ബിജെപിയെ തുടച്ചുനീക്കാന്‍ കോണ്‍ഗ്രസ് കിണഞ്ഞു പരിശ്രമിക്കുക.യാണ് ഇവിടെ വിജയത്തില്‍ കുറഞ്ഞതൊന്നും കോണ്‍ഗ്രസ് ആഗ്രഹിക്കുന്നുമില്ല. തെലങ്കാനയില്‍ നിയമസഭ പിരിച്ചുവിട്ടതും തിരഞ്ഞെടുപ്പിന് കളമൊരുങ്ങിയതും കോണ്‍ഗ്രസിന് അനുകൂലമാകുകയാണ്. ഭരണകക്ഷിയായ ടിആര്‍എസിനെ പ്രതിസന്ധിയിലാക്കുന്ന നീക്കങ്ങളാണ് സംസ്ഥാനത്ത് കോണ്‍ഗ്രസ് നടത്തുന്നത്. പ്രമുഖ നേതാക്കള്‍ എല്ലാം തന്നെ കൂട്ടത്തോടെ കോണ്‍ഗ്രസില്‍ ചേരുന്നതു തന്നെയാണ് കോണ്‍ഗ്രസിനെ സംബന്ധിച്ച് അനുകൂലമാകുന്ന ഘടകം. എന്തായാലും ബിജെപിയുമായി കൂട്ടുകൂടുമെന്ന പ്രചാരണം ടിആര്‍എസിന് കിട്ടിയ അടിയായാണ് തെലങ്കാനയില്‍ വിലയിരുത്തപ്പെടുന്നത്

നിയമസഭ പിരിച്ചുവിട്ടതോടെ തിരഞ്ഞെടുപ്പിന് കളമൊരുങ്ങിയ തെലങ്കാന സംസ്ഥാനത്ത് സാഹചര്യങ്ങള്‍ കോണ്‍ഗ്രസിന് അനുകൂലമാകുന്നു. ഭരണകക്ഷിയായ ടിആര്‍എസിന് ആശങ്ക വര്‍ധിപ്പിക്കുന്ന നീക്കങ്ങളാണ് സംസ്ഥാനത്ത് സംഭവിക്കുന്നത്. പ്രമുഖ നേതാക്കളെല്ലാം കോണ്‍ഗ്രസില്‍ ചേരുകയാണ്. ദില്ലിയില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ സാന്നിധ്യത്തില്‍ ടിആര്‍എസ് നേതാവ് ഉള്‍പ്പെടെയുള്ളവര്‍ കോണ്‍ഗ്രസ് അംഗത്വമെടുത്തു കഴിഞ്ഞു. കൂടുതല്‍ പേര്‍ ഇനിയും പാര്‍ട്ടിയിലേക്ക് ചേരുമെന്നാണ് വിവരം. മാത്രമല്ല, കോണ്‍ഗ്രസ് നേതൃത്വം നല്‍കുന്ന സഖ്യത്തില്‍ ചേരാന്‍ ചില പാര്‍ട്ടികളും തയ്യാറായിട്ടുണ്ട്.

നാല് വര്‍ഷം പിന്നിട്ടിരിക്കെയാണ് തെലങ്കാന നിയമസഭ ഭരണകക്ഷിയായ ടിആര്‍എസ് പിരിച്ചുവിട്ടത്. സംസ്ഥാനത്തെ രാഷ്ട്രീയ സാഹചര്യം ടിആര്‍എസിന് അനുകൂലമായിരുന്നു. നിയമസഭ പിരിച്ചുവിടും മുമ്പ് മുഖ്യമന്ത്രി ചന്ദ്രശേഖര റാവു കര്‍ഷകര്‍ക്ക് കോടികളുടെ പദ്ധതി പ്രഖ്യാപിക്കുകയും ചെയ്തു. സാഹചര്യം ടിആര്‍എസിന് അനുകൂലമായിരുന്നെങ്കിലും ടിആര്‍എസ് ബിജെപിയുമായി കൂടുകൂടുമെന്ന പ്രചാരണമാണ് തിരിച്ചടിയായത്. കോണ്‍ഗ്രസ് ആകട്ടെ, അവസരത്തിനൊത്ത് ഉണരുകയും ചെയ്തു. സംസ്ഥാനത്ത് ടിഡിപിയുമായി സഖ്യം ചേര്‍ന്ന് തിരഞ്ഞെടുപ്പ് നേരിടാനാണ് കോണ്‍ഗ്രസിന്റെ തീരുമാനം. ടിഡിപി, സിപിഐ തുടങ്ങിയ കക്ഷികളുമായി കോണ്‍ഗ്രസ് സഖ്യമുണ്ടാക്കി. രാഷ്ട്രീയ ട്രെന്‍ഡ് തെലങ്കാനയില്‍ മാറുകയാണ്. കോണ്‍ഗ്രസിന് അനുകൂലമായ തരംഗമുണ്ടാകുമെന്നാണ് കണക്കാക്കുന്നത്. ഈ സാഹചര്യം കണക്കിലെടുത്താണ് പ്രമുഖര്‍ കോണ്‍ഗ്രസില്‍ ചേരുന്നതും. ഇവര്‍ നിയമസഭാ തിരഞ്ഞെടുപ്പില്‍ മല്‍സരിക്കുമെന്നും റിപ്പോര്‍ട്ടുകളുണ്ട്. പ്രശസ്ത തെലുങ്ക് സിനിമാ നിര്‍മാതാവ് ബാന്ദ്ല ഗണേഷ് കോണ്‍ഗ്രസില്‍ ചേര്‍ന്നു. രാഹുല്‍ ഗാന്ധിയുടെ സാന്നിധ്യത്തിലായിരുന്നു ദില്ലിയിലെ ചടങ്ങലില്‍ അംഗത്വമെടുത്തത്. കൂടാതെ ടിആര്‍എസ് നിയമസഭാംഗമായിരുന്ന ആര്‍ ഭൂപതി റെഡ്ഡിയും കോണ്‍ഗ്രസില്‍ ചേര്‍ന്നു. തെലുങ്ക് സിനിമാ മേഖലയില്‍ സുപരിചിതമായ മുഖമാണ് ബാന്ദ്ല ഗണേഷിന്റെത്. പവന്‍ കല്യാണിനെയും അദ്ദേഹത്തിന്റെ രാഷ്ട്രീയ പ്രവേശനത്തേയും എപ്പോഴും പുകഴ്ത്താറുള്ള വ്യക്തിയുമാണ് ബാന്ദ്ല. രണ്ട് മാസം മുമ്പ് ഇദ്ദേഹം രാഹുല്‍ ഗാന്ധിയുമായി ബന്ധപ്പെട്ടിരുന്നു. കോണ്‍ഗ്രസില്‍ ചേരുന്ന കാര്യത്തില്‍ ചര്‍ച്ച നടന്നുവരികയായിരുന്നുവെന്ന് അദ്ദേഹവുമായി അടുപ്പമുള്ളവര്‍ പറയുന്നു.

