ശബരിമലയില് ഭക്തര്ക്ക് സുഗമമായി ദര്ശനം നടത്താനുള്ള സംവിധാനം ഒരുക്കാന് ചുമതലപ്പെടുത്തിയ പൊലീസുകാര് തന്നെ ആചാരലംഘനം നടത്തി, ഭക്തര് പ്രതിഷേധിച്ചതോടെ ആചാരലംഘനം നടത്തിയ പൊലീസുകാര്ക്കെതിരെ നടപടിയെടുക്കാമെന്ന് സന്നിധാനത്തിന്റെ ചുമതലയുള്ള സ്പെഷ്യല് ഓഫീസര് ജി. ജയദേവ്
ശബരിമലയില് ഭക്തര്ക്ക് സുഗമമായി ദര്ശനം നടത്താനുള്ള സംവിധാനം ഒരുക്കാന് ചുമതലപ്പെടുത്തിയ പൊലീസുകാര് തന്നെ ആചാരലംഘനം നടത്തി. ഇതിനെതിരെ ഭക്തര് പ്രതിഷേധിച്ചതോടെ ആചാരലംഘനം നടത്തിയ പൊലീസുകാര്ക്കെതിരെ നടപടിയെടുക്കാമെന്ന് സന്നിധാനത്തിന്റെ ചുമതലയുള്ള സ്പെഷ്യല് ഓഫീസര് ജി. ജയദേവ് ഉറപ്പ് നല്കിയതോടെ ഭക്തര് പിരിഞ്ഞ് പോയി. ദര്ശനത്തിനെത്തിയ നാല് ട്രാന്സ് ജെന്ഡേഴ്സിന് സുരക്ഷയൊരുക്കാന് കൂടെ പോയ പൊലീസുകാരാണ് ആചാരലംഘനം നടത്തിയത്. മാണികപ്പുറം ക്ഷേത്രത്തിന്റെ തിരുമുറ്റത്ത് പൊലീസുകാര് ബൂട്ട് അഴിക്കാതെ കയറിയതാണ് വിവാദമായത്. ഇത് മനപ്പൂര്വമാണോ, അറിയാതെയാണോ എന്ന് സ്ഥിരീകരിച്ചിട്ടില്ല. സംഗതി ശ്രദ്ധയില്പ്പെട്ട ഭക്തര് എതിര്പ്പുമായി സംഘടിച്ചതോടെ പൊലീസുകാര് ബൂട്ടഴിച്ചു.
ഉടന് തന്നെ സ്പെഷ്യല് ഓഫീസര് ജി.ജയദേവ് സ്ഥലത്തെത്തി ഭക്തരുമായി സംസാരിച്ചു. ആചാരംലംഘിച്ച പൊലീസുകാര്ക്കെതിരെ നടപടി സ്വീകരിക്കുമെന്ന് ഉറപ്പും നല്കി. എല്ലാക്കൊല്ലവും അയ്യപ്പഭക്തരായി തന്നെയാണ് പൊലീസുകാര് ശബരിമലയില് ഡ്യൂട്ടി ചെയ്തിരുന്നത്. എന്നാല് ഇത്തവണത്തെ പ്രത്യേകസാഹചര്യത്തില് ഡി.ജി.പി ലോക്നാഥ് ബഹ്റ അതിന് മാറ്റം വരുത്തി. പൊലീസുകാര് ബെല്റ്റ് ധരിക്കണമെന്നും ബൂട്ട്സ് ധരിക്കണമെന്നും സംഘര്ഷസാധ്യത കണക്കിലെടുത്ത് ഷീല്ഡ് കരുതിയിരിക്കണമെന്നും ഡി.ജി.പി നിര്ദ്ദേശിച്ചിരുന്നു. അത് തുടക്കത്തിലേ വലിയ വിവാദമായിരുന്നു. മുമ്പ് സന്നിധാനത്ത് ഡ്യൂട്ടിയിലുള്ള പൊലീസുകാര് താടിപോലും വടിക്കില്ലായിരുന്നു. ഇത്തവണ അയ്യപ്പസൗഹൃദ പൊലീസ് എന്ന സംവിധാനം സര്ക്കാര് ഇല്ലാതാക്കിയെന്ന് വ്യാപകമായ ആരോപണം ഉയര്ന്നിരുന്നു.
ദര്ശനത്തിനെത്തിയ കേന്ദ്രമന്ത്രി പൊന്രാധാകൃഷ്ണനോട് പരുഷമായി പെരുമാറിയ എസ്.പി യതീഷ് ചന്ദ്രയ്ക്കെതിരെയും വ്യാപകപ്രതിഷേധമാണ് ബി.ജെ.പിയും ആര്.എസ്.എസും നടത്തിയത്. അന്ന് തന്നെ പൊന്രാധാകൃഷ്ണന്റെ കൂടെ വന്ന സ്വകാര്യവാഹനം എസ്.പി ഹരിശങ്കര് തടഞ്ഞതും വിവാദമായിരുന്നു. എന്നാല് മന്ത്രിയുടെ വാഹനം കടന്ന് പോയി ഏഴ് മിനിറ്റ് കഴിഞ്ഞാണ് സ്വകാര്യവാഹനം വന്നത്. അതിനാലാണ് തടഞ്ഞതെന്ന് എസ്.പി വിശദീകരിച്ചെങ്കിലും മന്ത്രിയുടെ കൂടെയുണ്ടായിരുന്ന ബി.ജെ.പി സംസ്ഥാന ജനറല്സെക്രട്ടറി എ.എന് രാധാകൃഷ്ണന് എസ്.പിയോട് തട്ടിക്കയറി. കെ.സുരേന്ദ്രനെ യതീഷ് ചന്ദ്ര അറസ്റ്റ് ചെയ്തപ്പോഴും പൊലീസിനെതിരെ വ്യാപകമായ പ്രതിഷേധം ഉണ്ടായിരുന്നു.
ഹിന്ദുഐക്യവേദി സംസ്ഥാന അധ്യക്ഷ കെ.പി ശശികലയോടും മക്കളോടും പരുഷമായി പെരുമാറിയ എസ്.പി യതീഷ് ചന്ദ്രയ്ക്കെതിരെ മകന് മാനനഷ്ടക്കേസ് ഫയല് ചെയ്തിരിക്കുകയാണ്. പൊലീസിനെതിരെ ബി.ജെ.പിയും പ്രതിപക്ഷവും നിരവധി വിമര്ശനങ്ങള് ഉന്നയിച്ചിട്ടും അവരെ സംരക്ഷിക്കുകയും ആദരിക്കുകയും ചെയ്യുന്ന നിലപാടാണ് സര്ക്കാര് സ്വീകരിച്ചത്.
https://www.facebook.com/Malayalivartha