ശബരിമല ദർശനത്തിനെത്തിയ കേന്ദ്രമന്ത്രി പൊന്‍ രാധാകൃഷ്ണനോട് അപമര്യാദയായി പെരുമാറിയെന്നാരോപിച്ച് എസ്പി യതീഷ് ചന്ദ്രയ്ക്കെതിരെ പരാതിയുമായി ബിജെപി സംസ്ഥാന അധ്യക്ഷന്‍ പി.എസ്. ശ്രീധരന്‍ പിള്ള രംഗത്തെത്തിയിരിക്കുകയാണ്. എസ്പിയ്ക്കെതിരായ പരാതി ശ്രീധരന്‍ പിള്ള കേന്ദ്ര പഴ്‌സനല്‍ മന്ത്രാലയത്തിന് നൽകി.

ബുധനാഴ്ച ശബരിമല സന്ദര്‍ശനത്തിന് മന്ത്രിയെത്തിയപ്പോഴായിരുന്നു സംഭവങ്ങളുടെ തുടക്കം. സ്വകാര്യവാഹനങ്ങള്‍ നിലയ്ക്കലില്‍ നിന്ന് പമ്പയിലേക്ക് എന്തുകൊണ്ടു കടത്തിവിടുന്നില്ലയെന്ന് മന്ത്രി ചോദിച്ചപ്പോള്‍ ഗതാഗതക്കുരുക്കിന്റെ ഉത്തരവാദിത്തം താങ്കള്‍ ഏറ്റെടുക്കുമോ എന്ന് എസ്പി യതീഷ് ചന്ദ്ര മറുപടി പറയുകയും ഇരുവരും തമ്മില്‍ വാക്ക് തര്‍ക്കം ഉണ്ടാകുകയും ചെയ്‌തിരുന്നു. ഇതേത്തുടർന്നായിരുന്നു എസ്പിയ്ക്കെതിരെ ബിജെപി നേതാക്കൾ തിരിഞ്ഞത്.

അതേസമയം മന്ത്രിയോടൊപ്പമുണ്ടായിരുന്ന എ.എന്‍ രാധാകൃഷ്ണന്‍ യതീഷ് ചന്ദ്രയ്ക്കെതിരെ കേന്ദ്ര ആഭ്യന്തര മന്ത്രാലയത്തിനു പരാതി നല്‍കുമെന്ന് അറിയിച്ചിട്ടുണ്ട്.