ശബരിമല വിഷയത്തിൽ ബി.ജെ.പി സമരത്തില്‍ നിന്ന് പിന്മാറുന്നു എന്ന ആരോപണത്തില്‍ അടിസ്ഥാനമില്ലെന്ന് ബിജെപി സംസ്ഥാന അധ്യക്ഷൻ പി.എസ്.ശ്രീധരൻ പിള്ള. ശബരിമല വിഷയത്തിൽ ബിജെപി നടത്തുന്ന സമരങ്ങൾക്ക് സ്വീകര്യതയുണ്ടെന്നതിന് തെളിവാണ് പി.സി.ജോർജ് അടക്കമുള്ളവരുടെ കടന്നുവരവെന്ന് ശ്രീധരൻ പിള്ള പറഞ്ഞു.

ശബരിമലയെ തകർക്കാനുള്ള ഗൂഢാലോചനയുടെ ഭാഗമാണ് കെ.സുരേന്ദ്രനെ പോലെയുള്ളവരെ കള്ളക്കേസിൽ കുടുക്കുന്നത്. സർക്കാരിന്റെ ഇത്തരത്തിലുള്ള നിലപാടുകൾക്ക് മുന്നിൽ മുട്ട് മടക്കാൻ ഉദ്ദേശിക്കുന്നില്ല. സുരേന്ദ്രന്റെ പേരിലുള്ള കള്ളക്കേസുകൾ പിൻവലിക്കണം.

ശബരിമലയില്‍ കര്‍മസമിതിയാണ് സമരം നടത്തുന്നത്. ആ സമരപരിപാടിയ്ക്ക് കലവറയില്ലാത്ത പിന്തുണയാണ് ബി.ജെ.പി നല്‍കുന്നത്. തങ്ങളുടെ നിലപാട് അത് തന്നെയാണ്. ശബരിമല പൂങ്കാവനത്തിനകത്ത് ഒരു സമരവും ബി.ജെ.പി നടത്തിയിട്ടില്ല. എല്ലാം പുറത്താണ് നടത്തിയതെന്നും അദ്ദേഹം പറഞ്ഞു.
വിഷയത്തില്‍ 41 ഹിന്ദു സംഘടനകള്‍ ഒന്നായിട്ടാണ് പ്രക്ഷോഭം നടത്തിയത്. ബിജെപി ഇവരുടെ സമരത്തിന് പിന്തുണ നല്‍കുകയായിരുന്നു. സമരം നിര്‍ത്തണമോ എന്ന കാര്യം സംഘടനകളുമായി കൂടിയാലോചിച്ച്‌ തീരുമാനിക്കുമെന്നും അദ്ദേഹം പറഞ്ഞു. ശബരിമല വിഷയത്തില്‍ ഹൈക്കോടതിയുടെ ഇടപെടല്‍ നല്ല രീതിയില്‍ ഉണ്ടായിട്ടുണ്ട്. കേന്ദ്ര നേതൃത്വവുമായി ആലോചിച്ച്‌ ഭാവി പരിപാടികള്‍ തീരുമാനിക്കുമെന്നും അദ്ദേഹം വ്യക്തമാക്കി.