ബിജെപി കൗൺസിലർ ആർ. സുഗതനെതിരെ കാപ്പ ചുമത്തിയതിന് ആഭ്യന്തര വകുപ്പിന്റെ അംഗീകാരം ലഭിച്ചു. ഇതോടെ തിരുവനന്തപുരം കോർപ്പറേഷനിൽ പുതിയ രാഷ്ട്രീയ വിവാദത്തിന് തിരിതെളിഞ്ഞു. വിവിധ ദൈവങ്ങളുടെ പേരിൽ സത്യപ്രതിജ്ഞ ചെയ്തതിനെത്തുടർന്ന് അസാധുവാക്കപ്പെട്ട 20 ബിജെപി കൗൺസിലർമാരിൽ ഒരാളാണ് സുഗതൻ.ഹൈക്കോടതി സത്യപ്രതിജ്ഞ അസാധുവാക്കിയതിൽ ‘കാപ്പ’ കേസിൽ ജയിലിൽ കഴിയുന്ന വാഴോട്ടുകോണം ബിജെപി കൗൺസിലർ ആർ.സുഗതനും ഉൾപ്പെട്ടതോടെ 6 മാസം പ്രായമായ കോർപറേഷനിലെ ബിജെപി ഭരണസമിതി കടുത്ത പ്രതിരോധത്തിലായി.

സത്യപ്രതിജ്ഞ ചെയ്യാൻ 4 ആഴ്ച സമയമാണ് ഹൈക്കോടതി അനുവദിച്ചിരിക്കുന്നത്. ഇതിനകം സത്യപ്രതിജ്ഞ ചെയ്യാനായില്ലെങ്കിൽ സുഗതൻ അയോഗ്യനാക്കപ്പെടും. കേവല ഭൂരിപക്ഷമില്ലാത്തതിനാൽ ഭരണസമിതിയുടെ നിലനിൽപ് അവതാളത്തിലാകുമെന്നാണ് ആശങ്ക. ജയിലിൽ ആയതിനാൽ കൗൺസിൽ യോഗങ്ങളിൽ പങ്കെടുക്കാൻ കഴിയുന്നില്ലെന്ന ആശങ്കയ്ക്കു പുറമേയാണ് പുതിയ പ്രതിസന്ധി. എന്നാൽ സുഗതന് സത്യപ്രതിജ്ഞ ചെയ്യാൻ അവസരം നൽകണമെന്ന് ആവശ്യപ്പെട്ട് കോടതിയെ സമീപിക്കുമെന്ന് മേയർ വി.വി.രാജേഷ് പറഞ്ഞു.ഹൈക്കോടതി ഉത്തരവിന്റെ അടിസ്ഥാനത്തിൽ സുഗതന് സത്യപ്രതിജ്ഞ ചെയ്യാൻ

ഒരു ദിവസത്തെ ഇളവ് ആവശ്യപ്പെട്ട് കോടതിയെ സമീപിക്കാനാണ് ആലോചന.അതേസമയം, ഡപ്യൂട്ടി മേയർ തിരഞ്ഞെടുപ്പ് അസാധുവാക്കണമെന്നാവശ്യപ്പെട്ട് സിപിഎം ഡിവിഷൻ ബഞ്ചിൽ അപ്പീൽ നൽകും.കടുത്ത മത്സരം നടന്ന വാഴോട്ടുകോണം ഡിവിഷനിൽ എൽഡിഎഫ് സ്ഥാനാർഥിയെ 58 വോട്ടിന് പരാജയപ്പെടുത്തിയാണ് സുഗതൻ കൗൺസിലറായത്. പക്ഷേ മൂന്ന് മാസം കഴിഞ്ഞപ്പോഴേക്കും ഇപ്പോഴത്തെ അറസ്റ്റിന് കാരണമായ വധശ്രമ കേസെത്തി.വെള്ളൈക്കടവ് ക്ഷേത്രത്തിലെ ഉത്സവത്തിൽ ഗാനമേളയ്ക്കിടെ പുതിയ പാട്ടുപാടാൻ ആവശ്യപ്പെട്ട്

രണ്ട് പേർ വേദിക്ക് അരികിലെത്തി ബഹളം വച്ചു. അൽപം കഴിഞ്ഞ് സ്ഥലത്തെത്തിയ സുഗതൻ പരിപാടി അലങ്കോലപ്പെടുത്തിയെന്ന് ആരോപിച്ച് ആളുമാറി യുവാവിനെ ഇരുമ്പ് പൈപ്പ് കൊണ്ട് മർദ്ദിക്കുകയായിരുന്നു. കേസെടുത്തതിനു പിന്നാലെ സുഗതൻ ആദ്യം സെഷൻസ് കോടതിയിലും പിന്നീട് ഹൈക്കോടതിയിലും മുൻകൂർ ജാമ്യ അപേക്ഷ നൽകി. ഹൈക്കോടതി മുൻകൂർ ജാമ്യം തള്ളിയതോടെയായിരുന്നു അറസ്റ്റ്. ജാമ്യാപേക്ഷകൾ കോടതി തള്ളിയതോടെ ഇപ്പോഴും ജയിലിൽ കഴിയുകയാണ് സുഗതൻ. ഇതിനിടെയാണ് സത്യപ്രതിജ്ഞ റദ്ദാക്കിയത്.