ഇത് ഭക്ത വിജയം. മനിതി സംഘടനയില്‍ പെട്ട വിശ്വാസികള്‍ തോറ്റു മടങ്ങുന്നത് കേരളത്തിന് ആശ്വാസമാകുന്നു. ഇന്നു രാവിലെ മുതല്‍ പമ്പയിലരങ്ങേറിയ നാടക സംഭവ വികാസങ്ങള്‍ക്കൊടുവിലാണ് മനിതികളുടെ മടക്കം
ഇതിനിടയില്‍ എരുമേലി പോലീസ് സ്‌റ്റേഷനിലുള്ള അമ്മിണിയും തിരികെ പോകാന്‍ തീരുമാനമെടുത്തു. ശബരിമലയിലെ ഭക്തരുടെ പ്രതിഷേധം പറഞ്ഞു മനസ്സിലാക്കിയ പോലീസ് ഒടുവില്‍ പമ്പയിലെ പ്രതിഷേധത്തില്‍ മനിതി സംഘങ്ങള്‍ ഓടുന്ന ദൃശ്യങ്ങളും അമ്മിണിയെ കാണിച്ചു. ഏറെ പരിഭ്രാന്തയായി മാറിയ അമ്മിണിക്ക് ബോധക്കേടുണ്ടായി. ഒടുവില്‍ മടങ്ങാന്‍ തീരുമാനിക്കുകയായിരുന്നു. മനിതി സംഘടന ജെല്ലിക്കെട്ട് സമരത്തലടക്കം സജീവമായിരുന്നു. നക്‌സല്‍ ബന്ധവും ആരോപിക്കപ്പെടുന്നു. അക്ഷരാര്‍ത്ഥത്തില്‍ പോലീസിനെ കുഴക്കിയ മണിക്കൂറുകളായിരുന്നു പമ്പ സാക്ഷ്യം വഹിച്ചത്.
ആക്ടിവിസ്റ്റുകളായ മനിതികള്‍ പമ്പയിലെത്തിയതിനു പിന്നില്‍ വലിയ രാഷ്ട്രീയ ആരോപണങ്ങളും ഉയരുന്നു. ഒട്ടൊന്നു തണുത്തിരുന്ന ശബരിമല സമരം ആളിക്കത്തുകയാണ്. തലസ്ഥാനത്തും, ചെങ്ങന്നൂരും അതിശക്തമായ പ്രതിഷേധവും നാമജപധര്‍ണ്ണയുമാണ് അരങ്ങേറുന്നത്. മനിതികളെ ശബരിമലയിലെത്തിക്കാനുള്ള പോലീസ് ശ്രമങ്ങളും ഏറെ വിമര്‍ശനങ്ങള്‍ക്കിട വരുത്തുന്നു
സര്‍ക്കാരിനും പോലീസിനും മനിതികളുടെ മടക്കം വലിയ ആശ്വാസമാണ് നല്‍കുന്നത്. പോലീസിന്‍രെ എല്ലാ കണക്കു കൂട്ടലുകളെയും ഞെട്ടിച്ചു കൊണ്ടാണ് ഭക്തരുടെ ശക്തമായ പ്രതിഷേധം അണപൊട്ടിയൊഴുകിയത്. ഒരു വേള പോലീസ് കടുത്ത നടപടികളിലേക്കു തിരിഞ്ഞിരുന്നെങ്കില്‍ സ്ഥിതിഗതികള്‍ നിയന്ത്രണാതീതമായേനെ. അലയടിച്ചെത്തിയ ഭക്ത പ്രതിഷേധത്തിനു മുന്നില്‍ ഒരു വേള പേടിച്ച് ജീവനും കൊണ്ടോടേണ്ടി വന്നു മനിതികള്‍ക്ക്.
ഇത് അയ്യപ്പ വിജയമാണെന്ന് വിശ്വാസികള്‍. ആചാര ലംഘനത്തിന് അയ്യപ്പന്‍ അനുവദിക്കില്ല. ഭക്ത പ്രതിഷേധങ്ങളെ ഇല്ലാതാക്കാന്‍ അത്രയെളുപ്പം കഴിയില്ല

ആചാര സംരക്ഷണം ഓരോ അയ്യപ്പ വിശ്വാസിയും നെഞ്ചേറ്റിയ സന്നിധാനത്ത് യുവതികള്‍ വന്നാല്‍ ജീവന്‍ കൊടുത്തു അവര്‍ തടയുമെന്നുറപ്പാണ്. പ്രതിഷേധക്കാര്‍ക്കു മുന്നില്‍ പിഞ്ചു കുട്ടികളടക്കം അണി നിരന്നത് പോലീസിനെ അമ്പരപ്പിച്ചു. ഒരു വിരട്ടലിലും തോറ്റോടുന്നവരല്ല അയ്യപ്പ വിശ്വാസികള്‍. ഇന്നു ശബരിമല കണ്ടത് വിശ്വാസികളുടെ ശക്തമായ ആചാര സംരക്ഷണത്തിനുള്ള ഉറച്ച തീരുമാനമായിരുന്നു. ഒരു രാഷ്ട്രീയ കക്ഷിയുടേയും പിന്തുണയില്ലെങ്കിലും ഞങ്ങള്‍ ആചാരം സംരക്ഷിക്കുമെന്ന് അവര്‍ ഉറപ്പിച്ചു പറയുന്നു.