ബിജെപിക്ക് പിന്തുണയുമായി പി സി ജോർജ് മാത്രമല്ല കൂടുതൽ ആളുകൾ വരുമെന്ന് ബിജെപി സംസ്ഥാന അധ്യക്ഷൻ പി .എസ് ശ്രീധരൻ പിള്ള .ന്യൂനപക്ഷങ്ങളെ സി.പി.ഐ.എം ഭയാശങ്കയിലാക്കുന്ന സാഹചര്യത്തിലാണ് കൂടുതല്‍ സഖ്യമുണ്ടാകുന്നതെന്ന് അദ്ദേഹം പറഞ്ഞു.

ക്രിസ്ത്യന്‍ സമൂഹവുമായി അടുത്തിഴപഴകാന്‍ പറ്റുന്ന സാഹചര്യം അടുത്ത ആഴ്ചയോടെ ഉരുത്തിരിയും. നിയമസഭയില്‍ പി.സി ജോര്‍ജ്ജ് സഹകരിക്കാന്‍ തീരുമാനിച്ചത് ചര്‍ച്ചയുടെ അടിസ്ഥാനത്തിലാണ്. തിരഞ്ഞെടുപ്പ് സഖ്യമുള്‍പ്പെടെയുള്ള കാര്യങ്ങളില്‍ കൂടുതല്‍ ചര്‍ച്ചകള്‍ ആവശ്യമുണ്ടെന്നും ശ്രീധരൻ പിള്ള പറഞ്ഞു .

പി.സി ജോര്‍ജ്ജുമായുള്ള സഹകരണം കൂടുതല്‍ ഊര്‍ജ്ജം പകരുമെന്നും എന്‍ ഡിഎക്ക് അനുകൂലമാണ് സാഹചര്യങ്ങളെന്നും ശ്രീധരന്‍ പിള്ള വ്യക്തമാക്കി.

രണ്ട് ലക്ഷത്തിലധികം വോട്ട് ലഭിച്ച ഏഴ് പാര്‍ലമെന്റ് മണ്ഡലങ്ങളില്‍ ന്യൂനപക്ഷങ്ങളുമായുള്ള സഹകരണങ്ങള്‍ ഗുണം ചെയ്യുമെന്ന് പി.എസ് ശ്രീധരൻ പിള്ള പറഞ്ഞു. ശബരിമല വിഷയത്തില്‍ കുപ്രചരണങ്ങള്‍ കൊണ്ട് ന്യൂനപക്ഷങ്ങളുടെ മനസില്‍ ഉയര്‍ത്തിയ ഭയാശങ്കയെ അതിജീവിക്കാന്‍ ഈ സഹകരണം സഹായകമാകും.

 നിയമസഭയില്‍ ഒ.രാജഗോപാലിനൊപ്പം പ്രത്യേക ബ്ലോക്കായി ഇരിക്കാനാണ് തീരുമാനമെന്ന് പി.സി ജോര്‍ജ് കഴിഞ്ഞ ദിവസം പറഞ്ഞിരുന്നു. എല്ലാ പാര്‍ട്ടികളുമായി സഖ്യത്തിനായി ശ്രമിച്ചെന്നും പ്രതികരിച്ചത് ബി.ജെ.പി മാത്രമാണെന്നും പി.സി ജോര്‍ജ് പറഞ്ഞിരുന്നു.

പി.സി.ജോര്‍ജിന്റെ പാര്‍ട്ടിയായ ജനപക്ഷം ഇടതുപക്ഷവുമായുള്ള പ്രാദേശികമായ ബന്ധം അവസാനിപ്പിച്ചതിനു തൊട്ടുപിന്നാലെയാണ് ബി.ജെ.പിയുമായി സഭയിലും സഹകരിക്കാന്‍ ധാരണയായത്. പി.എസ്. ശ്രീധരന്‍ പിള്ളയുമായി പി.സി. ജോര്‍ജ് ഇത് സംബന്ധിച്ച് ചര്‍ച്ച നടത്തിയിരുന്നു.

അതേസമയം ശബരിമല വിഷയത്തില്‍ പ്രതിഷേധിച്ച് നിയമസഭ സമ്മേളനത്തില്‍ കറുപ്പുടുത്തായിരുന്നു പി.സി ജോര്‍ജ് എം.എല്‍.എ പങ്കെടുത്തത്. ഭക്തര്‍ക്ക് പിന്തുണയുമായിട്ടാണ് കറുപ്പുടുത്തതെന്നാണ് പി.സി ജോര്‍ജ് പറഞ്ഞത്. ഇപ്പോള്‍ ഏറ്റവും കൂടുതല്‍ വേദന അനുഭവിക്കുന്നത് ഹൈന്ദവ സമൂഹമാണ് അവര്‍ക്കുള്ള പ്രതിബന്ധതയാണ് ഇപ്പോഴുള്ള വേഷം എന്നായിരുന്നു പി.സി ജോര്‍ജിന്റെ പ്രതികരണം.