കെ.എ.എസിലെ സംവരണ നിഷേധം സംബന്ധിച്ച ടി.എ അഹമ്മദ് കബീറിന്റെ ശ്രദ്ധ ക്ഷണിക്കലിന് നിയമസഭയില്‍ മറുപടി നല്‍കവേ, തസ്തികമാറ്റത്തിന് സംവരണവ്യവസ്ഥ ബാധകമല്ലെന്ന് മുഖ്യമന്ത്രി പിണറായി വിജയന്‍ വ്യക്തമാക്കി.

കേരള അഡ്മിനിസ്‌ട്രേറ്റീവ് സര്‍വ്വീസ് ചട്ടങ്ങള്‍ അനുസരിച്ച് നേരിട്ടും തസ്തിക മാറ്റം മുഖേനയും മാത്രമാണ് നിയമനം നടക്കുക. നേരിട്ടുള്ള നിയമനങ്ങള്‍ക്ക് പൊതു സംവരണ തത്ത്വങ്ങള്‍ ബാധകമാണ്. എന്നാല്‍ പി.എസ്.സി വഴി തസ്തികമാറ്റ നിയമനം നടത്തുന്ന വിവിധ വകുപ്പുകളുടെ മാതൃകയിലാണ് കെ.എ.എസിലെ തസ്തികമാറ്റ നിയമനവും ചിട്ടപ്പെടുത്തിയിരിക്കുന്നത്. അതിനാല്‍ ഇവിടെ സംവരണം ബാധകമല്ലെന്ന് മുഖ്യമന്ത്രി വ്യക്തമാക്കി.

തസ്തിക മാറ്റപ്രകാരമുള്ള നിയമനങ്ങളിലും സംവരണം വേണമെന്ന പട്ടികജാതിപട്ടികവര്‍ഗക്ഷേമ കമ്മീഷന്റേയും സംസ്ഥാന ന്യൂനപക്ഷ കമ്മീഷന്റേയും നിര്‍ദേശം അഡ്വക്കേറ്റ് ജനറലിന്റെ നിയമോപദേശത്തെ തുടര്‍ന്ന്, നടപ്പിലാക്കേണ്ടെന്ന് തീരുമാനിച്ചിട്ടുണ്ടെന്നും മുഖ്യമന്ത്രി സഭയില്‍ അറിയിച്ചു. അതേസമയം, എസ്.സി-എസ്.ടി വിഭാഗങ്ങള്‍ക്ക് പ്രാതിനിധ്യത്തില്‍ കുറവുണ്ടെങ്കില്‍ അത് നികത്തുന്നതിന് സ്‌പെഷ്യല്‍ റിക്രൂട്ട്‌മെന്റ് നടത്താന്‍ നിലവില്‍ സംവിധാനമുണ്ട്. ഇത് കെ.എ.എസിനും ബാധകമാണെന്നും അദ്ദേഹം പറഞ്ഞു.

സുപ്രീം കോടതി വിധിയും കേന്ദ്ര സര്‍ക്കാറിന്റെ കത്തും സ്ഥാനക്കയറ്റത്തെ കുറിച്ചാണ്. കേന്ദ്ര സര്‍ക്കാറിലെ ഉദ്യോഗക്കയറ്റങ്ങള്‍ക്ക് സിവില്‍ അപ്പീലിന്മേലുള്ള വ്യവഹാരങ്ങള്‍ തടസ്സമല്ലെന്നും നിയമപ്രകാരമുള്ള സ്ഥാനക്കയറ്റം നല്‍കാമെന്നുമാണ് സുപ്രീംകോടതി ഉത്തരവ്. നിയമനങ്ങളില്‍ സംവരണം ഏര്‍പ്പെടുത്തുന്നത് സംബന്ധിച്ച് പേഴ്‌സണല്‍ മന്ത്രാലയത്തിന്റെ കത്തില്‍ പരാമര്‍ശിച്ചിട്ടില്ലെന്നും മുഖ്യമന്ത്രി അറിയിച്ചു.

സംവരണ നിഷേധം പുനഃപരിശോധിച്ച് എല്ലാ ധാരകളിലും സംവരണം നല്‍കണമെന്നും തസ്തികമാറ്റത്തിന് സംവരണം വേണ്ടെന്ന എ.ജിയുടെ നിയമോപദേശം തള്ളിക്കളയണമെന്നും ടി.എ അഹമ്മദ് കബീര്‍ പറഞ്ഞു.