ദുരിതാശ്വാസ പ്രവര്‍ത്തനങ്ങള്‍ക്ക് സഹായങ്ങളുമായി മോഹന്‍ലാല്‍ ഇപ്പോഴും എത്തുന്നുണ്ട്. ജീവകാരുണ്യസംഘടനയിലൂടെ ശേഖരിച്ച സാധനങ്ങള്‍ നേരിട്ടെത്തിക്കുകയാണ് മോഹന്‍ലാല്‍ ചെയ്തത്. ദുബായിലെ സംഘടന ശേഖരിച്ച സാധനങ്ങള്‍ വെല്ലിങ്ടണ്‍ ഐലന്റിലെ കളക്ഷന്‍ സെന്ററിലെത്തിക്കുകയായിരുന്നു മോഹന്‍ലാല്‍. അവശ്യവസ്തുക്കളുടെ രണ്ടാംഘട്ട വിതരണമാണ് നടത്തിയതെന്ന് മോഹന്‍ലാല്‍ പറയുന്നു. മോഹന്‍ലാലിന്റെ വിശ്വശാന്തി ഫൗണ്ടേഷന്റെ നേതൃത്വത്തിലായിരുന്നു സാധനങ്ങള്‍ കൈമാറിയത്.

ആദ്യഘട്ടത്തില്‍ വയനാട്, മാനന്തവാടി ഭാഗങ്ങളിലുള്ളവര്‍ക്കാണ് സാധന സാമഗ്രികള്‍ എത്തിച്ചു നല്‍കിയത്. രണ്ടാംഘട്ടത്തില്‍ പത്തനംതിട്ട, ആറന്മുള ഭാഗത്തേക്കാണ് എത്തിച്ചുകൊടുക്കുന്നത്. മോജര്‍രവിയും മോഹന്‍ലാലിനൊപ്പമുണ്ടായിരുന്നു. ഒരുപാട് സാധനങ്ങള്‍ എത്തിച്ചിട്ടുണ്ടെന്ന് മോഹന്‍ലാല്‍ പറയുന്നു. അതേസമയം, ഇതിനിടയില്‍ കന്യാസ്ത്രീകളുടെ സമരത്തെക്കുറിച്ചും പീഡന പരാതിയെക്കുറിച്ചും മാധ്യമപ്രവര്‍ത്തകര്‍ ചോദിക്കുകയുണ്ടായി. ചോദ്യം കേട്ടതും മോഹന്‍ലാല്‍ ക്ഷുഭിതനായി,

നിങ്ങള്‍ക്ക് നാണമുണ്ടോ ഇങ്ങനെ ആവശ്യമില്ലാത്ത കാര്യങ്ങള്‍ ചോദിക്കാന്‍ എന്നാണ് ദേഷ്യത്തോടെ മോഹന്‍ലാല്‍ ചോദിച്ചത്. ഇത്തരം നല്ല കാര്യങ്ങള്‍ ചെയ്യുമ്ബോള്‍ ഇതാണോ ചോദിക്കുന്നത്. ആ കന്യാസ്ത്രീകള്‍ എന്ത് ചെയ്യണം. ഇത്രയും വലിയൊരു പ്രോബ്‌ളം (പ്രളയം) നടക്കുമ്ബോള്‍ അത് (കന്യാസ്ത്രീകളുടെ സമരം) പൊതുവികാരമാണോ. നിങ്ങള്‍ക്ക് വേറെ എന്തെങ്കിലുമൊക്കെ ചോദിച്ചുകൂടെ. അതും പ്രളയവുമായി എന്താണ് ബന്ധം എന്നും മോഹന്‍ലാല്‍ ചോദിച്ചു.

മോഹന്‍ലാലിന്റെ പെരുമാറ്റത്തില്‍ മാധ്യമപ്രവര്‍ത്തകരും അമ്ബരന്നു. ചോദ്യം ചോദിച്ചയാള്‍ ഏത് മാധ്യമ സ്ഥാപാനത്തിന്റേതാണെന്ന് അറിഞ്ഞപ്പോള്‍ 'ആ അതാണ്' എന്ന് മോഹന്‍ലാല്‍ പറഞ്ഞു.