നടതുറക്കാന് ദിവസങ്ങള് ശേഷിക്കേ ഒരുക്കങ്ങള് വിലയിരുത്താന് മുഖ്യമന്ത്രി ശബരിമലയിലേക്ക്
മണ്ഡലകാല പൂജക്കായി ശബരിമല തുറക്കുന്നതിന് മുന്നോടിയായി ഒരുക്കങ്ങള് വിലയിരുത്താന് മുഖ്യമന്ത്രി ശബരിമലയില് പോകുമെന്ന് സൂചന. അവലോകന യോഗത്തിനും ഒരുക്കങ്ങള്ക്കുമായി എല്ലാ മുഖ്യമന്ത്രിമാരും പമ്പയിലും ശബരിമലയിലും എത്താറുണ്ട്. ഇത്തവണത്തെ വിവാദങ്ങളുടെ പശ്ചാത്തലത്തില് കുറവുകള് വളരെ വേഗത്തില് പരിഹരിക്കാനായിരിക്കും ശ്രമിക്കുക. പ്രളയം തകര്ത്ത പമ്പയെ ഇനിയും നേരെയെത്തിക്കാനായിട്ടില്ല. നിര്മ്മാണ പ്രവര്ത്തനങ്ങള് യുദ്ധകാലാടിസ്ഥാനത്തിലാക്കാനും മുഖ്യമന്ത്രി നിര്ദേശിച്ചിട്ടുണ്ട്.
ഒരുക്കങ്ങള് വിലയിരുത്താന് ബുധനോ വ്യാഴമോ മുഖ്യമന്ത്രി പിണറായി വിജയന് ശബരിമല സന്ദര്ശിച്ചേക്കുമെന്നാണ് ലഭിക്കുന്ന സൂചന. ഒരുക്കങ്ങള് ഇഴയുന്നുവെന്ന വിമര്ശനങ്ങള്ക്കിടെ മുഖ്യമന്ത്രിയും ശബരിമല ഉന്നതാധികാര സമിതിയും നാളെ അവലോകന യോഗങ്ങളും വിളിച്ചിട്ടുണ്ട്. നിലയ്ക്കലും പമ്പയിലും നിര്മ്മാണ പ്രവര്ത്തനങ്ങള് യുദ്ധകാലാടിസ്ഥാനത്തില് പൂര്ത്തിയാക്കാന് ടാറ്റ പ്രോജക്ട്സിനു സര്ക്കാര് കര്ശന നിര്ദ്ദേശം നല്കി.
ഹൈക്കോടതി നിയോഗിച്ച ശബരിമല ഉന്നതാധികാര സമിതി അധ്യക്ഷന് ജസ്റ്റിസ് സിരിജഗന്റെ നേതൃത്വത്തില് അവലോകനയോഗം നാളെ രാവിലെയും മുഖ്യമന്ത്രി പിണറായി വിജയന്റെ നേതൃത്വത്തിലുള്ള യോഗം ഉച്ചയ്ക്കു ശേഷവുമാണ്. പൊലീസ് ഉദ്യോഗസ്ഥരും വിവിധ സര്ക്കാര് വകുപ്പു മേധാവികളും ദേവസ്വം ബോര്ഡ് അധികൃതരും പങ്കെടുക്കും. ടാറ്റ പ്രോജക്ട്സിന്റെ ജോലി 70% പൂര്ത്തിയായെന്നാണു സര്ക്കാരിന്റെ വിലയിരുത്തല്. ഈ മാസം തന്നെ നിര്മ്മാണപ്രവര്ത്തനങ്ങളെല്ലാം പൂര്ത്തിയാക്കണമെന്നാണു നിര്ദ്ദേശം. എന്നാല്, എത്ര വേഗം കൂട്ടിയാലും നിര്മ്മാണ പ്രവര്ത്തനങ്ങള് പൂര്ത്തിയാകില്ലെന്നും വിലയിരുത്തുന്നു.
അതേസമയം പ്രതിപക്ഷ നേതാവ് രമേശ് ചെന്നിത്തല നാളെ ഉച്ചയ്ക്കു മൂന്നിനു പമ്പ സന്ദര്ശിക്കും. മണ്ഡലകാലത്തിനു നടതുറക്കാന് ദിവസങ്ങള് മാത്രം അവശേഷിക്കുമ്ബോഴും ശബരിമലയില് ഒരുക്കങ്ങളും വികസന പ്രവര്ത്തനങ്ങളും നടക്കുന്നില്ലെന്ന പരാതിയുടെ അടിസ്ഥാനത്തിലാണു സന്ദര്ശനം. അതിനിടെ സന്നിധാനത്ത് വലിയ സുരക്ഷ ഒരുക്കാനാണ് പൊലീസ് ഒരുങ്ങുന്നത്.
മണ്ഡലമകരവിളക്കു കാലത്ത് സുരക്ഷയ്ക്കായി 16,000 പൊലീസുകാരെ നിയോഗിക്കും. 4 ഘട്ടമായി ശരാശരി 4000 പൊലീസുകാര് വീതം സന്നിധാനം, പമ്ബ, നിലയ്ക്കല് എന്നിവിടങ്ങളില് സുരക്ഷാ ചുമതലയിലുണ്ടാകും. 15 ദിവസം കൂടുമ്ബോള് ഉദ്യോഗസ്ഥ സംഘങ്ങള് മാറും. സന്നിധാനത്താകും ഏറ്റവും കൂടുതല് പൊലീസുകാരെ നിയോഗിക്കുക 1500. വനിതാ തീര്ത്ഥാടകരുടെ സുരക്ഷയ്ക്കായി 60 എസ്ഐമാര് ഉള്പ്പെടെ 900 വനിതാ പൊലീസ് ഉദ്യോഗസ്ഥരെയും നിയോഗിക്കും. നാവിക, വ്യോമസേനകളുടെ സഹായത്തോടെ ആകാശനിരീക്ഷണം ഏര്പ്പെടുത്തും. നിലയ്ക്കലില് ഹെലിപ്പാഡും സജ്ജമാക്കും.
https://www.facebook.com/Malayalivartha
