പുതുവർഷ ദിനത്തിൽ ഇടതു മുന്നണിയുടെ ആഭിമുഖ്യത്തിൽ കെട്ടിപ്പടുക്കുന്ന വനിതാ മതിലിന് ഐക്യദാര്‍ഢ്യം പ്രഖ്യാപിച്ചുകൊണ്ട് ഗൾഫ് രാഷ്ട്രങ്ങളിൽ പ്രവാസികളും രംഗത്തെത്തിയിരിക്കുകയാണ്. അവധി ദിവസമായ വെള്ളിയാഴ്ചയില്‍ പലയിടങ്ങളിലും വനിതാ മതിലിന്റെ മാതൃക തീര്‍ത്തുകൊണ്ടാണ് ഇതിനോട് ചിലര്‍ അനുകൂലിച്ചത്.

അതേസമയം ചിലയിടങ്ങളില്‍ വനിതാ മതില്‍ നടക്കുന്ന അതേ ദിവസം തന്നെ വനിതാ മതില്‍ തീര്‍ക്കുവാനുള്ള ശ്രമങ്ങളും ഉണ്ടെന്നാണ് അറിയാൻ കഴിഞ്ഞത്. സമൂഹ മാധ്യമങ്ങളിലൂടെ ഇതിന്റെ പ്രചാരണപ്രവര്‍ത്തനങ്ങള്‍ ശക്തമായിട്ടാണ് നടക്കുന്നത്.

ചിലയിടങ്ങളില്‍ വിവിധ കലാരൂപങ്ങള്‍ സംഘടിപ്പിച്ചുകൊണ്ടും, പ്രത്യേക വീഡിയോകളും മറ്റും ഉണ്ടാക്കി ഷെയര്‍ ചെയ്തുകൊണ്ടുമാണ് വനിതാമതിലിനോടുള്ള ഐക്യപ്പെടല്‍ നടക്കുന്നത്. എന്റെ സമൂഹം മുന്നോട്ടുതന്നെ നടക്കണമെന്നും പിന്നോട്ട് നടക്കാന്‍ സാധ്യമാവുകയില്ല എന്നുമുള്ള സന്ദേശങ്ങള്‍ പ്രചരിപ്പിച്ചുകൊണ്ട് പ്രവാസി കുടുംബങ്ങളില്‍ വലിയ ചര്‍ച്ചയാണ് ഇതിനോടകം ഉണ്ടായിരിക്കുന്നത്. സമൂഹത്തില്‍ വര്‍ധിച്ചു വരുന്ന യാഥാസ്ഥിതിക ബോധത്തെ ചോദ്യം ചെയ്തുകൊണ്ടുള്ള ജനാഭിപ്രായം ലോകമാകെയുള്ള മലയാളികള്‍ക്കിടയില്‍ ശക്തിപ്പെട്ടു വരുന്നതിന്റെ സൂചനയാണ് ഇതിലൂടെ വെളിപ്പെടുത്തുന്നത്. കേരളത്തില്‍ നടന്നിട്ടുള്ള ഒരു പ്രവര്‍ത്തനവും ഇതിനുമുന്‍പ് ഇത്ര സ്വീകാര്യത നേടിയെടുത്തിട്ടില്ല.