കേരളത്തിന് മറക്കാനാവാത്ത മുറിവുകള്‍ സമ്മാനിച്ച് 2018 കടന്നു പോയി. സംഭവബഹുലമായ ഒരു വര്‍ഷത്തിന് കൂടി വിട നല്‍കി പുതുവര്‍ഷത്തെ വരവേറ്റ് ലോകം. സമോവ, ടോംഗോ കിരിബാതി ദ്വീപികളിലാണ് ആദ്യമായി പുതുവര്‍ഷമെത്തിയത്. തൊട്ടുപിന്നാലെ ന്യൂസിലാന്‍ഡിലും ആസ്‌ട്രേലിയയും പുതുവര്‍ഷമെത്തി. ദക്ഷിണ കൊറിയ, ജപ്പാന്‍, റഷ്യ തുടങ്ങിയ രാജ്യങ്ങളിലെല്ലാം വിപുലമായ ആഘോഷങ്ങളോടെയാണ് 2019നെ സ്വാഗതം ചെയ്തത്.
ഇന്ത്യയിലും പുതുവര്‍ഷ ആഘോഷങ്ങള്‍ക്ക് കുറവൊന്നുമുണ്ടായിരുന്നില്ല. പനാജി, മുംബൈ, ഡല്‍ഹി, ബംഗളൂരു തുടങ്ങിയ രാജ്യത്തിലെ പ്രധാനനഗരങ്ങളിലെല്ലാം പുതുവര്‍ഷത്തോട് അനുബന്ധിച്ച് വന്‍ ആഘോഷങ്ങള്‍ നടന്നു. നഗരങ്ങളില്‍ കനത്ത സുരക്ഷയിലാണ് ആഘോഷങ്ങള്‍ പുരോഗമിക്കുന്നത്.

കേരളത്തിന് മറക്കാനാവാത്ത മുറിവുകള്‍ സമ്മാനിച്ചാണ് 2018 കടന്നു പോയത്. നൂറ്റാണ്ടിനിടെയുണ്ടായ ഏറ്റവും വലിയ പ്രളയത്തില്‍ നിന്ന് കേരളം ഇനിയും മോചിതമായിട്ടില്ല. എങ്കിലും ദു:ഖങ്ങളെല്ലാം മറന്ന് കേരളവും പുതുവര്‍ഷത്തെ വരവേറ്റു. തിരുവനന്തപുരം, കൊച്ചി, കോഴിക്കോട് തുടങ്ങിയ നഗരങ്ങളിലെല്ലാം പുതുവര്‍ഷ ആഘോഷങ്ങള്‍ക്ക് പൊടി പൊടിച്ചു.