സെപ്റ്റംബര്‍ മാസത്തിലെ എട്ടുനോമ്പ് പെരുന്നാളിനാണ് ഏറ്റവും അധികം തിരക്ക് വേളാങ്കണ്ണിയില്‍ അനുഭവപ്പെടുന്നത്. വന്‍ ഭക്തജനത്തിരക്കാണ് ഇപ്പോള്‍ അനുഭവപ്പെട്ടുകൊണ്ടിരിക്കുന്നത്. നാനാജാതിമതസ്ഥര്‍ എത്തുന്ന ഒരു തീര്‍ത്ഥാടന കേന്ദ്രമാണ് വേളാങ്കണ്ണി. തമിഴ്‌നാടിന്റെ കോറമാണ്ഡല്‍ തീരത്ത് നാഗപട്ടണം ജില്ലയിലാണ് വേളാങ്കണ്ണി സ്ഥിതി ചെയ്യുന്നത്. ഔവര്‍ ലേഡി ഓഫ് ഹെല്‍ത്ത് എന്ന് അറിയപ്പെടുന്ന വിശുദ്ധ കന്യാമറിയത്തിന്റെ ദേവാലയം ഇവിടെയുണ്ട്.
റോമന്‍ കത്തോലിക്കാസഭയുടെ കീഴിലുള്ള ഈ ദേവാലയം, പേരു സൂചിപ്പിക്കുന്നത് പോലെ ആരോഗ്യമാതാവെന്നു അറിയപ്പെടുന്ന വിശുദ്ധ മറിയത്തിന്റെ നാമത്തില്‍ സ്ഥാപിച്ചിട്ടുള്ളതാണ്.
1560ല്‍ വിശുദ്ധ കന്യാമറിയം വേളാങ്കണ്ണയില്‍ പ്രത്യക്ഷപ്പെട്ടുവെന്നാണ് വിശ്വാസം. വേളാങ്കണ്ണിയുടെ മതപരമായ പ്രാധാന്യം ആരംഭിക്കുന്നത് അന്നുമുതലാണ്. നിരവധി അത്ഭുതങ്ങള്‍ക്ക് സാക്ഷിയായ പ്രദേശമാണ് വേളാങ്കണ്ണിയെന്ന് വിശ്വസിക്കപ്പെടുന്നു. അതുകൊണ്ട് തന്നെ ഇവിടം അത്ഭുതങ്ങളുടെ നാട് എന്നും അറിയപ്പെടുന്നു. .വേളാങ്കണ്ണി പള്ളിയെ മാര്‍പ്പാപ്പ 1962ല്‍ ബസിലിക്കയായി ഉയര്‍ത്തി. ഉണ്ണിയേശുവിനെ കൈയ്യിലേന്തിയുള്ള വേളാങ്കണ്ണി മാതാവിന്റെ രൂപം പ്രശസ്തവും എന്നാല്‍ ലോകത്തിന്റെ ഇതര ഭാഗങ്ങളില്‍ പ്രചാരത്തിലിരിക്കുന്നവയില്‍ നിന്നു വ്യത്യസ്തവുമാണ്.ഈ ദേവാലയം ഇവിടെ സ്ഥാപിക്കപ്പെടുവാന്‍ ഇടയായത് 16ആം ശതകത്തില്‍ ഇപ്പോള്‍ പള്ളി നില്‍ക്കുന്ന സ്ഥലത്തും സമീപപ്രദേശത്തും ഉണ്ടായ മാതാവിന്റെ ചില ദര്‍ശനങ്ങളും അത്ഭുത പ്രവര്‍ത്തനങ്ങളും മൂലമാണ് എന്നു ഭക്തജനങ്ങള്‍ വിശ്വസിക്കുന്നു. ഇവിടെ നടന്നതായി പറയപ്പെടുന്ന ഒരു അത്ഭുതത്തെ കുറിച്ച് പറയുന്നത് പതിനേഴാം നൂറ്റാണ്ടില്‍ ബംഗാള്‍ ഉള്‍ക്കടലില്‍ വച്ച് ഒരു പോര്‍ച്ചുഗീസ് കപ്പല്‍ കൊടുങ്കാറ്റില്‍ അകപ്പെട്ടു. തങ്ങള്‍ സുരക്ഷിതമായ കരയില്‍ എത്തിയാല്‍ എത്തുന്ന സ്ഥലത്ത് കന്യാമറിയത്തിന് ഒരു പള്ളി നിര്‍മ്മിക്കാമെന്ന് കപ്പിലില്‍ ഉണ്ടായിരുന്നവര്‍ നേര്‍ന്നു. തുടര്‍ന്ന് കൊടുങ്കാറ്റ് ശമിക്കുകയും കപ്പല്‍ വേളാങ്കണ്ണി തീരത്ത് അടുക്കുകയും ചെയ്തു. കന്യാമറിയത്തിന്റെ ജന്മനാളായ സെപ്റ്റംബര്‍ എട്ടിനാണ് പോര്‍ച്ചുഗീസ് കപ്പല്‍ സുരക്ഷിതമായി തീരത്തെത്തിയത്. തങ്ങളുടെ നേര്‍ച്ച് പൂര്‍ത്തിയാക്കുന്നതിനായി നാവികര്‍ അവിടെ ഉണ്ടായിരുന്ന പള്ളി പുതുക്കിപ്പണിതെന്നുമാണ് വിശ്വാസം. ഈ സംഭവം കഴിഞ്ഞിട്ട് ഏതാണ്ട് 500 വര്‍ഷം കഴിഞ്ഞിരിക്കുന്നു. എന്നിരുന്നാലും ഈ അത്ഭുതത്തിന്റെ ഓര്‍മ്മ പുതുക്കാനായി എല്ലാവര്‍ഷവും ലക്ഷക്കണക്കിന് വിശ്വാസികള്‍ വേളാങ്കണ്ണി സന്ദര്‍ശിക്കുന്നു. വേളാങ്കണ്ണി മാതാവിന്റെ ആരാധനാലയം രാജ്യത്തെ ഏറ്റവും പ്രശസ്തമായ തീര്‍ത്ഥാടന കേന്ദ്രങ്ങളില്‍ ഒന്നാണ്. വേളാങ്കണ്ണിയും പരിസരങ്ങളും വേളാങ്കണ്ണി ബസലിക്ക, ദ മ്യൂസിയം ഓഫ് ഓഫറിംഗ്‌സ്, െ്രെഷന്‍ ഡിപ്പോ, വേളാങ്കണ്ണി ബീച്ച് എന്നിവ ഇവിടുത്തെ കാഴ്ചകളില്‍ ഉള്‍പ്പെടുന്നു. ദ ഫൗണ്ടന്‍ ഓഫ് റെവെലേഷന്‍, വിശുദ്ധ പാത, ലേഡീസ് ടാങ്ക് ചര്‍ച്ച് എന്നിവയും സന്ദര്‍ശിക്കാവുന്നതാണ്. 2004 ഡിസംബര്‍ 26ന് ആഞ്ഞടിച്ച് സുനിമി വേളാങ്കണ്ണിയെ തകര്‍ത്തെറിഞ്ഞു. രാക്ഷസത്തിരമാലകള്‍ നിരവധി ജീവനുകള്‍ കവര്‍ന്നു. ഇന്ത്യയുടെ ചരിത്രത്തില്‍ തെക്കന്‍ തീരം കണ്ട ഏറ്റവും വലിയ ദുരന്തമായി ഇത് മാറി.