കേന്ദ്രവിഹിതം പൂര്‍ണമായി ലഭിക്കാത്തതിനെ തുടര്‍ന്ന് സംസ്ഥാനത്ത് റേഷന്‍ മണ്ണെണ്ണ വിതരണം നടത്താന്‍ സാധിച്ചില്ല. കേന്ദ്രപൂളില്‍ നിന്നും സംസ്ഥാനത്തിന് പ്രതിമാസം ലഭിക്കേണ്ടത് 4636 കിലോ ലിറ്റര്‍ മണ്ണെണ്ണയാണ്. ഇതില്‍ വലിയൊരു പങ്ക് ഇതുവരെ ലഭിക്കാത്തതിനാല്‍ വൈദ്യുതീകരിക്കാത്ത വീട്ടുകാരും പാചകത്തിന് മണ്ണെണ്ണ അടുപ്പ് ഉപയോഗിക്കുന്നവരും വലയുകയാണ്.
ഇന്ത്യന്‍ ഓയില്‍ കോര്‍പറേഷന്‍ (ഐ.ഒ.സി), ഭാരത് പെട്രോളിയം കോര്‍പറേഷന്‍ ലിമിറ്റഡ് (ബി.പി.സി.എല്‍), ഹിന്ദുസ്ഥാന്‍ പെട്രോളിയം കോര്‍പറേഷന്‍ (എച്ച്.പി.സി) കമ്പനികളാണ് കേരളത്തില്‍ റേഷന്‍ മണ്ണെണ്ണ മൊത്ത വ്യാപാരികള്‍ക്ക് വിതരണം ചെയ്യുന്നത്. എന്നാല്‍ ബി.പി.സി.എല്‍ കമ്പനിക്ക് ഡിസംബറിലെ മണ്ണെണ്ണ ഇതുവരെ അനുവദിച്ചിട്ടില്ല. ഐ.ഒ.സിക്ക് പകുതിയോളം മാത്രമാണ് ലഭിച്ചത്. എച്ച്.പി.സിക്ക് വിഹിതത്തിന്റെ പകുതിയില്‍ താഴെയും. മൂന്ന് മാസത്തെ ആവശ്യത്തിനുള്ള മണ്ണെണ്ണയാണ് കേന്ദ്ര പെട്രോളിയം മന്ത്രാലയം റേഷന്‍ വിഹിതമായി മൂന്ന് കമ്പനികള്‍ക്ക് വീതിച്ചു നല്‍കുന്നത്.

എറണാകുളം ജില്ലയിലെ ഇരുമ്പനത്തെ മണ്ണെണ്ണ വിതരണ കേന്ദ്രത്തില്‍ അന്വേഷിച്ചപ്പോള്‍ ക്വോട്ട തീര്‍ന്നുവെന്ന മറുപടിയാണ് ലഭിച്ചത്. പെട്രോളിയം മന്ത്രാലയം അനുവദിക്കാതെ നല്‍കാനാവില്ലെന്നാണ് അധികൃതരുടെ നിലപാട്.