വരാനിരിക്കുന്ന ലോക്‌സഭാ തിരഞ്ഞെടുപ്പിന്റെ സെമി ഫൈനലെന്ന് വിശേഷിപ്പിക്കുന്ന നിയമസഭാ തിരഞ്ഞെടുപ്പിലെ ആദ്യ ഫലസൂചനകള്‍ പുറത്ത് വരുമ്പോൾ പലയിടങ്ങളിലും കോണ്‍ഗ്രസിന് അനുകൂലമായ തരംഗം.

അഞ്ച് സംസ്ഥാനങ്ങളിലെ തിരഞ്ഞെടുപ്പ് ഫലം പുറത്തുവരുന്ന ഇന്ന് കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധിക്ക് മികച്ച വിജയം അനിവാര്യമാണ്. ബി.ജെ.പി വിരുദ്ധ പ്രതിപക്ഷ മുന്നണിയില്‍ അണിനിരന്ന കക്ഷികളുടെ വിശ്വാസം നേടാന്‍ അത് കൂടിയേ തീരൂ. കോണ്‍ഗ്രസില്‍ വിശ്വാസമില്ലാതെ സമാജ്‌വാദി, ബി.എസ്.പി കക്ഷികള്‍ പ്രതിപക്ഷ കൂട്ടായ്മയില്‍ ചേരാതെ നില്‍ക്കുന്ന സാഹചര്യത്തില്‍ പ്രത്യേകിച്ചും. അതേസമയം, കഴിഞ്ഞ നാലു വര്‍ഷവും തിരഞ്ഞെടുപ്പ് ജയങ്ങള്‍ സ്വന്തമാക്കിയ നരേന്ദ്രമോദി - അമിത് ഷാ കൂട്ടുകെട്ടിന് ഇന്ന് അഗ്നി
പരീക്ഷയാണ്. മദ്ധ്യപ്രദേശും ഛത്തീസ്ഗഡും ഇവരെ ഇകൈവിടുകയാണെങ്കിൽ ഇരുവര്‍ക്കും അത് വലിയ ക്ഷീണമാകും

മദ്ധ്യപ്രദേശില്‍ ശിവ്‌രാജ് സിംഗ് ചൗഹാന്റെയും ഛത്തീസ്ഗഡില്‍ രമണ്‍ സിംഗിന്റെയും ജനപ്രീതിയില്‍ നാലാം തവണയും ബി.ജെ.പിക്ക് ജയം സുനിശ്‌ചിതമെന്ന് കരുതിയിടത്താണ് വോട്ടെടുപ്പിലേക്ക് അടുത്തപ്പോള്‍ കാര്യങ്ങള്‍ മാറി മറിഞ്ഞത്. വിലക്കയറ്റം, നോട്ട് പിൻവലിക്കൽ, ജി.എസ്.ടി., കാർഷികമേഖലയിലെ പ്രതിസന്ധി, ആൾക്കൂട്ടക്കൊല തുടങ്ങിയവ മുതലാക്കി കോണ്‍ഗ്രസ് നല്ല മുന്നേറ്റം നടത്തിയെന്നാണ് സൂചന. ഭരണത്തുടര്‍ച്ചയുണ്ടായാലും ഭൂരിപക്ഷം കുറയുമെന്ന കാര്യത്തില്‍ ബി.ജെ.പി നേതാക്കള്‍ക്കു പോലും സംശയമില്ല.

അഞ്ചു വര്‍ഷത്തില്‍ കൂടുതല്‍ ആരെയും തുണയ്‌ക്കാത്ത രാജസ്ഥാനില്‍ കോണ്‍ഗ്രസ് പ്രതീക്ഷയിലാണ്. മുഖ്യമന്ത്രിക്കസേരയില്‍ അശോക് ഗെലോട്ട്, സച്ചിന്‍ പൈലറ്റ് എന്നിവരില്‍ ഊന്നിയുള്ള ചര്‍ച്ചകളും സജീവമായി. എന്നാല്‍ ഭരണവിരുദ്ധ വികാരം അതിജീവിച്ച്‌ വസുന്ധര രാജെ അധികാരം നിലനിറുത്തുമെന്ന് ബി.ജെ.പി വിശ്വസിക്കുന്നു.

അധികാരത്തുടര്‍ച്ച ഉറപ്പിച്ച്‌ ഒരു വര്‍ഷം നേരത്തേ മന്ത്രിസഭ പിരിച്ചുവിട്ട ചന്ദ്രശേഖര റാവുവിന് കോണ്‍ഗ്രസും ടി.ഡി.പിയും ചേര്‍ന്ന പ്രജാകൂട്ടമി കടുത്ത വെല്ലുവിളിയാണുയര്‍ത്തിയത്. എങ്കിലും അസദുദ്ദീന്‍ ഒാവൈസിയുടെ എ.ഐ.എം.ഐ.എമ്മിന്റെ സഹാത്തോടെ റാവു ഭരണം നിലനിറുത്തുമെന്നാണ് സൂചന.

മിസോറമില്‍ മിസോ നാഷണല്‍ ഫ്രണ്ട്, 2008 മുതല്‍ ഭരിക്കുന്ന ലാല്‍ത്തന്‍വ്‌ലയെ താഴെയിറക്കി കോണ്‍ഗ്രസിന്റെ വടക്കു കിഴക്കന്‍ സംസ്ഥാനങ്ങളിലെ അവശേഷിക്കുന്ന ഭരണവും ഇല്ലാതാക്കുമെന്നും എക്‌സിറ്റ് ഫലങ്ങള്‍ പറയുന്നു.

മധ്യപ്രദേശ് :

ആകെ സീറ്റ്: 230 (കേവല ഭൂരിപക്ഷം:116)

2013: ബി.ജെ.പി:165, കോണ്‍ഗ്രസ്: 58, ബി.എസ്.പി 3

രാജസ്ഥാൻ

ആകെ സീറ്റ്: 200 (പോളിംഗ് നടന്നത് 199) കേവല ഭൂരിപക്ഷം: 100

2013: ബി.ജെ.പി: 163, കോണ്‍ഗ്രസ്: 21

തെലങ്കാന

തെലുങ്കാന:ആകെ സീറ്റ് 119 (കേവല ഭൂരിപക്ഷം: 60)

2014: ടി.ആര്‍.എസ്: 63, കോണ്‍: 21, ടി.ഡി.പി: 15, ബി.ജെ.പി:5

മിസോറാം

ആകെ സീറ്റ്: 40 കേവല ഭൂരിപക്ഷം: 21

2013: കോണ്‍: 34, എം.എന്‍.എഫ്: 5

ഛത്തീസ്ഗഡ്

ആകെ സീറ്റ് 90 (കേവലഭൂരിപക്ഷം: 46)

2013ല്‍ ബി.ജെ.പി: 49, കോണ്‍ഗ്രസ്: 39

2014 ലോക്‌സഭയില്‍

ബി.ജെ.പി

മദ്ധ്യപ്രദേശ്: 27

രാജസ്ഥാന്‍: 25

ഛത്തീസ്ഗഡ്: 10

തെലുങ്കാന: 1

മിസോറം: 0

കോണ്‍ഗ്രസ്

മദ്ധ്യപ്രദേശ്: 2

രാജസ്ഥാന്‍: 0

ഛത്തീസ്ഗഡ്: 1

തെലങ്കാന: 2

മിസോറം: 1