ഡച്ച്പടയുടെ തുടർച്ചയായ കുതിപ്പിന് വിരാമമിട്ട് അർജന്റീന വനിതാ ലോകഹോക്കി കിരീടം തിരിച്ചുപിടിക്കുകയായിരുന്നു. കഴിഞ്ഞ ലോകകപ്പ് ഫൈനലിലേറ്റ തോൽവിക്കുള്ള മധുരപ്രതികാരം കൂടിയായി അവർക്ക് ഈ ജയം.

2021 ഒളിമ്പിക്‌സ് ഫൈനൽ, 2024 ഒളിമ്പിക്‌സ് സെമി എന്നിവയിലും നെതർലൻഡ്‌സിനോടാണ് അർജന്റീന പരാജയപ്പെട്ടത്. ഫൈനലിലെ പെനാൽറ്റി ഷൂട്ടൗട്ടിലാണ് അർജന്റീന നെതർലൻഡ്‌സിനെ മറികടന്ന് ലോകകിരീടം സ്വന്തമാക്കിയത്. സ്‌കോർ:3-1.

നിശ്ചിതസമയത്ത് ഇരു ടീമുകളും ഓരോ ഗോളടിച്ച് സമനില പാലിച്ചതിനെ തുടർന്നാണ് ഷൂട്ടൗട്ട് വേണ്ടിവന്നത്. മുപ്പതാം മിനിറ്റിൽ യിബ്ബി യാൻസെന്റെ ഗോളിൽ നെതർലൻഡ്‌സാണ് ആദ്യം ലീഡ് നേടിയത്. ഒന്നാന്തരമൊരു പെനാൽറ്റി കോർണറാണ് യാൻസെൻ വലയിലാക്കിയത്. യാൻസെന്റെ ഈ ലോകകപ്പിലെ എട്ടാം ഗോളായിരുന്നു ഇത്. അമ്പത്തിനാലാം മിനിറ്റിൽ ക്യാപ്റ്റൻ മരിയോ ഗ്രാനറ്റോ അർജന്റീനയെ ഒപ്പമെത്തിച്ചു. എട്ട് പെനാൽറ്റി കോർണറുകൾ പാഴാക്കിയശേഷമായിരുന്നു അർജന്റീന ലക്ഷ്യം കണ്ടത്.