സ്വയം അത്ഭുതം പ്രവര്‍ത്തിച്ച് രക്ഷപെടാമെന്ന ധാരണയില്‍ ഫ്രാങ്കോ പറന്നിറങ്ങും. വിലങ്ങൊരുക്കി കേരള പോലീസും. തെളിവുകള്‍ പോലീസ് നിരത്തുമ്പോള്‍ ബിഷപ്പ് തിരിച്ച് പോകാന്‍ പാടുപെടും. വത്തിക്കാന്‍ കന്യാസ്ത്രീയുടെ പീഡന പരാതിയില്‍ ഇടപെട്ടതോടെ ജലന്ധര്‍ ബിഷപ്പ് ഫ്രാങ്കോ മുളയ്ക്കല്‍ ജലന്ധര്‍ രൂപതയുടെ ചുമതല ഒഴിഞ്ഞു. ജലന്ധര്‍ രൂപതയില്‍ ഇനി അഡ്മിനിസ്‌ട്രേറ്റിവ് ഭരണം. മൂന്നംഗ സമിതിയാണ് ഭരണം നടത്തുക. മൂന്ന് സഹവൈദികര്‍ക്ക് ബിഷപ്പ് ചുമതലകള്‍ കൈമാറിയതായി ഉത്തരവിറക്കി. ചുമതല കൈമാറുന്ന കാര്യം അറിയിച്ച് ബിഷപ്പ് രൂപതയിലെ വൈദികര്‍ക്ക് കത്തയച്ചു. ഫാ. മാത്യു കോക്കണ്ടത്തിന്റെ നേതൃത്വത്തിലുള്ള മൂന്ന് വൈദികര്‍ക്കാണ് രൂപതയുടെ ഭരണ ചുമതല.
ചോദ്യം ചെയ്യലിന് ഹാജരാകാനുള്ള അന്വേഷണ സംഘത്തിന്റെ നോട്ടീസ് കിട്ടിയതോടെയാണ് നടപടി. രൂപതയുടെ ഭരണപരമായ പദവി മാത്രമാണ് ഒഴിഞ്ഞത്. ബിഷപ്പ് എന്ന നിലയിലുള്ള ആധ്യാത്മിക പദവി ഫ്രാങ്കോ മുളയ്ക്കലിനുണ്ടാവും. മോണ്‍സിഞ്ഞോര്‍ മാത്യു കോക്കണ്ടത്തിനെ ഫാ. ജോസഫ് തെക്കുംകാട്ടില്‍, ഫാ. സുബിന്‍ തെക്കേടത്ത് എന്നിവര്‍ സഹായിക്കുമെന്നും സര്‍ക്കുലറില്‍ പറയുന്നു. ജലന്ധര്‍ ബിഷപ്പിനെ അറസ്റ്റ് ചെയ്യണമെന്ന് ആവശ്യപ്പെട്ട് കന്യാസ്ത്രീകള്‍ നടത്തുന്ന സമരം ഒമ്പതാം ദിവസത്തിലേക്ക് കടക്കുമ്പോഴാണ് വത്തിക്കാന്‍ ഇടപെടുമെന്ന റിപ്പോര്‍ട്ട് വരുന്നത്. അന്വേഷണം പൂര്‍ത്തിയായി റിപ്പോര്‍ട്ട് വരുന്നത് വരെ സഭാ നേതൃത്വത്തില്‍ നിന്ന് ബിഷപ്പ് ഫ്രാങ്കോയെ മാറ്റി നിര്‍ത്തിയേക്കുമെന്ന് വിവരവുമുണ്ടായിരുന്നു. ഈ സാഹചര്യത്തിലാണ് ചോദ്യം ചെയ്യലിന് നാട്ടിലേക്ക് പോവുന്നതിന്റെ ഭാഗമായി സഹവൈദികര്‍ക്ക് ചുമതല കൈമാറുന്നതായി ബിഷപ്പ് ഫ്രാങ്കോയുടെ സര്‍ക്കുലര്‍ പുറത്തുവന്നത്.
കേരളത്തിലെ സഭാ നേതൃത്വത്തില്‍ നിന്ന് വത്തിക്കാന്‍ അടിയന്തരമായി വിവരങ്ങള്‍ തേടിയിട്ടുണ്ട്. സിബിസിഐ പ്രസിഡന്റ് ഒസ്വാള്‍ ഗ്രേഷ്യസാണ് വത്തിക്കാനെ വിവരങ്ങള്‍ അറിയിച്ചത്.
എല്ലാവരും തനിക്ക് വേണ്ടി പ്രാര്‍ഥിക്കണമെന്നും ബിഷപ്പ് സര്‍ക്കുലറില്‍ ആവശ്യപ്പെടുന്നുണ്ട്. എല്ലാം ദൈവത്തിനു കൈമാറുന്നുവെന്നും തനിക്കും പരാതിക്കാരിക്കും അവരെ പിന്തുണച്ച് സമരത്തിനിറങ്ങിയവര്‍ക്കും വേണ്ടി പ്രാര്‍ഥിക്കണമെന്നും സര്‍ക്കുലറില്‍ പറയുന്നുണ്ട്. അങ്ങനെയെങ്കില്‍ മാത്രമേ അവരുടെ ഹൃദയത്തില്‍ മാറ്റമുണ്ടാവുകയും ദൈവത്തിന്റെ പ്രേരണയാല്‍ സത്യം വെളിപ്പെടുകയുള്ളുവെന്നും ബിഷപ്പ് സര്‍ക്കുലറില്‍ പറയുന്നു.