നിരവധി സിനിമകളിലൂടെയും സീരിയലുകളിലൂടെയും പ്രസിദ്ധയായ ബാലതാരം അക്ഷര കിഷോറിന്റെ ചിത്രം ഉപയോഗിച്ചാണ് ശബരിമലയുമായി ബന്ധപ്പെട്ട പുതിയ വ്യാജ പ്രചാരണം. ശരണം വിളിച്ചതിന് അയ്യപ്പഭക്തയെ അറസ്റ്റ് ചെയ്തു എന്നാണ് പ്രചരിപ്പിക്കുന്നത്.

കറുപ്പുടുത്ത് മാലയിട്ട് നില്‍ക്കുന്ന അക്ഷരയുടെ ചിത്രമാണ് പ്രചാരണത്തിന് ഉപയോഗിക്കുന്നത്. സംഘപരിവാര്‍ അനുകൂല പ്രൊഫൈലുകളിലും ഗ്രൂപ്പുകളിലൂമാണ് ഈ പ്രചാരണം പരക്കുന്നത്. ശബരിമലയുമായി ബന്ധപ്പെട്ട ഭക്തിഗാനത്തിന്റെ ചിത്രീകരണത്തിനിടെ പകര്‍ത്തിയ ചിത്രമാണ് ഇത്തരത്തില്‍ വ്യാജമായി പ്രചരിപ്പിക്കുന്നത്. നേരത്തെ അയ്യപ്പഭക്തനെ പോലീസ് ആക്രമിക്കുന്നു എന്ന തരത്തില്‍, ഫോട്ടോഷൂട്ടിന്റെ ചിത്രം ഉപയോഗിച്ചും ഇത്തരത്തില്‍ പ്രാചരണം നടത്തിയിരുന്നു. ബിജെപി നേതാക്കളടക്കം ഈ ചിത്രം പങ്കുവെച്ചിരുന്നു.

ശബരിമല ക്ഷേത്രത്തില്‍ ശരണം വിളിച്ചതിന്റെ പേരില്‍ അയ്യപ്പഭക്തയായ പെണ്‍കുട്ടിയെ കമ്മ്യൂണിസ്‌റ്‌റ് സര്‍ക്കാരിന്റെ ഗുണ്ടാപ്പോലീസ് അറസ്റ്റ് ചെയ്തു എന്നും പെണ്‍കുട്ടി ഇപ്പോള്‍ തിരുനെല്‍വേലി പോലീസ് സ്‌റ്റേഷനിലാണ് ഉളളതെന്നും ചിത്രത്തിനൊപ്പം പ്രചരിപ്പിക്കുന്നു. പ്രധാനമായും കേരളത്തിന് പുറത്താണ് ഈ പ്രചാരണം കൊഴുക്കുന്നത്. 

ശബരിമല പോലെ മലയാളികള്‍ ഏറെ വൈകാരികമായി കാണുന്ന വിഷയത്തില്‍ കുപ്രചരണങ്ങളില്‍ വീഴുക എളുപ്പമാണ്. വ്യാജ പ്രചാരണവും ഫോട്ടോഷോപ്പ് പ്രചാരണവും നടത്തുന്നതില്‍ കുപ്രസിദ്ധി നേടിയിട്ടുണ്ട് സംഘപരിവാര്‍ എല്ലായ്‌പ്പോഴും. ശബരിമല വിഷയത്തിലും കേരളം അത് കണ്ടു. ശബരിമലയില്‍ ഭക്തരെ അടിച്ചമര്‍ത്തുന്നു എന്ന തരത്തില്‍ ദേശീയ തലത്തില്‍ പോലും സംഘപരിവാര്‍ കേന്ദ്രങ്ങള്‍ വലിയ തോതിലാണ് പ്രചാരണം അഴിച്ച്‌ വിട്ടത്.

സര്‍ക്കാര്‍ ഹിന്ദുക്കളെ വേട്ടയാടുന്നു എന്നുള്ള നിലവിളികള്‍ ശബരിമല വിഷയം വന്നതോടെ കേരളത്തില്‍ വല്ലാതെ ഉയര്‍ന്ന് കേള്‍ക്കുന്നുണ്ട്. ശക്തമായ പോലീസ് നടപടികളുടെ ഫലമായി ആറിത്തണുത്ത ശബരിമല സമരം വീണ്ടും ചൂട് പിടിപ്പിക്കുകയാണ് ബിജെപി. അതിനിടെ വ്യാജപ്രചാരണങ്ങളും സംഘപരിവാര്‍ അഴിച്ച് വിടുകയാണ്.