ശബരിമലയില്‍ പാതിരാത്രി നാമജപക്കാര്‍ക്കെതിരെ കൂട്ട നടപടി സ്വീകരിച്ചതോടെ ഭക്തരുടെ വികാരം ഏറ്റെടുത്ത് ദേശീയ ശ്രദ്ധ നേടാന്‍ ബിജെപി. ഒരു പ്രകോപനവും ഇല്ലാതിരുന്നിട്ടും നാമജപം മാത്രം നടത്തിയിട്ടും പോലീസ് 72 പേരെ അറസ്റ്റ് ചെയ്തതില്‍ വ്യാപക പ്രതിഷേധമാണുണ്ടാക്കിയത്. ഇതോടെ അയോധ്യ മാതൃകയില്‍ ശബരിമല വിഷയവും ദേശീയതലത്തില്‍ ഏറ്റെടുക്കാനാണു ബി.ജെ.പി. കേന്ദ്രനേതൃത്വത്തിന്റെ നീക്കം.

ശബരിമലയെ രാഷ്ട്രീയായുധമാക്കാന്‍ ബി.ജെ.പി. ദേശീയനേതൃത്വം കേരളത്തിലേക്ക്. പ്രധാനമന്ത്രി നരേന്ദ്ര മോഡിയും ബി.ജെ.പി. ദേശീയാധ്യക്ഷന്‍ അമിത് ഷായും ഉടന്‍ ശബരിമലയിലെത്തുമെന്നു സൂചന. ശബരിമല യുവതീപ്രവേശനത്തിനെതിരായ സമരം ദേശീയശ്രദ്ധ ആകര്‍ഷിച്ച പശ്ചാത്തലത്തിലാണിത്. അയോധ്യ മാതൃകയില്‍ ശബരിമല വിഷയവും ദേശീയതലത്തില്‍ ഏറ്റെടുക്കാനാണു ബി.ജെ.പി. കേന്ദ്രനേതൃത്വത്തിന്റെ നീക്കം.

മോഡിയുടെയും ഷായുടെയും സന്ദര്‍ശനത്തിനു മുന്നോടിയായാണ് കേന്ദ്രമന്ത്രി അല്‍ഫോണ്‍സ് കണ്ണന്താനം ഇന്നു ശബരിമലയിലെത്തിയത്. പ്രധാനമന്ത്രിയെ ഈ മണ്ഡല മകരവിളക്ക് കാലത്തുതന്നെ ശബരിമലയില്‍ എത്തിക്കാനുള്ള നീക്കമാണു ബി.ജെ.പി. നടത്തുന്നത്. 

സുരക്ഷാ പ്രശ്‌നങ്ങള്‍ മുന്‍നിര്‍ത്തി, മുമ്പൊരിക്കല്‍ മോഡി ശബരിമല ദര്‍ശനം ഉപേക്ഷിച്ചിരുന്നു. ശബരിമലയെച്ചൊല്ലി സംസ്ഥാനത്തു ഹൈന്ദവ ഏകീകരണം ഉണ്ടായിട്ടുണ്ടെന്ന വിലയിരുത്തലില്‍, എന്‍.ഡി.എ. പുനഃസംഘടിപ്പിക്കാന്‍കൂടിയാണ് അമിത് ഷാ എത്തുന്നത്. മോഡിയുടെയും ഷായുടെയും സന്ദര്‍ശനത്തിനു മുന്നോടിയായി ബി.ജെ.പി. ദേശീയനേതാക്കള്‍ ഓരോരുത്തരായി ശബരിമലയിലെത്തും. 

ശബരിമലയില്‍ ഇടപെടണമെന്നാവശ്യപ്പെട്ടു ബി.ജെ.പി. സംസ്ഥാനഘടകം കേന്ദ്ര ആഭ്യന്തരവകുപ്പിനും പാര്‍ട്ടി ദേശീയനേതൃത്വത്തിനും കത്ത് നല്‍കി. എന്നാല്‍, മന്ത്രി അല്‍ഫോന്‍സ് കണ്ണന്താനം നല്‍കുന്ന പ്രാഥമിക റിപ്പോര്‍ട്ടിന്റെ അടിസ്ഥാനത്തിലാകും കേന്ദ്ര ഇടപെടല്‍. ശബരിമലയിലെ പോലീസ് നിയന്ത്രണങ്ങള്‍ നീക്കണമെന്നാവശ്യപ്പെട്ടു ഹൈക്കോടതിയേയും ബി.ജെ.പി. സമീപിക്കും. ഇതേ ആവശ്യമുന്നയിച്ച് ശബരിമല കര്‍മസമിതി ഗവര്‍ണര്‍ പി. സദാശിവത്തിനു നിവേദനം നല്‍കിയതായും സൂചനയുണ്ട്.