ശബരിമല വിഷയത്തില് നിയമസഭാ കവാടത്തില് സത്യഗ്രഹം നടത്തുന്ന എം.എല്.എമാരുടെ സമരം ഒത്തുതീര്പ്പാക്കാന് സര്ക്കാര് ഇടപെടണമെന്നാവശ്യപ്പെട്ട് പ്രതിപക്ഷം സഭയുടെ നടുത്തളത്തിലേക്ക്... നിയമസഭ ഇന്നും പിരിഞ്ഞു
ശബരിമല വിഷയത്തില് നിയമസഭാ കവാടത്തില് സത്യഗ്രഹം നടത്തുന്ന എം.എല്.എമാരുടെ സമരം ഒത്തുതീര്പ്പാക്കാന് സര്ക്കാര് ഇടപെടണമെന്നാവശ്യപ്പെട്ട് പ്രതിപക്ഷം സഭയുടെ നടുത്തളത്തിലേക്ക് ഇറങ്ങിയതോടെ നിയമസഭ ഇന്നും പിരിഞ്ഞു.
ചോദ്യോത്തര വേളയില് തന്നെ പ്രതിപക്ഷം ബാനറുകളുമായി നിയമസഭയുടെ നടുത്തളത്തില് ഇറങ്ങി മുദ്രാവാക്യം വിളിച്ചു. തുടര്ന്ന് സ്പീക്കര് ചോദ്യോത്തര വേള റദ്ദാക്കി. പ്രതിപക്ഷത്തിന്റെ സമീപനം നിര്ഭാഗ്യകരമെന്ന് സ്പീക്കര് വിശദമാക്കി. എല്ലാ ദിവസവും ഒരേ വിഷയത്തില് ഇങ്ങനെ ബഹളമുണ്ടാക്കുന്നത് ശരിയല്ലെന്നും സ്പീക്കര് പറഞ്ഞു.
പ്രതിപക്ഷം ഒന്നുകില് സഭാനടപടികളോട് സഹകരിക്കണം അല്ലെങ്കില് സഭ ബഹിഷ്കരിക്കണമെന്ന് അദ്ദേഹം ആവശ്യപ്പെട്ടു. ചോദ്യങ്ങള് ഉന്നയിക്കാനുള്ള അംഗങ്ങളുടെ അവകാശം നിഷേധിക്കുന്നത് ശരിയല്ലെന്ന് സ്പീക്കര് വ്യക്തമാക്കി. പതിവുപോലെ ബാനറുകളുമായി ഡയസിന് മുന്നിലെത്തിയ പ്രതിപക്ഷം സ്പീക്കറുടെ കാഴ്ച മറച്ച് മുദ്രാവാക്യം വിളിച്ചു.
പ്രതിപക്ഷ ബഹളം രൂക്ഷമായതോടെ നടപടി ക്രമങ്ങള് പൂര്ത്തിയാക്കി സഭ ഇന്നത്തേക്ക് പിരിഞ്ഞതായി സ്പീക്കര് അറിയിച്ചു.
https://www.facebook.com/Malayalivartha