എറണാകുളം മഹാരാജാസ് കോളജിലെ ബിരുദ വിദ്യാര്‍ഥി അഭിമന്യുവിനെ കുത്തിക്കൊലപ്പെടുത്തിയ കേസില്‍ മുഖ്യപ്രതി കീഴടങ്ങി. കാമ്പസ് ഫ്രണ്ട് എറണാകുളം ജില്ലാ സെക്രട്ടറിയും ആലുവ സ്വദേശിയുമായ ആരിഫ് ബിന്‍ ആണ് കീഴടങ്ങിയത്. കൊലപാതകത്തിന് ശേഷം ഒളിവില്‍ പോയ ആരിഫിനെതിരെ പൊലീസ് ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. കൊലപാതകം നടത്താന്‍ ആളുകളെ ഏര്‍പ്പെടുത്തിയതെന്നാണ് ഇയാള്‍ക്കെതിരായ കുറ്റം. പ്രതികളുടെ റിമാന്‍ഡ് കാലാവധി പൂര്‍ത്തിയാകാന്‍ പോകുന്ന സാഹചര്യത്തിലാണ് മുഖ്യപ്രതി കീഴടങ്ങിയത്. കേസില്‍ ആകെ 30 പ്രതികളാണുള്ളത്. ഇവരില്‍ ആരിഫിനെ കൂടാതെ ഏഴു പ്രതികളെ കൂടി പിടികൂടാനുണ്ട്.

കഴിഞ്ഞ രണ്ടിന് രാത്രി 12.30 ഓടെയാണ് രണ്ടാംവര്‍ഷ കെമിസ്ട്രി ബിരുദ വിദ്യാര്‍ഥിയും എസ്.എഫ്.ഐ നേതാവുമായ ഇടുക്കി വട്ടവട സ്വദേശി അഭിമന്യു (20) കൊല്ലപ്പെടുന്നത്. ക്യാമ്പസ് ഫ്രണ്ട്, എസ്.ഡി.പി.ഐ സംഘടനകളിലെ 15 അംഗ സംഘമാണ് ആക്രമണം നടത്തിയതെന്നാണ് പൊലീസിന്റെ കണ്ടെത്തല്‍.