സഹായധന വിതരണം ഈയാഴ്ച പൂര്‍ത്തിയാക്കുമെന്നും ധനമന്ത്രി പറഞ്ഞു.