മുതിര്‍ന്ന കോണ്‍ഗ്രസ് നേതാവ് വിജയന്‍തോമസ് ബിജെപിയിലേക്കെന്ന് സൂചന. ശബരിമല വിഷയത്തിലെ നിലപാടിൽ പ്രതിഷേധിച്ച് ജി.രാമൻപിള്ള കോൺഗ്രസ് ബന്ധം അവസാനിപ്പിച്ച് ബി.ജെ.പിയിലെത്തിയിരുന്നു അതിനു പിന്നാലെയാണ് വിജയന്‍തോമസ് ബിജെപിയിലേക്കെത്തുന്നതരത്തിലുള്ള വാർത്തകൾ പുറത്തുവരുന്നത്.

നിലവില്‍ കെപിസിസി സംസ്ഥാന സമിതി അംഗം കൂടിയാണ് വിജയന്‍തോമസ്. സംസ്ഥാന നേതാക്കളുമായി ചര്‍ച്ചകള്‍ പൂര്‍ത്തിയായെങ്കിലും ബിജെപി ദേശീയ അദ്ധ്യക്ഷന്‍ അമിത്ഷാ അടുത്ത തവണ കേരളത്തിലെത്തിയാല്‍ ഔദ്യോഗികമായി അംഗത്വം സ്വീകരിച്ച് അദ്ദേഹം ബിജെപിയിലേക്കെത്തുമെന്നാണ് സൂചന. ബി.ജെ.പിയിലേക്ക് മറ്റ് പാർട്ടികളിൽ നിന്നും കൂടുതൽ നേതാക്കന്മാർ എത്തുമെന്ന് പാർട്ടി പ്രസിഡന്റ് പി.എസ്.ശ്രീധരൻപിള്ള കഴിഞ്ഞ ദിവസവും അവകാശപ്പെട്ടിരുന്നു.

കോൺഗ്രസ് നിയന്ത്രണത്തിലുള്ള ജയ്‌ഹിന്ദ് ടിവിയുടെ ചുമതലയുണ്ടായിരുന്ന വിജയൻ തോമസ് ബി.ജെ.പിയിൽ ചേരുമെന്ന് കഴിഞ്ഞ വർഷം മുതൽ തന്നെ അഭ്യൂഹങ്ങൾ പ്രചരിച്ചിരുന്നു. സേവാഭാരതിയുടെ പരിപാടിയിൽ പങ്കെടുത്ത് പ്രധാനമന്ത്രി നരേന്ദ്ര മോദിയെ പുകഴ്‌ത്തി സംസാരിച്ചതിന് കോൺഗ്രസ് പാർട്ടി തലത്തിൽ വിജയനെതിരെ അച്ചടക്ക നടപടി സ്വീകരിച്ചിരുന്നു. ഇതിന് പിന്നാലെ ബി.ജെ.പി അനുകൂല ടെലിവിഷൻ ചാനലിന് നൽകിയ അഭിമുഖവും കോൺഗ്രസിൽ ചർച്ചക്ക് വഴിവച്ചിരുന്നു.

അതേസമയം വിജയന്‍തോമസിനി കഴിഞ്ഞ ദിവസം കണ്ടിരുന്നെന്നും പാർട്ടി മാറ്റത്തെപറ്റി ഒന്നും തന്നെ ചർച്ച ചെയ്തില്ല എന്നും കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ വ്യക്തമാക്കി.

ശബരിമല സമരവുമായി ബന്ധപ്പെട്ട് ബിജെപി വേദിയിൽ എത്തിയതിന്റെ പേരിൽ വിമർശനം നേരിടേണ്ടി വന്ന രാമൻ നായർ പാർട്ടിയിൽ നിന്നും സസ്‌പെന്റ് ചെയ്യപ്പെട്ടിരുന്നു. ശബരിമല വിഷയത്തിൽ ബിജെപി എടുത്ത നിലപാടാണ് ശരിയെന്നും അതിനൊപ്പം നിൽക്കുന്നെന്നും മായിരുന്നു അദ്ദേഹത്തിന്റെ നിലപാട്. ശബരിമല വിഷയത്തിൽ ബിജെപിയുമായി ചേർന്ന് പ്രവർത്തിച്ചതിന്റെ പേരിൽ രാമൻ നായർ നടപടി നേരിട്ടിരുന്നു.