മലയാളത്തില്‍ റിപ്പീറ്റ് വാല്യൂവുള്ള റോംകോം ചിത്രങ്ങളിലൂടെ പ്രേക്ഷകര്‍ക്കിടയില്‍ വലിയ സ്വാധീനം സൃഷ്ടിച്ചെടുത്ത നിവിന്റേതായി തിയേറ്ററുകളിലെത്തിയ ഏറ്റവും പുതിയ ചിത്രമാണ് ഗിരീഷ് എ.ഡി സംവിധാനം ചെയ്ത ബെത്‌ലഹേം കുടുംബ യൂണിറ്റ്. മമിത ബൈജു, സംഗീത് പ്രതാപ്, സുരേഷ് കൃഷ്ണ, വിനയ് ഫോര്‍ട്ട്, റോഷന്‍ ഷാനവാസ് തുടങ്ങി വമ്പന്‍ താരനിര അണിനിരന്ന ചിത്രത്തിന് മികച്ച പ്രതികരണം ലഭിച്ചതോടെ വന്‍ കളക്ഷനുമായി ബോക്‌സ് ഓഫീസില്‍ മുന്നേറുകയാണ്.

ഇപ്പോഴിതാ, സിനിമാ വിശേഷങ്ങളും വ്യക്തിജീവിതവും പങ്കുവെച്ച് നടന്‍ നിവിന്‍ പോളി നടത്തിയ അഭിമുഖം സോഷ്യല്‍ മീഡിയയില്‍ വൈറലാകുന്നു. മാധ്യമപ്രവര്‍ത്തക രേഖ മേനോന്‍ അവതരിപ്പിക്കുന്ന 'എഫ് ടി ക്യൂ വിത്ത് രേഖ മേനോന്‍' എന്ന പരിപാടിയിലാണ് താരം മനസ്സ് തുറന്നത്. തന്റെ സിനിമകളെക്കുറിച്ചും കുടുംബത്തെക്കുറിച്ചും നിലവിലെ ലുക്കിനെക്കുറിച്ചും താരം രസകരമായി സംസാരിച്ചു. പഠന കാര്യത്തില്‍ താന്‍ ഇടപെടാറില്ലെന്നും മക്കളുടെ എല്ലാ കാര്യവും നോക്കുന്നത് ഭാര്യയാണെന്നും നിവിന്‍ പറയുന്നു. പിള്ളേരുടെ എല്ലാ കാര്യവും നോക്കുന്നത് റിന്നയാണ്.

