സ്ത്രീ ശാക്തീകരണ ഭാഗമായി മനുഷ്യാവകാശ ദിനത്തില് 'സധൈര്യം മുന്നോട്ട്' അനന്തപുരിയിൽ; മുഖ്യമന്ത്രി പിണറായി വിജയന് ഉദ്ഘാടനം ചെയ്യുന്ന പരിപാടിയിൽ ആയിരങ്ങൾ അണിനിരക്കും
സ്ത്രീ ശാക്തീകരണ പരിപാടിയുടെ ഭാഗമായി ഡിസംബര് 10 മനുഷ്യാവകാശ ദിനത്തില് സെന്ട്രല് സ്റ്റേഡിയത്തില് സംഘടിപ്പിക്കുന്ന 'സധൈര്യം മുന്നോട്ട്' മുഖ്യമന്ത്രി പിണറായി വിജയന് ഉദ്ഘാടനം ചെയ്യുന്നു. സംസ്ഥാനത്തിന്റെ വിവിധ സ്ഥലങ്ങളിലെ വിവിധ വിഭാഗങ്ങളില്പ്പെട്ട ആയിരക്കണക്കിന് വനിതകളെ ഉള്പ്പെടുത്തിയാണ് പരിപാടി സംഘടിപ്പിക്കുന്നത്. ആരോഗ്യ സാമൂഹ്യനീതി വനിത ശിശു വികസന വകുപ്പ് മന്ത്രി കെ.കെ. ശൈലജ ടീച്ചറുടെ നേതൃത്വത്തില് സെക്രട്ടറിയേറ്റില് കൂടിയ വനിത ശിശുവികസന വകുപ്പ് ഉദ്യോഗസ്ഥരുടേയും വിവിധ വനിതാ സംഘടനകളുടേയും യോഗത്തിലാണ് തീരുമാനം. ഡിസംബര് 10 മുതല് വനിത ദിനമായ മാര്ച്ച് 8 വരെ നീളുന്ന വിപുലമായ ക്യാമ്പയിനുകളാണ് എല്ലാ ജില്ലകളിലും ക്യാമ്പസുകളിലുമായി നടത്തുന്നത്. ഈ വിഷയത്തെ ആസ്പദമാക്കി, പോസ്റ്റര് രചന മത്സരം, പോസ്റ്റര് പ്രദര്ശനം, ഷോര്ട്ട് ഫിലിം നിര്മ്മാണം, കലാ സൃഷ്ടികളുടെ അവതരണം, ഓപ്പണ് ഫോറം, സിമ്പോസിയം എന്നീ പരിപാടികളാണ് സംഘടിപ്പിക്കുന്നത്.
സ്ത്രീ ശാക്തീകരണവുമായി ബന്ധപ്പെട്ട വിവിധ പ്രവര്ത്തനങ്ങളാണ് സധൈര്യം മുന്നോട്ട് പരിപാടിയില് ഉള്പ്പെടുത്തി നടപ്പിലാക്കാന് ഉദ്ദേശിച്ചിട്ടുള്ളതെന്ന് മന്ത്രി കെ.കെ. ശൈലജ ടീച്ചര് പറഞ്ഞു. ഒരുവശത്ത് ആര്ത്തവത്തിന്റെ പേരില് മാറ്റിനിര്ത്തപ്പെടുന്ന സ്ത്രീകള്, മറുവശത്ത് അത്തരം മാറ്റിനിര്ത്തല് സ്വാഭാവികമാണെന്ന് കരുതുന്ന സ്ത്രീകളും പുരുഷന്മാരും. ഈയൊരു വിചിത്ര വാദത്തിനെതിരെ പുരോഗമന സമൂഹം ശക്തമായി ഒന്നിച്ച് രംഗത്ത് വരേണ്ടതുണ്ട്. സ്ത്രീ ശരീരം അശുദ്ധമല്ലെന്നും ആര്ത്തവം ഏറ്റവും പാവനമായ ഒരു ജൈവ സവിശേഷതയാണെന്നും മനുഷ്യവര്ഗത്തിന്റെ നിലനില്പ്പ് തന്നെ സ്ത്രീകളിലെ സവിശേഷമായ ഈ പ്രതിഭാസത്തെ ആശ്രയിച്ചാണ് നില്ക്കുന്നത് എന്ന് സമൂഹത്തെ ഒരിക്കല്കൂടി ബോധ്യപ്പെടുത്തേണ്ടതായിട്ടുണ്ട്. പൊതുകാര്യങ്ങളില് സ്വതന്ത്രമായി അഭിപ്രായം പ്രകടിപ്പിക്കാനും വിശ്വാസങ്ങള് സൂക്ഷിക്കാനും ഒക്കെയുള്ള സ്വാതന്ത്ര്യം നഷ്ടപ്പെടുന്ന ഘട്ടമാണ് വന്നുകൊണ്ടിരിക്കുന്നത്. അതിനാലാണ് 'സ്ത്രീ-ആര്ത്തവം-പൗരാവകാശം' എന്ന വിഷയത്തില് ക്യാമ്പയിന് നടത്താന് സ്തീകളുടെ ഉന്നമനത്തിനായി നിലകൊള്ളുന്ന വനിത ശിശുവികസന വകുപ്പ് തീരുമാനിച്ചതെന്നും മന്ത്രി പറഞ്ഞു.
വനിത ശിശു വികസന വകുപ്പ് സെക്രട്ടറി (ഇന് ചാര്ജ്) ഡോ. ഷര്മിള മേരി ജോസഫ്, ഡയറക്ടര് ഷീബ ജോര്ജ്, നിര്ഭയ സെല് സ്റ്റേറ്റ് കണ്വീനര് നിശാന്തിനി, ജെന്ഡര് അഡൈ്വസര് ടി.കെ. ആനന്ദി, വനിതാ സംഘടനാ പ്രതിനിധികള്, യൂണിവേഴ്സിറ്റി യൂണിയന് ചെയര്മാന്മാര് എന്നിവര് യോഗത്തില് പങ്കെടുത്തു.
https://www.facebook.com/Malayalivartha
