സാംസ്കാരിക തലസ്ഥാനത്തെ ജനസാഗരമാക്കി മാറ്റിയ തൃശൂർ പുലിക്കളി മഹോത്സവം 2026-ന്റെ മത്സരഫലങ്ങൾ പ്രഖ്യാപിച്ചു. വാശിയേറിയ മത്സരത്തിനൊടുവിൽ പ്രധാന വിഭാഗമായ മികച്ച പുലിക്കളി സംഘമായി അയ്യന്തോൾ ദേശം പുലിക്കളി സംഘാടക സമിതി ഒന്നാം സ്ഥാനം കരസ്ഥമാക്കി.

ഒളരിക്കര ദേശം പുലിക്കളി സംഘം രണ്ടാം സ്ഥാനവും, വിയ്യൂർ യുവജനസംഘം പുലിക്കളി സമിതി മൂന്നാം സ്ഥാനവും നേടി. മികച്ച പുലിക്കളി സംഘത്തിന് പുറമെ പുലിക്കൊട്ട്, പുലിവര, പുലിവേഷം, അച്ചടക്കം എന്നീ പ്രധാന വിഭാഗങ്ങളിലെല്ലാം ഒന്നാം സ്ഥാനം സ്വന്തമാക്കി അയ്യന്തോൾ ദേശം തങ്ങളുടെ ആധിപത്യം ഉറപ്പിക്കുകയായിരുന്നു.

സമകാലിക വിഷയങ്ങളെ ആസ്പദമാക്കിയുള്ള ടാബ്ലോ വിഭാഗത്തിൽ കാനാട്ടുകര ദേശം ഒന്നാം സ്ഥാനം നേടി. സീതാറാം മിൽ ദേശം രണ്ടാം സ്ഥാനവും, ഒളരിക്കര ദേശം മൂന്നാം സ്ഥാനവും സ്വന്തമാക്കി. പുരാണ വിഭാഗം ടാബ്ലോ മത്സരത്തിൽ സീതാറാം മിൽ ദേശം പുലിക്കളി സംഘാടക സമിതിക്കാണ് ഒന്നാം സ്ഥാനം. കുട്ടൻകുളങ്ങര പുലിക്കളി സംഘം രണ്ടാം സ്ഥാനവും ചക്കാമുക്ക് ദേശം മൂന്നാം സ്ഥാനവും നേടുകയുണ്ടായി.