ജനുവരി മുതല് ആധുനിക സമ്പ്രദായത്തിലുള്ള ക്ലിനിക്കല് സ്ഥാപനങ്ങള്ക്കുള്ള രജിസ്ട്രേഷന് ആരംഭിക്കും
കേരള ക്ലിനിക്കല് സ്ഥാപനങ്ങള് (രജിസ്ട്രേഷനും നിയന്ത്രണവും) ആക്ട് 2019 ജനുവരി ഒന്ന് മുതല് പ്രാബല്യത്തിലാവുമെന്ന് ആരോഗ്യ മന്ത്രി കെ.കെ. ശൈലജ അറിയിച്ചു. എല്ലാ ചികിത്സാ സമ്പ്രദായങ്ങളിലും പെട്ട സ്ഥാപനങ്ങളും ആക്ടിന്റെ പരിധിയില് വരുമെങ്കിലും ആദ്യഘട്ടത്തില് മോഡേണ് മെഡിസിനിലാണ് (ദന്ത ചികിത്സ ഉള്പ്പെടെ) ഇതു പ്രാബല്യത്തില് വരുത്തുന്നത്. ജനുവരി മുതല് ആധുനിക സമ്പ്രദായത്തിലുള്ള ക്ലിനിക്കല് സ്ഥാപനങ്ങള്ക്കുള്ള (ലബോറട്ടറികള്, ഡയഗ്നോസ്റ്റിക് സെന്ററുകള്, ഡെന്റല് ചികിത്സാകേന്ദ്രങ്ങള് ഉള്പ്പെടെ) രജിസ്ട്രേഷന് ആരംഭിക്കും. വിവിധ ജില്ലകളില് ഘട്ടംഘട്ടമായാണ് ഇതു നടപ്പാക്കുന്നത്.
മലപ്പുറം, പാലക്കാട്, തൃശൂര് ജില്ലകളില് ആദ്യഘട്ടമായി രജിസ്ട്രേഷന് ആരംഭിക്കും. ഇതുവരെ നിയമപരമായ നിയന്ത്രണങ്ങളില്ലാതെ പ്രവര്ത്തിച്ചിരുന്ന സ്ഥാപനങ്ങള്ക്ക് ആക്ട് പ്രാബല്യത്തില് വരുന്നതോടെ നിയമപ്രകാരം മാത്രമേ പ്രവര്ത്തിക്കാനാവൂ. ഈ ആക്ട് അനുസരിച്ച് രജിസ്റ്റര് ചെയ്യാത്ത ഒരു സ്ഥാപനത്തിനും സംസ്ഥാനത്ത് പ്രവര്ത്തിക്കാനാവില്ല.
നിശ്ചയിച്ച ചികിത്സാ നിരക്ക് ഉള്പ്പെടെ പൊതുജനങ്ങള് ശ്രദ്ധിക്കുന്ന തരത്തില് ആശുപത്രിയില് പ്രദര്ശിപ്പിക്കണം. രജിസ്റ്റര് ചെയ്ത സ്ഥാപനങ്ങള് നിശ്ചിത മാനദണ്ഡം പാലിക്കുന്നുണ്ടോയെന്നുള്ള പരിശോധനയ്ക്ക് കൗണ്സിലിന് ആക്ട് അവകാശം നല്കുന്നുണ്ട്. മാനദണ്ഡങ്ങളില്നിന്ന് ആശുപത്രികള് വ്യതിചലിക്കുകയോ നിലവാരമുള്ള ചികിത്സ ലഭ്യമാക്കാതിരിക്കുകയോ ചെയ്താല് പൊതുജനങ്ങള്ക്ക് പരാതി നല്കാന് പ്രത്യേക സംവിധാനമൊരുക്കും. പരാതി ശരിയെന്ന് കണ്ടാല് രജിസ്ട്രേഷന് റദ്ദാക്കുന്നതുള്പ്പെടെ കൗണ്സിലിന് നിയമപരമായ അവകാശം ആക്ട് ഉറപ്പുവരുത്തിയിട്ടുണ്ട്.
താത്കാലികമായി രണ്ട് വര്ഷത്തേക്ക് സ്റ്റാന്ഡേര്ഡ് നോക്കാതെ എല്ലാ സ്ഥാപനങ്ങളും രജിസ്റ്റര് ചെയ്യണം. രണ്ടുവര്ഷത്തിനുള്ളില് സ്ഥാപനങ്ങള് നിലവാരം കൈവരിക്കണം. ഓണ്ലൈനായാവും രജിസ്ട്രേഷന്. അപേക്ഷ സമര്പ്പിക്കല്, കൈപ്പറ്റ് രസീത് നല്കല്, രജിസ്ട്രേഷന് ഫീസ് അടയ്ക്കല്, സര്ട്ടിഫിക്കറ്റ് നല്കല്, ക്ളിനിക്കല് സ്ഥാപനങ്ങളുടെ ഓണ്ലൈന് രജിസ്റ്റര്, രജിസ്റ്റര് ചെയ്തതും ചെയ്യാത്തതും റദ്ദാക്കപ്പെട്ടതുമായ സ്ഥാപനങ്ങളുടെ വിവരങ്ങള്, സ്ഥാപനങ്ങളുടെ സൗകര്യങ്ങളുടെയും സേവനങ്ങളുടെയും വിശദാംശങ്ങള്, പരാതിപരിഹാരം എന്നിവയെല്ലാം ഓണ്ലൈനില് ലഭ്യമാക്കും
https://www.facebook.com/Malayalivartha
