ഫ്രാങ്കോ മുളയ്ക്കല്‍ മായും മുമ്പ്,പി കെ ശശിയെ രക്ഷിക്കും. ശശിക്കെതിരെ പരാതി നല്‍കിയ യുവതി പരാതിയില്‍ നിന്ന് പിന്‍മാറിയെന്നും വിവരമുണ്ട്. യുവതിയെ സി പി എമ്മിന്റെ ഉന്നത നേതാക്കള്‍ കണ്ടതാവും വിവരമുണ്ട്. ആരോപണത്തില്‍ ഉറച്ചു നിന്നാല്‍ ബുദ്ധിമുട്ടാകുമെന്ന കാര്യം സി പി എം അറിയിച്ചതായാണ് വിവരം. സംസ്ഥാനം ഭരിക്കുന്ന പാര്‍ട്ടി ഒരു കാര്യം ആവശ്യപ്പെട്ടാല്‍ അതില്‍ നിന്ന് മാറി നില്‍ക്കാന്‍ പാര്‍ട്ടി കാര്‍ക്ക് കഴിയുകയില്ല.

അതേ സമയം ശശിക്കെതിരെ പാര്‍ട്ടി തലത്തില്‍ നിസാരമായ ഏതെങ്കിലും നടപടി സ്വീകരിക്കാനും അന്വേഷണ കമ്മീഷന്‍ ആവശ്യപ്പെട്ടേക്കും. ശശിയെ ഒഴിവാക്കിയാല്‍ അത് പാര്‍ട്ടിക്ക് ദോഷമാകുമെന്ന ചിന്തയിലാണ് ഇത്തരമൊരു നടപടി സ്വീകരിക്കാന്‍ സാധ്യതയുള്ളത്. ശശി എം എല്‍ എ സ്ഥാനം രാജിവയ്‌ക്കേണ്ട കാര്യമേ ഇല്ലെന്നാണ് പാര്‍ട്ടി നിലപാട്.അങ്ങനെ രാജി വയ്‌ക്കേണ്ടി വന്നാല്‍ അതിനേ സമയമുണ്ടാവുകയുള്ളു.

ശശിക്കെതിരെ പോലീസിലോ കോടതിയിലോ വനിതാ കമ്മീഷനിലോ കേസില്ല. ഇത്തരമൊരു സാഹചര്യത്തില്‍ കേസെടുക്കേണ്ട കാര്യവുമില്ല. പാര്‍ട്ടിയില്‍ പരാതി ലഭിക്കുന്നതിനെ പോലീസുമായി കൂടികുഴയ്‌ക്കേണ്ട കാര്യമില്ല. പാര്‍ട്ടിക്ക് പാര്‍ട്ടിയുടേതായ വഴിയുണ്ട്. അതില്‍ മറ്റാരെയും ഇടപെടുത്തേണ്ട കാര്യമില്ല. സര്‍ക്കാരിനെ ബോധ്യപ്പെടുത്തേണ്ട ആവശ്യവുമില്ല.

എം എല്‍ എ ഇതോടെ സുരക്ഷിതനായെന്നാണ് പാര്‍ട്ടിയുടെ കണ്ടെത്തല്‍. അദ്ദേഹത്തെ പ്രതിപക്ഷം വരെ സഹായിക്കുമെന്നാണ് പറയുന്നത്. പ്രതിപക്ഷം ഇതുവരെ ശശിക്കെതിരെ കാര്യമായ ഒരു സമരവും നടത്തിയിട്ടില്ല. കോണ്‍ഗ്രസിനൊപ്പം ബി ജെ പിയും ശശിയെ സഹായിക്കുന്ന നിലപാട് തന്നെയാണ് സ്വീകരിച്ചിട്ടുള്ളത്. ബി ജെ പി ശശിക്കെതിരെ സമര രംഗത്തേയില്ല.

ശശി എല്ലാവരെയും മാനേജ് ചെയ്യാന്‍ കഴിവുള്ള നേതാവാണ്. അദ്ദേഹത്തിന് രാഷ്ട്രീയാതീതമായി അതിശക്തമായ ബന്ധങ്ങളുണ്ട്. പാലക്കാട് ജില്ലയിലെ പല കാര്യങ്ങളും കൈകാര്യം ചെയ്യുന്നത് ശശി ഒറ്റയ്ക്കാണ്. ശശിയുടെ കഴിവ് എല്ലാവര്‍ക്കും അറിയുന്നതുമാണ്. എ കെ ബാലനെന്ന് വേണ്ട പിണറായിക്കും കോടിയേരിക്കുമൊക്കെ ഏറെ വേണ്ടപ്പെട്ടയാളാണ് പി കെ ശശി. അന്വേഷണ കമ്മീഷന്‍ മറിച്ചൊരു തീരുമാനമെടുത്താല്‍ തന്നെ അത് നേരിടാനുള്ള ശക്തി ശശിക്കുണ്ട്. ഫ്രാങ്കോ മുളയ്ക്കല്‍ വാര്‍ത്തകളില്‍ നിന്ന് മറയും മുമ്പ് ശശിയെ രക്ഷിച്ചെടുക്കാനാണ് സി പി എമ്മിന്റെ ശ്രമം.