യുവതി പ്രവേശനം അനുവദിച്ചു കൊണ്ടുള്ള സുപ്രീംകോടതി വിധി വന്നതോടെ പ്രതിഷേധവുമായി നിരവധി പേർ നിരത്തുകളിലിറങ്ങിയിരുന്നു. ഒട്ടുമിക്ക പ്രശ്നങ്ങളും കെട്ടടങ്ങിയതോടെ വിവാദ പരാമർശവുമായി വൈദ്യുതി വകുപ്പ്​ മന്ത്രി എം.എം. മണി രംഗത്തെത്തിയിരിക്കുകയാണ്.

ശബരിമലയിൽ യുവതികൾ കയറിയിട്ടുണ്ടെന്നും യുവതികൾ ശബരിമലയിൽ പോയിട്ടില്ലെന്ന്​ കരുതിയിരിക്കുകയാണോ എന്നും സ്​ത്രീകൾ പോയിട്ടില്ലെന്നും ആരാധന നടത്തിയിട്ടില്ലെന്നും​ സർക്കാർ ഇതുവരെ പറഞ്ഞിട്ടുണ്ടോ എന്നും അദ്ദേഹം ചോദിച്ചു.

എന്നാൽ ഔദ്യോഗിക പ്രഖ്യാപനമാണോ ഇതെന്ന ചോദ്യത്തിന് "പിന്നെ, യുവതികൾ കയറിയില്ല എന്ന് വിചാരിച്ച് ഇരിക്കുവാണോ,​ നിങ്ങൾ ഏത് ലോകത്താണ്" എന്നാണ് അദ്ദേഹം മറു ചോദ്യം ഉന്നയിച്ചത്. കോതമംഗലത്ത് വച്ച് മാദ്ധ്യമങ്ങളുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം.

ഞങ്ങൾക്ക് വേണമെങ്കിൽ ഒരു ലക്ഷം യുവതികളെ ശബരിമലയിൽ കയറ്റാനുള്ള കെൽപ്പുണ്ട്. ഒരുത്തനും അത് തടയാൻ ഒന്നും വരില്ല. പക്ഷെ അതൊന്നും ഞങ്ങളുടെ പരിപാടിയല്ല. പോകുന്നവർക്ക് സംരക്ഷണം നൽകും. കോടതി പറഞ്ഞത് ആരാധന നടത്താൻ ആഗ്രഹിക്കുന്ന സ്ത്രീകൾക്ക് ശബരിമലയിൽ കയറാമെന്നാണ്. അല്ലാതെ പോയില്ലെങ്കിൽ ശിക്ഷിക്കുമെന്നല്ലെന്നും എം.എം.മണി പറയുന്നു.