എലിപ്പനി പ്രതിരോധ മരുന്നിനെതിരെ സാമൂഹ്യമാധ്യമങ്ങളിലൂടെ വ്യാജ പ്രചരണം നടത്തിയെന്നാരോപിച്ചു പ്രകൃതി ചികിത്സകന്‍ ജേക്കബ് വടക്കഞ്ചേരിയെ അറസ്റ്റു ചെയ്ത് ജയിലിലടച്ച നടപടിയെ വിമര്‍ശിച്ച്‌ ഭരണ പരിഷ്‌കാര കമ്മിഷന്‍ അദ്ധ്യക്ഷന്‍ വി.എസ്. അച്യുതാനന്ദന്‍ രംഗത്തെത്തിയിരിക്കുകയാണ്.

അഭിപ്രായം പ്രചരിപ്പിച്ചതിന്റെ പേരില്‍ കേസെടുത്ത് ജയിലിലടച്ചത് ശരിയായില്ലെന്ന് അദ്ദേഹം പറഞ്ഞു. ആരോഗ്യ സംവിധാനത്തിന് ഹാനികരമാകുന്ന പ്രവര്‍ത്തനം നടത്തുന്നതിന് കേസെടുക്കുന്നതില്‍ തെറ്റില്ലെന്നും അദ്ദേഹം ചൂണ്ടി കാട്ടി. അതേസമയം ശരിതെറ്റുകള്‍ ശാസ്ത്രീയമായി പരിശോധിച്ച്‌ നിയമപരമായി നടപടികളിലേക്ക് കടക്കുന്നതില്‍ തെറ്റില്ലെന്നും ജേക്കബ് വടക്കുംചേരി പറഞ്ഞു.

ജേക്കബ് വടക്കഞ്ചേരിയുടെ പ്രചരണങ്ങള്‍ നമ്മുടെ ആരോഗ്യ സംവിധാനത്തിന് ഹാനികരമാണെന്നുണ്ടെങ്കില്‍ അദ്ദേഹത്തിനെതിരെ കേസെടുക്കുന്നതാവും ഉചിതം. വടക്കഞ്ചേരി പറയുന്നതെല്ലാം ശരിയാണെന്നോ ശാസ്ത്രീയമാണെന്നോ തനിക്ക് അഭിപ്രായമില്ല. അദ്ദേഹം പ്രചരിപ്പിച്ച കാര്യങ്ങളുടെ ശരിതെറ്റുകള്‍ ശാസ്ത്രീയമായി പരിശോധിച്ച്‌ നിയമപരമായ നടപടികളിലേക്ക് കടക്കാവുന്നതാണെന്നും വി.എസ് ചൂണ്ടിക്കാട്ടി.

എലിപ്പനി പ്രതിരോധമരുന്നായ 'ഡോക്സി സൈക്ലിന്‍' കഴിച്ചാല്‍ മറ്റ് അസുഖങ്ങള്‍ ഉണ്ടാകുമെന്ന് പ്രചരിപ്പിച്ചതിനെതിരേ ആരോഗ്യമന്ത്രിയുടെ നിര്‍ദേശത്തെത്തുടര്‍ന്നാണ് ആരോഗ്യവകുപ്പ് ഡയറക്ടര്‍ ആര്‍.എല്‍.സരിത, പൊലീസ് മേധാവിക്കു പരാതിനല്‍കിയത്. ഇതിന്റെ അടിസ്ഥാനത്തിലാണ് സൈബര്‍ പൊലീസ് കേസെടുക്കുകയും അന്വേഷണച്ചുമതല ക്രൈംബ്രാഞ്ചിനു കൈമാറുകയും ചെയ്തത്.

ശേഷം വ്യാജപ്രചാരണം നടത്തിയെന്ന പരാതിയില്‍ അറസ്റ്റിലായ ജേക്കബ് വടക്കുംചേരിയെ സെപ്റ്റംബര്‍ 21 വരെ കോടതി റിമാന്‍ഡുചെയ്യുകയായിരുന്നു. എറണാകുളത്തുനിന്ന് ശനിയാഴ്ച അറസ്റ്റിലായ ഇയാളെ തിരുവനന്തപുരം അഡീഷണല്‍ ചീഫ് ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരാക്കിയാണ് റിമാന്‍ഡ് ചെയ്തത്. പിന്നീട് ജില്ലാ ജയിലിലേക്കു മാറ്റുകയാണ് ഉണ്ടായത്.