ചെറുകിടവ്യാപാരമേഖലയില്‍ സ്വദേശിവത്കരണം നടപ്പിലായതിനെ തുടര്‍ന്ന് നടത്തിയ പരിശോധനയില്‍ രാജ്യത്തിന്റെ വിവിധ ഭാഗങ്ങളിലായി 66 നിയമലംഘനങ്ങള്‍ കണ്ടെത്തി. രാജ്യത്തെ എല്ലാ നഗരങ്ങളിലും ഗ്രാമങ്ങളിലും തൊഴില്‍ സാമൂഹികവികസനമന്ത്രാലയത്തിന്റെയും സുരക്ഷാവിഭാഗത്തിന്റെയും നേതൃത്വത്തിലാണ് പരിശോധന.

നിയമം ലംഘിച്ച സ്ഥാപനങ്ങള്‍ക്ക് പിഴ ചുമത്തുകയും ചിലതിന് താക്കീത് നല്‍കുകയും ചെയ്യുന്നുണ്ട്. റിയാദില്‍ 99 കടകളില്‍ പരിശാധന നടന്നതില്‍ 16 സ്ഥാപനങ്ങള്‍ക്ക് പിഴ ചുമത്തിയതായി അധികൃതര്‍ അറിയിച്ചു. നജ്‌റാനില്‍ 36 സ്ഥാപനങ്ങള്‍ക്കും ബീശയില്‍ 18 കടകള്‍ക്ക് പിഴയിട്ടു. ബീശയില്‍ 32 ഓളം കടകളിലാണ് റെയിഡ് നടന്നത്. ബുറൈദ, അസീര്‍, മദീന, ഹാഇല്‍, അറാര്‍, റഫ, താരിഫ്, ജൗഫ്, മദീന, ബദര്‍ തുടങ്ങിയ സ്ഥലങ്ങളില്‍ പരിശാധന നടന്നതായി തൊഴില്‍ മന്ത്രാലയം അറിയിച്ചു. സൗദിവത്കരണം നടപ്പാക്കി മൂന്ന് ദിവസം പിന്നിട്ടപ്പോള്‍ പരിശാധന കര്‍ശനമായിരിക്കയാണ്. അതേ സമയം റിയാദില്‍ ഉള്‍പെടെ ആദ്യ ദിനങ്ങളില്‍ അടഞ്ഞു കിടന്ന വിദേശികളുടെ കടകള്‍ വ്യാഴാഴ്ച ഭാഗികമായി പ്രവര്‍ത്തിച്ചു.

പല കടകളും തുറന്നു വെച്ചതല്ലാതെ അവിടെ തൊഴിലാളികളെ കാണാനില്ല. രാത്രിയില്‍ മിക്ക കടകളും സജീവമാവുന്നുണ്ട്. വസ്ത്രം, പാദരക്ഷകള്‍, വാഹനങ്ങള്‍, ഫര്‍ണിച്ചര്‍, വീട്ടുപകരണങ്ങള്‍ തുടങ്ങിയവയുടെ വില്‍പന ശാലകളിലാണ് സെപറ്റംബര്‍ 11 മുതല്‍ 70 ശതമാനം സ്വദേശിവത്കരണം നടപ്പിലായത്. അതിനിടെ ചില കടകള്‍ അടച്ച് സാധനങ്ങള്‍ പുറത്തിട്ട് വമ്പിച്ച ആദായത്തിന് വില്‍ക്കുന്നുണ്ട്. ഇന്ന് വെള്ളിയാഴ്ച അവധി ദിവസമായതിനാല്‍ തെരുവുകളില്‍ ഇത്തരം കച്ചവടങ്ങള്‍ വ്യാപകമായി നടക്കാനാണ് സാധ്യത.