പൊലീസില്‍ വിവിധ മേഖലകളില്‍ മികച്ച സേവനം കാഴ്ചവച്ച 195 ഉദ്യോഗസ്ഥര്‍ക്ക്, തൈക്കാട് പൊലീസ് ട്രെയിനിംഗ് കോളേജ് ആഡിറ്റോറിയത്തില്‍ നടന്ന ചടങ്ങില്‍ പൊലീസ് മേധാവി ലോക്‌നാഥ് ബെഹ്‌റ ബാഡ്ജ് ഒഫ് ഓണര്‍ സമ്മാനിച്ചു. കുറ്റാന്വേഷണത്തിലെ മികവിന് 112 പേര്‍ക്കും, ക്രമസമാധാനപാലനത്തിന് 9 പേര്‍ക്കും, ഇന്റലിജന്‍സ് മേഖലയിലെ മികവിന് 26 പേര്‍ക്കും, പരിശീലനമികവിന് അഞ്ചുപേര്‍ക്കുമാണ് ബാഡ്ജ് ഒഫ് ഓണര്‍ സമ്മാനിച്ചത്.
ടെലി കമ്മ്യൂണിക്കേഷന്‍ വിഭാഗത്തിലെ 12 പേരും, സോഷ്യല്‍ പൊലീസിംഗിലെ മൂന്നുപേരും, സൈബര്‍ െ്രെകം അന്വേഷണ വിഭാഗത്തിലെ നാലുപേരും ബാഡ്ജിന് അര്‍ഹരായി. വനിതാ സ്വയം പ്രതിരോധ സംഘത്തിലെ രണ്ടുപേര്‍ക്കും, ജനമൈത്രി വിഭാഗത്തിലെ ഒരാള്‍ക്കും, മറ്റ് വിഭാഗങ്ങളില്‍നിന്ന് 21 പേര്‍ക്കും ബാഡ്ജ് ഒഫ് ഓണര്‍ ലഭിച്ചു.
ശബരിമലയില്‍ മികച്ച സുരക്ഷയൊരുക്കിയതിന് എസ്.പി യതീഷ്ചന്ദ്ര അടക്കമുള്ള ഉദ്യോഗസ്ഥര്‍ക്ക് ബഹുമതിപത്രവും സമ്മാനിച്ചു. എ.ഡി.ജി.പിമാരായ അനില്‍കാന്ത്, ബി. സന്ധ്യ, ആനന്ദകൃഷ്ണന്‍, ഐ.ജിമാരായ മനോജ് എബ്രഹാം, എസ്.ശ്രീജിത്ത്, ഡി.ഐ.ജിമാരായ പി. പ്രകാശ്, ബി. സേതുരാമന്‍ തുടങ്ങിയവര്‍ പങ്കെടുത്തു.