കൊല്‍ക്കത്തയിലെ നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തില്‍ പാര്‍ക്ക് ചെയ്തിരുന്ന ഇന്‍ഡിഗോ വിമാനത്തില്‍ ശക്തമായ ഇടിമിന്നലേറ്റു. സംഭവത്തില്‍ യാത്രക്കാര്‍ക്ക് പരിക്കുകളില്ല. കൊല്‍ക്കത്തയില്‍ നിന്നും ത്രിപുര തലസ്ഥാനമായ അഗര്‍ത്തലയിലേക്ക് പുറപ്പെടാനിരുന്ന വിമാനത്തിലാണ് മിന്നലേറ്റത്. വെള്ളിയാഴ്ച രാവിലെ കൊല്‍ക്കത്തയിലും പരിസര പ്രദേശങ്ങളിലും അനുഭവപ്പെട്ട കനത്ത ഇടിമിന്നലോടുകൂടിയ മഴയ്ക്കിടെയാണ് ഈ അപകടമുണ്ടായത്. എയര്‍പോര്‍ട്ട് അതോറിറ്റി ഓഫ് ഇന്ത്യഅധികൃതര്‍ അറിയിച്ചതനുസരിച്ച് വിമാനത്തിലുണ്ടായിരുന്ന യാത്രക്കാരും ജീവനക്കാരും പൂര്‍ണ്ണ സുരക്ഷിതരാണ്. വെള്ളിയാഴ്ച രാവിലെ കൊല്‍ക്കത്തയില്‍ കനത്ത ഇടിമിന്നലും മഴയും തുടരുന്ന സാഹചര്യത്തില്‍ എയര്‍പോര്‍ട്ട് ഓപ്പറേഷന്‍സ് കണ്‍ട്രോള്‍ സെന്റര്‍ മുന്‍കൂട്ടി കാലാവസ്ഥാ മുന്നറിയിപ്പുകള്‍ നല്‍കിയിരുന്നു.

രാവിലെ ഏകദേശം 9:25 ഓടെ വിമാനം വിമാനത്താവളത്തിലെ 56എല്‍ എന്ന ഏയറോബ്രിഡ്ജിന് സമീപം യാത്രക്കാരുമായി പുറപ്പെടാന്‍ മിനിറ്റുകള്‍ മാത്രം ബാക്കിനില്‍ക്കെയാണ് മിന്നലേറ്റത്. 6ഇ6068 എയര്‍ബസ് എ320 വിമാനത്തില്‍ ആ സമയത്ത് 141 യാത്രക്കാരും ആറ് ജീവനക്കാരുമടക്കം ആകെ 147 പേര്‍ ഉണ്ടായിരുന്നു. മിന്നലേറ്റതിനെ തുടര്‍ന്ന് വിമാനത്തിന്റെ പവര്‍ സിസ്റ്റത്തില്‍ തകരാര്‍ സംഭവിക്കുകയും പെട്ടെന്ന് തന്നെ വൈദ്യുതി ബന്ധം പൂര്‍ണ്ണമായും നിലയ്ക്കുകയും ചെയ്തു. അപകടത്തെ തുടര്‍ന്ന് സുരക്ഷാ മുന്‍കരുതലുകളുടെ ഭാഗമായി വിമാനത്തിലുണ്ടായിരുന്ന മുഴുവന്‍ യാത്രക്കാരെയും സുരക്ഷിതമായി താഴെയിറക്കി. വിമാനം കൂടുതല്‍ സുരക്ഷാ പരിശോധനകള്‍ക്കായി ഗ്രൗണ്ട് ചെയ്യുകയും ചെയ്തു. തുടര്‍ന്ന് ഇന്‍ഡിഗോ എയര്‍ലൈന്‍സ് യാത്രക്കാര്‍ക്കായി മറ്റൊരു വിമാനം സജ്ജീകരിക്കുകയും ഉച്ചയ്ക്ക് 12:50 ഓടെ ഈ ബദല്‍ വിമാനത്തില്‍ യാത്രക്കാരെ അഗര്‍ത്തലയിലേക്ക് എത്തിക്കുകയും ചെയ്തു.

വിമാനത്തിനുള്ളില്‍ ആര്‍ക്കും പരിക്കേറ്റിട്ടില്ലെങ്കിലും, മിന്നല്‍ ഏല്‍ക്കുന്ന സമയത്ത് വിമാനത്തിന് പുറത്ത് റണ്‍വേയില്‍ ജോലി ചെയ്തിരുന്ന രണ്ട് ഗ്രൗണ്ട് സ്റ്റാഫ് അംഗങ്ങള്‍ക്ക് ചെറിയ രീതിയില്‍ അസ്വസ്ഥതകള്‍ അനുഭവപ്പെട്ടു. ഉടന്‍ തന്നെ ഇവരെ വൈദ്യപരിശോധനകള്‍ക്കായി സമീപത്തെ ആശുപത്രിയിലേക്ക് മാറ്റിയെങ്കിലും പ്രാഥമിക ചികിത്സയ്ക്ക് ശേഷം ഇവര്‍ പൂര്‍ണ്ണ ആരോഗ്യവാന്‍മാരാണെന്ന് ഡോക്ടര്‍മാര്‍ സ്ഥിരീകരിക്കുകയും ഡിസ്ചാര്‍ജ് ചെയ്യുകയും ചെയ്തു.