ശബരിമലയിലേക്ക് പ്രവേശിക്കാൻ ശ്രമിച്ച യുവതിയെ സന്നിധാനത്തുണ്ടായിരുന്ന ഭക്തരുടെ പ്രതിഷേധത്തെ തുടർന്ന് തിരിച്ചിറക്കി. ഉച്ചയോടെയാണ് ഇവരെ പമ്പയിൽ നിന്നും സന്നിധാനത്തേക്കുള്ള പാതയിൽ കണ്ടെത്തിയത്. ഭർത്താവിനും അച്ഛനുമൊപ്പം ശബരിമല ദർശനത്തിനെത്തിയ ആന്ധ്ര സ്വദേശിയായ 26കാരിയെ ഭക്​തർ മരക്കൂട്ടത്ത്​ വെച്ച്​ തടഞ്ഞത്. ഗുണ്ടൂർ സ്വദേശി ​നവോദയാമ്മയാണ്​ ശബരിമല ദർശനത്തിനെത്തിയത്​.

ഇവർ എങ്ങനെയാണ് പന്പയിലൂടെ കയറിപ്പോയതെന്ന് പോലീസിന് ഒരു വിവരവുമില്ല. സന്നിധാനത്തേക്ക് കയറിപ്പോകുന്ന എല്ലാവരെയും പോലീസ് പരിശോധിക്കുന്നുണ്ട്. ഇതിനായി പമ്പയിൽ 1,800 ഓളം പോലീസുകാർ നിലയുറപ്പിച്ചിട്ടുണ്ട്. ഇവരുടെ കണ്ണുവെട്ടിച്ച് ഇവർ കയറിപ്പോയതാണോ എന്ന് വ്യക്തമായിട്ടില്ല.

മറ്റേതെങ്കിലും വഴിയിലൂടെയാണോ ഇവർ ശബരിമല വഴയിൽ എത്തിയതെന്നും പോലീസ് പരിശോധിക്കുന്നുണ്ട്. യുവതിയെ കണ്ടതോടെ സന്നിധാനത്തേക്കുള്ള വഴിയിലുണ്ടായിരുന്ന തീർഥാടകരിൽ ചിലർ ഇവരെ തടഞ്ഞു. പിന്നീട് പോലീസുകാർ ഇവരെ പമ്പയിലെ സ്റ്റേഷനിലേക്ക് മാറ്റി. ഇവരോട് പോലീസ് കാര്യങ്ങൾ ചോദിച്ചറിയാൻ ശ്രമം തുടങ്ങിയിട്ടുണ്ട്.

അതേ സമയം ആചാരങ്ങൾ അറിയാതെയാണ് യുവതി മലകയറാൻ എത്തിയതെന്നും റിപ്പോർട്ടുകൾ ഉണ്ട്.