എല്ലാ ക്രെഡിറ്റും ഞാന്‍ കൊടുക്കുന്നതും റിന്നയ്ക്ക് തന്നെയാണ്. ഞാന്‍ ഷൂട്ട് കഴിഞ്ഞ് വരുമ്പോള്‍ അവര്‍ക്കൊപ്പം എഞ്ചോയ് ചെയ്യാന്‍ വേണ്ടി ഇരിക്കുകയാണല്ലോ. എന്ന് കരുതി എന്ത് തോന്നിവാസം കാണിച്ചാലും സമ്മതം കൊടുക്കില്ല. ഒരു ലൈന്‍ നമ്മളും വരച്ചിട്ടുണ്ടാകുമല്ലോ. അതിന് അപ്പുറത്തേക്ക് പോയാല്‍ സ്ട്രിക്ടാകും. ഇപ്പുറത്താണെങ്കില്‍ പോട്ടെ സാരമില്ലെന്ന് കരുതും. അവരില്‍ നിന്നും എന്തെങ്കിലും പഠിക്കാന്‍ തോന്നിയിട്ടുണ്ടോയെന്ന് ചോദിച്ചാല്‍… ഇപ്പോഴത്തെ ജനറേഷന്‍ നമ്മള്‍ വളര്‍ന്നത് പോലെയല്ലോ വളരുന്നത്. അവര്‍ വളരെ ഓപ്പണാണ്… ഫ്രീയാണ്. ഓപ്പണായി സംസാരിക്കും. നുണ പറയാന്‍ ഇഷ്ടപ്പെടുന്നില്ല. ചിലപ്പോള്‍ ഞങ്ങള്‍ പറയും ടീച്ചറിനോട് നാളെ വരില്ലെന്ന് പറയൂവെന്ന്. നമ്മള്‍ ഇങ്ങനെ പോവുകയാണെന്ന് പറയൂ എന്നൊക്കെ. മക്കള്‍ പക്ഷെ സമ്മതിക്കില്ല. ഇല്ല നുണ പറയേണ്ട കാര്യമില്ലെന്ന് അവര്‍ പറയും. അപ്പോള്‍ ടീച്ചറിനോട് എന്ത് പറയുമെന്ന് ചോദിക്കുമ്പോള്‍ അത് യു ഗയ്‌സ് മാനേജ് എന്നാണ് മക്കളുടെ മറുപടി. അത് നിങ്ങള്‍ മാനേജ് ചെയ്‌തോളൂ. നിങ്ങള്‍ രക്ഷിതാക്കളാണല്ലോ. ഞാന്‍ എന്തിനാണ് നുണ പറയുന്നത്?. ഞാന്‍ നുണ പറയില്ല. സ്‌കൂളില്‍ പോകാന്‍ ലേറ്റായപ്പോള്‍ പലപ്പോഴായി അത് സംഭവിച്ചു.

എന്ത് കാരണം അധ്യാപകരോട് പറയുമെന്ന് ചോദിച്ചപ്പോള്‍ എന്താണോ സംഭവിച്ചത് അത് പറഞ്ഞോളാം എന്നായിരുന്നു മക്കളുടെ മറുപടി. അതൊക്കെ കേട്ടപ്പോള്‍ നൈസ് പരിപാടിയാണ്. വാല്യൂസ് കാത്ത് സൂക്ഷിക്കുന്നുണ്ടെന്ന് മനസിലായി. മക്കളുടെ പഠനത്തിലൊന്നും ഞാന്‍ ശ്രദ്ധിക്കാറില്ല. കാരണം അതില്‍ ഞാന്‍ മികച്ച ഒരാളല്ലല്ലോ. ചില സമയത്ത് റിന്ന വന്ന് ഹിന്ദി പഠിപ്പിക്കാനൊക്കെ പറയും.

ഞാന്‍ പഠിപ്പിച്ച് തുടങ്ങുമ്പോള്‍ റിന്ന തന്നെ ബുക്ക് എടുത്തിട്ട് പോകും. ഞാന്‍ തന്നെ പഠിപ്പിക്കുന്നതാകും നല്ലതെന്ന് അവള്‍ പറയും എന്നും നിവിന്‍ പോളി പറയുന്നു. ലോകേഷ് കനകരാജിന്റെ സിനിമാറ്റിക് യൂണിവേഴ്‌സിലൊരുങ്ങുന്ന 'ബെന്‍സ്' എന്ന തമിഴ് ചിത്രത്തില്‍ 'ട്വിന്‍ ഫിഷ് വാള്‍ട്ടര്‍' എന്ന വില്ലന്‍ കഥാപാത്രത്തെയാണ് നിവിന്‍ അവതരിപ്പിക്കുന്നത്. ചിത്ര കരാര്‍ അനുസരിച്ച് താടി മാറ്റാന്‍ കഴിയാത്ത അവസ്ഥയിലാണ് താനെന്നും അണിയറപ്രവര്‍ത്തകരെ വിളിച്ച് മടുത്തുവെന്നും നിവിന്‍ പറഞ്ഞു. 'ഈ അഭിമുഖം കണ്ടിട്ടെങ്കിലും സിനിമ പൂര്‍ത്തിയാക്കി തരു എന്ന് കരുതുന്നു' എന്ന് താരം ചിരിയോടെ വ്യക്തമാക്കി.