ശബരിമലയിൽ യുവതികൾ പ്രവേശിച്ചത്തിൽ പ്രതിഷേധമറിയിച്ച് ശബരിമല കർമ്മ സമിതിയുടെയും ബിജെപിയുടെയും നേതൃത്വത്തിൽ ഹർത്താലിന് ആഹ്വാനം ചെയ്തിട്ടുണ്ടെങ്കിലും കടകൾ തുറന്നാൽ ആവശ്യമായ സംരക്ഷണം നൽകുമെന്ന് ഡി.ജി.പി ലോക്‌നാഥ് ബെഹ്റ. ഹർത്താലിനിടെ അക്രമങ്ങൾ തടയാൻ കർശനനടപടികൾ സ്വീകരിക്കണമെന്നും ഡിജിപി ലോക്നാഥ് ബഹ്‍റ ജില്ലാ പൊലീസ് മേധാവികൾക്ക് നിർദേശം നൽകി.

അക്രമത്തിന് മുതിരുകയോ നിർബന്ധമായും കടകളും സ്ഥാപനങ്ങളും അടപ്പിക്കാൻ ശ്രമിക്കുകയോ ചെയ്യുന്നവരെ ഉടനടി അറസ്​റ്റ് ചെയ്യും. സഞ്ചാര സ്വാതന്ത്യം തടയുന്നവർക്കെതിരെയും നടപടിയുണ്ടാവും. പൊതുമുതൽ നശിപ്പിക്കുന്നവരിൽ നിന്ന് നഷ്ടത്തിന് തുല്യമായ തുക ഈടാക്കാൻ നിയമനടപടിയെടുക്കും. ഇവരുടെ ബാങ്ക് അക്കൗണ്ടുകളിൽ നിന്നോ, സ്വത്തുവകകളിൽ നിന്നോ നഷ്ടം ഈടാക്കുമെന്നും ബെഹ്‌റ വ്യക്തമാക്കി.

കടകള്‍ തുറന്നാല്‍ അവയ്ക്ക് ആവശ്യമായ സംരക്ഷണം നല്കും. ബലം പ്രയോഗിച്ച് കടകള്‍ അടപ്പിക്കാന്‍ ശ്രമിക്കുന്നവര്‍ക്കെതിരെ കര്‍ശന നടപടി സ്വീകരിക്കാനും നിര്‍ദ്ദേശിച്ചിട്ടുണ്ട്.അക്രമത്തിന് മുതിരുന്നവര്‍ക്കെതിരെ കേസ്സ് രജിസ്റ്റര്‍ ചെയ്ത് നടപടി സ്വീകരിക്കണം.

വ്യക്തികൾക്കും വസ്തുവകകൾക്കും എതിരെയുളള അക്രമങ്ങൾ കർശനമായി തടയണമെന്നും അനിഷ്ട സംഭവങ്ങൾ തടയാൻ ആവശ്യമായ സുരക്ഷ എർപ്പെടുത്തണമെന്നും ജില്ലാ പൊലീസ് മേധാവികൾക്ക് ഡി.ജി.പി നിർദ്ദേശം നൽകി. സർക്കാർ ഓഫീസുകൾക്കും കെ.എസ്.ഇ.ബി, അടക്കമുള്ള മറ്റ് ഓഫീസുകൾക്കും സുരക്ഷ ഏർപ്പെടുത്തും. കെ.എസ്.ആർ.ടി.സി, സ്വകാര്യ ബസുകൾ തടസമില്ലാതെ സർവീസ് നടത്താൻ സൗകര്യമൊരുക്കും. കോടതികളുടെ പ്രവർത്തനം സുഗമമായി നടത്തുന്നതിന് നടപടിയെടുക്കും. കൂടുതൽ പൊലീസ് പിക്ക​റ്റും പട്രോളിംഗും ഏർപ്പെടുത്തും.

എല്ലാ രാഷ്ട്രീയ പാര്‍ട്ടികളുടെയും ഓഫീസിന് മതിയായ സംരക്ഷണം ഒരുക്കണം. ശബരിമല തീര്‍ത്ഥാടകര്‍ക്ക് ബുദ്ധിമുട്ടുകള്‍ ഉണ്ടാകാതിരിക്കാന്‍ പ്രത്യേകം ശ്രദ്ധിക്കണം. ഹര്‍ത്താലുകള്‍ നിര്‍ബന്ധിത ഹര്‍ത്താലായി മാറാതിരിക്കുന്നതിന് ആവശ്യമായ നടപടികള്‍ സ്വീകരിക്കണമെന്ന പലപ്പോഴായുളള ഹൈക്കോടതി ഉത്തരവുകള്‍ നടപ്പാക്കുന്നതിന് ആവശ്യമായ നടപടികള്‍ സ്വീകരിക്കണമെന്നും ജില്ലാ പോലീസ് മേധാവിമാര്‍ക്ക് നിര്‍ദ്ദേശം നല്‍കിയിട്ടുണ്ട്. സ്ഥിതി ഗതികള്‍ നിരീക്ഷിച്ച് ആവശ്യമായ നടപടി സ്വീകരിക്കണമെന്ന് റേഞ്ച് ഐ.ജി മാരോടും സോണല്‍ എ.ഡി.ജി.പിമാരോടും ആവശ്യപ്പെട്ടിട്ടുണ്ട്.