ബിഷപ്പിനെ കോടതിയും സംരക്ഷിക്കുകയാണെന്ന് ബലാല്‍സംഗത്തിനിരയായ കന്യാസ്ത്രീക്ക് നീതിതേടി കൊച്ചിയില്‍ സമരം നടത്തുന്ന കന്യാസ്ത്രീകള്‍ ആരോപിച്ചു. സര്‍ക്കാരും സഭയും തുടക്കം മുതലേ ബിഷപ്പിനെ സഹായിക്കുകയാണ്. അതിന് പിന്നാലെയാണ് കോടതിയുടെ ഭാഗത്ത് നിന്നും താമസം ഉണ്ടാകുന്നത്. കോടതിക്ക് മേലും സമ്മര്‍ദ്ദം ഉണ്ടായെന്ന് സമരം നടത്തുന്ന സിസ്റ്റര്‍ ജോസഫൈന്‍ ആരോപിച്ചു. ബിഷപ്പിന്റെ അറസ്റ്റ് ആവശ്യപ്പെട്ടാണ് സമരം നടത്തുന്നത്. അത് ഉടനെ ഉണ്ടാകുമെന്ന് കരുതുന്നില്ല. ബിഷപ്പിന് രക്ഷപെടാന്‍ സമയം അനുവദിക്കുകയാണ് കോടതിയും ചെയ്തത്. പണവും സ്വാധീനവും ഉള്ള ബിഷപ്പിനെ അറസ്റ്റ് ചെയ്യണം. 

പൊലീസ് അന്വേഷണത്തില്‍ പൂര്‍ണതൃപ്തരല്ല. എല്ലാ അധികാരവും ബിഷപ്പ് പ്രയോഗിക്കുന്നു. നീതി കിട്ടും വരെ സമരം നടത്തും. താമസിക്കാതെ പരാതിക്കാരിയായ കന്യാസ്ത്രി കോടതിയെ സമീപിക്കും. അവര്‍ക്ക് പറയാനുള്ള കാര്യങ്ങള്‍ മുഴുവന്‍ കോടതി കേട്ടിട്ടില്ലെന്നും ജോയിന്റ് ക്രിസ്ത്യന്‍ കൗണ്‍സില്‍ പ്രവര്‍ത്തക ഇന്ദുലേഖ അറിയിച്ചു. കന്യാസ്ത്രീ കോടതിയില്‍ നേരിട്ടെത്തി രഹസ്യമൊഴി നല്‍കിയാല്‍ അതിന്‍ പ്രകാരം ബിഷപ്പിന് അറസ്റ്റ് ചെയ്യാനുള്ള കളമൊരുക്കുകയാണ് ഇവരുടെ നീക്കം. 

ഇരുപതോളം കന്യാസ്ത്രീകള്‍ ബിഷപ്പ് ഫ്രാങ്കോയുടെ ഇരയായിട്ടുണ്ടെന്നും പണവും അധികാരവും ഉപയോഗിച്ച് അവരെയെല്ലാം ഭീഷണിപ്പെടുത്തിയിരിക്കുകയാണ്. ഒരു യുവ കന്യാസ്ത്രീയുടെ പ്രാര്‍ത്ഥനാ മുറിയില്‍ ഒളിച്ചിരുന്ന ബിഷപ്പിനെ കണ്ടെത്തിയിരുന്നു. ഇതേ തുടര്‍ന്ന് അവരെ സ്ഥലം മാറ്റിയെന്നും പരാതിക്കാരിയായ കന്യാസ്ത്രീ കഴിഞ്ഞ ദിവസം വെളിപ്പെടുത്തിയിരുന്നു.