ശബരിമല വിഷയത്തിൽ കേന്ദ്ര സർക്കാർ ഇടപെടണം എന്നാവശ്യപ്പെട്ട് ഡിസംബർ 10 ന് ട്രെയിൻ തടയൽ സമരം. ശബരിമല സംരക്ഷണ സമിതിയാണ് സമരത്തിന് ആഹ്വനം ചെയ്തിരിക്കുന്നത്

ശബരിമല സംരക്ഷണ സമിതിയും അന്താരാഷ്‌ട്ര ഹിന്ദു പരിഷത്തും സംയുക്തമായാണ് പ്രക്ഷോഭം മുന്നോട്ട് കൊണ്ടുപോകാൻ തീരുമാനിച്ചിട്ടുള്ളത് എന്നാണു അറിഞ്ഞത്‌. തിങ്കളാഴ്ച ഉച്ചക്ക് 12 മണിക്ക് എറണാകുളം സൗത്ത് റെയിൽവേ സ്റ്റേഷനിൽ ആണ് ട്രെയിൻ തടയുന്നത്

ശബരിമല സംരക്ഷണ സമിതിയുടെ പത്രക്കുറിപ്പിലാണ് ഇക്കാര്യം വ്യക്തമാക്കിയിട്ടുള്ളത് .പത്രക്കുറിപ്പിന്റെ പൂർണ രൂപം ഇങ്ങനെ

ശബരിമല ആചാര അനുഷ്ഠാനങ്ങൾക്കെതിരെയുള്ള ഗൂഢാലോചന തുടരുകയാണ് . കോടതി വിധിയെ ധൃതി പിടിച്ചു നടപ്പിലാക്കുന്നതിലൂടെ സംസ്ഥാന സർക്കാരും ഈ വിഷയത്തിൽ പ്രതിബദ്ധതയില്ലാത്ത കേന്ദ്ര സർക്കാരും നിലവിൽ വന്നിരിക്കുന്ന സാഹചര്യമാണ് ഇപ്പോൾ ഉള്ളത്. അതുകൊണ്ട് ഹിന്ദു സമൂഹത്തിന്റെ വോട്ട് വാങ്ങി ഹിന്ദു സമൂഹത്തിന്റെ താൽപ്പര്യങ്ങൾ സംരക്ഷിക്കുമെന്ന് പ്രഖ്യാപിച്ചു അധികാരത്തിലെത്തിയ കേന്ദ്ര സർക്കാർ ശബരിമല വിഷയത്തിൽ വ്യക്തമായ നിലപാട് എടുക്കേണ്ട സമയമാണ് ഇത്

ഏതാണ്ട് അയ്യായിരത്തിൽ അധികം അയ്യപ്പ ഭക്തരെ ജയിലിൽ അടയ്ക്കുകയും കേസിൽ പ്രതിയാക്കുകയും ചെയ്തു. ഇന്നും ശബരിമലയിൽ ആചാര ലംഘനം നടക്കുമോ എന്ന ഭീതിയിലാണ് കേരളത്തിലെ ഹിന്ദു സമൂഹവും അയ്യപ്പ ഭക്തരും കഴിയുന്നത് .ഈ ആശങ്ക ദൂരീകരിക്കേണ്ടത് കേന്ദ്ര സർക്കാരിന്റെയും സംസ്ഥാന സർക്കാരിന്റെയും ഉത്തരവാദിത്തമാണ്. എന്നാൽ ഹിന്ദു വിരുദ്ധ നിലപാടാണ് സംസ്ഥാന സർക്കാർ എടുത്തിരിക്കുന്നത്. ഈ അവസരത്തിൽ പ്രത്യേക നിയമനിർമ്മാണം നടത്തി ശബരിമലയിലെ ആചാര സംരക്ഷണം നടത്തുന്നതിന് കേന്ദ്ര സർക്കാർ തയ്യാറാകണമെന്ന് ആവശ്യപ്പെട്ടുകൊണ്ട് ശബരിമല സംരക്ഷണ സമിതി അടുത്ത ഘട്ട പ്രക്ഷോഭത്തിലേക്ക് കടക്കുകയാണ്.
അതിന്റെ ഭാഗമായി തിങ്കളാഴ്ച 10 -12 -2018 ന് 12 പിഎം ന് എറണാകുളം സൗത്ത് റെയിൽവേ സ്റ്റേഷനിൽ വെച്ചു ട്രെയിൻ തടഞ്ഞുകൊണ്ട് പ്രതിഷേധത്തിന് തുടക്കം കുറിക്കുകയാണ്. കേന്ദ്ര സർക്കാർ എത്രയും പെട്ടെന്ന് നിയമ നിർമ്മാണം നടത്തി ശബരിമലയുടെ ആചാര സംരക്ഷണം ഉറപ്പു വരുത്തണം എന്നാവശ്യപ്പെട്ടുകൊണ്ട് ട്രെയിൻ തടയൽ സമരത്തിന് തുടക്കം കുറിക്കുകയാണ്

ഈ ആവശ്യം അംഗീകരിച്ചുള്ള സമരത്തിൽ ശബരിമല സംരക്ഷണ സമിതിയും അന്താരാഷ്‌ട്ര ഹിന്ദു പരിഷത്തും സംയുക്തമായിട്ടാണ് പ്രക്ഷോഭം മുന്നോട്ട് കൊണ്ടുപോകാൻ തീരുമാനിച്ചിട്ടുള്ളത്. ഇതിൽ എല്ലാ രാഷ്ട്രീയ ജാതി ഭേദമെന്യേ മുഴുവൻ ഹിന്ദു സമൂഹത്തിന്റെയും സഹകരണം അഭ്യർത്ഥിക്കുന്നു