ഷാദ്നഗര്‍ നിയമസഭാ മണ്ഡലത്തില്‍ ബാന്ദ്ല മല്‍സരിക്കുമെന്നാണ് കരുതുന്നത്. ഇദ്ദേഹത്തിന്റെ ബിസിനസ് സ്ഥാപനങ്ങള്‍ ഒട്ടേറെയുള്ള പ്രദേശമാണിത്. കോണ്‍ഗ്രസ് 90 സീറ്റില്‍ മല്‍സരിക്കുമെന്നാണ് വിവരം. ബാക്കി വരുന്ന 29 സീറ്റുകള്‍ സഖ്യകക്ഷികള്‍ക്ക് വിട്ടുകൊടുക്കാനും തീരുമാനിച്ചിട്ടുണ്ട്. ഭൂപതി റെഡ്ഡി ടിആര്‍എസ് നേതാവായിരുന്നു. ടിആര്‍എസ് അധ്യക്ഷന്‍ ചന്ദ്രശേഖര റാവുവിന്റെ നിലപാടില്‍ പ്രതിഷേധിച്ച് പാര്‍ട്ടി അംഗത്വം രാജിവയ്ക്കുകയായിരുന്നു. തുടര്‍ന്നാണ് കോണ്‍ഗ്രസില്‍ ചേര്‍ന്നത്. ജനങ്ങളുടെ താല്‍പ്പര്യം സംരക്ഷിക്കുന്നതില്‍ ടിആര്‍എസ് പരാജയപ്പെട്ടുവെന്നാണ് ഭൂപതിയുടെ ആരോപണം.

ഭൂപതി പാര്‍ട്ടി വിരുദ്ധ പ്രവര്‍ത്തനങ്ങള്‍ നടത്തുന്നുവെന്ന് ടിആര്‍എസില്‍ നേരത്തെ ആരോപണമുണ്ടായിരുന്നു. എന്നാല്‍ അദ്ദേഹത്തിനെതിരെ പാര്‍ട്ടി നടപടി എടുത്തിരുന്നില്ല. ഈ സാഹചര്യം നിലനില്‍ക്കവെയാണ് രാജി. നിസാമാബാദ് മണ്ഡലത്തില്‍ അദ്ദേഹം സ്ഥാനാര്‍ഥിയാകുമെന്ന് കരുതുന്നു. ടിആര്‍എസിന്റെ മറ്റൊരു നേതാവായ ഡി ശ്രീനിവാസ് കോണ്‍ഗ്രസില്‍ ചേരുമെന്ന് അഭ്യൂഹമുണ്ട്. രാജ്യസഭാ എംപിയാണ് ഡി ശ്രീനിവാസ്. പാര്‍ട്ടി നേതൃത്വവുമായി അദ്ദേഹം ഉടക്കിലാണ്. പാര്‍ട്ടി വിരുദ്ധ പ്രവര്‍ത്തനങ്ങള്‍ നടത്തുന്നുവെന്ന് ശ്രീനിവാസിനെതിരെ ആരോപണമുണ്ട്. എന്തായാലും തെലുങ്കാനയിലെ ഈ ശുഭ സൂചനകള്‍ കൊണ്‍ഗ്രസിന് എങ്ങനെ അനുകൂലമാകുന്നു എന്നത് കാത്തിരുന്നുതന്നെ കാണണം.