ശബരിമല വിധിയുടെ മറവില് രണ്ടാം വിമോചന സമരം നടത്താനുള്ള നീക്കവും സര്ക്കാരിനെ അട്ടിമറിക്കാനുള്ള മോഹവും നടക്കില്ല, വിധി നടപ്പാക്കണം, ബി.ജെ.പിയുടെ ജാഥയില് അണിനിരന്ന് കോണ്ഗ്രസും കലാപം നടത്തുന്നു... ദേശീയ രാഷ്ട്രീയത്തില് ഇത് അപകടകരമാണ് , അതിനാല് എല്.ഡി.എഫ് വിശദീകരണയോഗങ്ങള് നടത്തും - കണ്വീനര് നിലപാട് വ്യക്തമാക്കുന്നു
ശബരിമലയിലെ സ്ത്രീപ്രവേശന വിധിയുടെ മറവില് രണ്ടാംവിമോചന സമരം നടക്കാനുള്ള നീക്കം വിലപ്പോകില്ലെന്ന് എല്.ഡി.എഫ് കണ്വീനര് എ.വിജയരാഘവന് വ്യക്തമാക്കി. സുപ്രീംകോടതി വിധിയുടെ മറവില് സര്ക്കാരിനെ അട്ടിമറിക്കാനാണ് നീക്കം. കോടതി വിധി സര്ക്കാര് നടപ്പാക്കണം. ബി.ജെ.പിയും ആര്.എസ്.എസും കോണ്ഗ്രസും കലാപം നടത്തുന്നു. അതിനാല് എല്.ഡി.എഫ് ഇത് സംബന്ധിച്ച് വിശദീകരണ യോഗം നടത്താന് തീരുമാനിച്ചതായും കണ്വീനര് വാര്ത്താസമ്മേളനത്തില് അറിയിച്ചു.
ശബരിമലയിലെ സ്ത്രീപ്രവേശനം വിശദീകരിക്കാന് 16 മുതല് എല്ഡിഎഫ് പൊതുജനകൂട്ടായ്മകള് സംഘടിപ്പിക്കും. മുഖ്യമന്ത്രി പിണറായി വിജയന് അടക്കം വിശദീകരണയോഗങ്ങളില് പങ്കെടുക്കും. വിശ്വാസത്തിന്റെ പേരില് നടക്കുന്ന പ്രതിഷേധങ്ങള് ഇടതുപക്ഷ സര്ക്കാരിനെ അട്ടിമറിക്കാനുള്ള കലാപനീക്കമാണെന്നും വിജയരാഘവന് ആരോപിച്ചു. കോടതി വിധി എല്ഡിഎഫ് യോഗം ചര്ച്ച ചെയ്തു. വിശ്വാസത്തിന്റെ പേരില് ജനങ്ങളെ തെരുവിലിറക്കി മുഖ്യമന്ത്രിയെ അധിക്ഷേപിക്കുക, മന്ത്രിമാരെ തടയുക എന്ന നിലയിലേക്ക് സമരത്തെ വഴിതിരിച്ചുവിടുന്നു. ഭരണഘടന ഉയര്ത്തിപിടിക്കേണ്ടതിന് പകരം ജനങ്ങളെ തെറ്റിദ്ധരിപ്പിക്കുകയാണെന്നും വിജയരാഘവന് ചൂണ്ടിക്കാട്ടി. ആര്എസ്എസും ബിജെപിയും യുഡിഎഫും ഇതിന് പിന്നിലുണ്ട്.
ശബരിമല വിധി സര്ക്കാര് ഇടപെടല് കൊണ്ട് ഉണ്ടായതല്ല. സര്ക്കാര് മാതൃകാപരമായ ഭരണം നടത്തുകയാണ്. കലാപശ്രമം വികസന കാഴ്ചപാടുകളെ അട്ടിമറിക്കാനാണ്. സര്ക്കാരിന്റെ ജനകീയതയും സാമൂഹിക അംഗീകാരം യുഡിഎഫിനെ ക്ഷീണിപ്പിച്ചു. സര്ക്കാരിനെതിരെ ബി.ജെ.പി നടത്തുന്ന ജാഥുടെ ഭാഗമാകാന് കോണ്ഗ്രസ് തയ്യാറായി. അതിനെ എതിര്ക്കില്ലെന്ന് പ്രതിപക്ഷനേതാവും വ്യക്തമാക്കിയിട്ടുണ്ട്. ഈ നീക്കം ഇന്നത്തെ ദേശീയ രാഷ്ട്രീയത്തില് അപകടകരമാണ്. വിധി നടപ്പാക്കാന് സര്ക്കാര് ബാധ്യസ്ഥമാണെന്ന് മുഖ്യമന്ത്രി കാര്യകാരണ സഹിതം വ്യക്തമാക്കിയിരുന്നു. എന്നിട്ടും അക്രമം അഴിച്ചുവിടുന്ന നിലയിലേക്കാണ് കാര്യങ്ങള് പോകുന്നത്. ഇത് അപകടകരമാണെന്നും അദ്ദേഹം ചൂണ്ടിക്കാട്ടി.
ഇതെല്ലാം കണക്കിലെടുത്താണ് യുവതീ പ്രവേശം സംബന്ധിച്ച് വിശദീകരിക്കാന് പൊതുജന കൂട്ടായ്മ നടത്താന് എല്ഡിഎഫ് തീരുമാനിച്ചത്. നിലപാട് വ്യക്തമാക്കാന് 16ന് തിരുവനന്തപുരത്ത് മുഖ്യമന്ത്രി പങ്കെടുക്കുന്ന ബഹുജനകൂട്ടായ്മ നടത്തും. 23ന് പത്തനംതിട്ടയിലും 24ന് കൊല്ലത്തും മുഖ്യമന്ത്രി പങ്കെടുക്കുന്ന യോഗങ്ങള് ഉണ്ടായിരിക്കും. 30നകം ജില്ലാ കേന്ദ്രങ്ങളിലും വിശദീകരണ പൊതു കൂട്ടായ്മകള് നടത്തും. പഞ്ചായത്ത് തലത്തില് ഇടത് മുന്നണി കുടുംബയോഗങ്ങള് വിളിച്ച് നിലപാട് വ്യക്തമാക്കുമെന്നും എ. വിജയരാഘവന് അറിയിച്ചു.
https://www.facebook.com/Malayalivartha
