ശബരിമല യുവതീപ്രവേശനത്തില്‍ സുപ്രീംകോടതി വിധിക്കെതിരെ സംസാരിച്ച ബി.ജെ.പി അധ്യക്ഷന്‍ പി.എസ് ശ്രീധരന്‍പിള്ളയ്ക്കും തന്ത്രി കണ്ഠരര് രാജീവര്‍ക്കും എതിരെ കോടതിയലക്ഷ്യം നിലനില്‍ക്കില്ല. അഭിഭാഷകരായ ലാനാകുമാരി, വര്‍ഷ എന്നിവര്‍ നല്‍കിയ ഹര്‍ജി പരിഗണിക്കാനാവില്ലെന്ന് സോളിസിറ്റര്‍ ജനറല്‍ അറിയിച്ചു. സാധാരണ കോടതിയലക്ഷ്യ ഹര്‍ജികള്‍ക്ക് അനുമതി നല്‍കുന്നത് അറ്റോണി ജനറലാണ്.

അറ്റോണി ജനറല്‍ കെ.കെ വേണുഗോപാല്‍ ഇക്കാര്യം സോളിസിറ്റര്‍ ജനറല്‍ തുഷാര്‍മേത്തയെ ചുമതലപ്പെടുത്തുകയായിരുന്നു. അദ്ദേഹമാണ് ഹര്‍ജിക്ക് അനുമതി നല്‍കേണ്ടെന്നും ശ്രീധരന്‍പിള്ളയും തന്ത്രിയും നടത്തിയത് ക്രീയാത്മക വിമര്‍ശനമാണെന്നും അഭിപ്രായപ്പെട്ടത്. ഇതോടെ ബി.ജെ.പിക്ക് രാഷ്ട്രീയനേട്ടമായി.

മാധ്യമവാര്‍ത്തകളുടെ അടിസ്ഥാനത്തില്‍ കോടതിയലക്ഷ്യ ഹര്‍ജി പരിഗണിക്കാനാവില്ലെന്നും അല്ലാതെ പരിഗണിച്ചാലും ഈ ഹര്‍ജി നിലനില്‍ക്കില്ലെന്നും സോളിസിറ്റര്‍ ജനറല്‍ അറ്റോര്‍ണി ജനറലിനെ അറിയിച്ചു. മുഖ്യമന്ത്രി പിണറായി വിജയന്റെ ഓഫീസിലുള്ള ഒരാളുടെ ഭാര്യയാണ് ഹര്‍ജിക്കാരില്‍ ഒരാളെന്ന് ശ്രീധരന്‍പിള്ള ആരോപിച്ചിരുന്നു. തുലാമാസ പൂജകള്‍ക്ക് നടതുറന്നപ്പോള്‍ യുവതികള്‍ സന്നിധാനത്ത് എത്തിയപ്പോള്‍ തന്ത്രി തന്നെ വിളിച്ചിരുന്നെന്നും അദ്ദേഹം അസ്വസ്ഥനായിരുന്നെന്നും നട അടച്ചിട്ടാല്‍ കോടതി അലക്ഷ്യമാവില്ലേ എന്നും ചോദിച്ചിരുന്നെന്നും എന്നാല്‍ അങ്ങനെ സംഭവിക്കില്ലെന്നും കേസെടുക്കുന്നെങ്കില്‍ ആദ്യം എനിക്കെതിരെ ആകുമെന്നും പതിനായിരങ്ങള്‍ തന്ത്രിക്ക് ഒപ്പമുണ്ടെന്നും ഉറപ്പ് നല്‍കിയതായി ശ്രീധരന്‍പിള്ള വെളിപ്പെടുത്തിയിരുന്നു.

യുവതികള്‍ ശ്രീകോവിലില്‍ എത്തിയാല്‍ നടഅടയ്ക്കുമെന്ന് തന്ത്രി രാജീവരര് പറഞ്ഞിരുന്നു. ശ്രീധരന്‍പിള്ള കോടതി വിധിക്കെതിരെ സംസാരിച്ചതായി മാധ്യമവാര്‍ത്തകളുണ്ടായിരുന്നു ഇത് രണ്ടും ചൂണ്ടിക്കാട്ടിയാണ് അഭിഭാഷകര്‍ സുപ്രീംകോടതിയില്‍ കോടതിയലക്ഷ്യ ഹര്‍ജി നല്‍കിയത്. ഹര്‍ജി രാഷ്ട്രീയമായി സര്‍ക്കാരിനും സി.പി.എമ്മിനും വലിയ നേട്ടമായിരുന്നു.

എന്നാല്‍ കേന്ദ്രസര്‍ക്കാര്‍ അത് ചവറ്റുകുട്ടേല്‍ എറിഞ്ഞതോടെ തിരിച്ചടിയായി. എന്നാല്‍ ബി.ജെ.പിക്കും ആര്‍.എസ്.എസിനും തന്ത്രിക്കും വലിയ നേട്ടവുമായി. മണ്ഡലകാലം ആരംഭിക്കാനിരിക്കെ ശ്രീധരന്‍പിള്ള നടത്തുന്ന രഥയാത്രയ്ക്കും ഇത് വലിയ ഊര്‍ജ്ജം നല്‍കും.