ശബരിമയിൽ യുവതി പ്രവേശനം അനുവദിച്ചു കൊണ്ടുള്ള സുപ്രീംകോടതി വിധിയുടെ പശ്ചാത്തതിൽ ഒരു യുവതി കൂടി ശബരിമലയിലേക്ക്​ തിരിച്ചുവെന്നാണ് ഇപ്പോൾ പുറത്തു വരുന്ന റിപ്പോർട്ടുകൾ. പൊലീസ്​ സംരക്ഷണത്തിലാണ്​ യുവതി യാത്ര തിരിച്ചിരിക്കുന്നത്​. ഇവർ മരക്കൂട്ടത്ത്​ എത്തിയതായാണ്​ വിവരം. അതേസമയം ഇവർക്കെതിരെ ഇതുവരെയും പ്രതിനിഷേധങ്ങൾ ഉയർന്നിട്ടില്ല. പൊലീസ്​ സുരക്ഷയിൽ ഇവർ നടപ്പന്തലിലേക്ക്​ എത്തിക്കൊണ്ടിരിക്കയാണ്​.

അതേസമയം ശബരിമല വിധിയുടെ അടിസ്ഥാനത്തിൽ ഇന്നലെ യുവതികൾ ദർശനം നടത്തിയിരുന്നു. അങ്ങാടിപ്പുറം സ്വദേശി കനകദുർഗ, കോഴിക്കോട്​ കൊയിലാണ്ടി സ്വദേശി ബിന്ദു എന്നിവർ ശബരിമല സന്ദർശനം നടത്തിയത്​.

എന്നാൽ യുവതി പ്രവേശനത്തെത്തുടർന്ന് അയ്യപ്പ ഭക്തരും വിശ്വാസികളും കടുത്ത പ്രതിഷേധനകളുമായാണ് മുന്നിട്ടിറങ്ങിയത്. പ്രതിനിഷേധങ്ങൾക്കിടയിൽ ഇന്നലെ സിപിഎം പ്രവർത്തകരുമായി ഏറ്റുമുട്ടുകയും പന്തളത്ത് ഒരു ബിജെപി പ്രവർത്തകൻ കൊല്ലപ്പെടുകയും ചെയ്തിരുന്നു. ശബരിമല കര്‍മ്മ സമിതിയുടെയും ബിജെപിയുടെയും നേതൃത്വത്തിൽ ഇന്ന് ഹർത്താലിന് ആഹ്വാനം ചെയ്തിരിക്കുകയാണ്.

ഹര്‍ത്താല്‍ തുടങ്ങി ആദ്യ മണിക്കൂറുകളില്‍ തന്നെ സംസ്ഥാനത്തിന്റെ വിവിധ ഇടങ്ങളില്‍ നിന്നും അക്രമ സംഭവങ്ങള്‍ റിപ്പോര്‍ട്ട് ചെയ്യപ്പെട്ടു. സ്വകാര്യ വാഹനങ്ങള്‍ നിരത്തില്‍ ഇറങ്ങുന്നുണ്ടെങ്കിലും പൊതുഗതാഗതം പൂര്‍ണമായും സ്‌തംഭിച്ച നിലയിലാണ്. നിരവധിയിടങ്ങളിൽ പ്രതിഷധങ്ങൾ കനക്കുകയാണ്.