ശബരിമല വിഷയവുമായി ബന്ധപ്പെട്ട് ബി.ജെ.പിയെ രൂക്ഷമായി വിമര്‍ശിച്ച്‌ കെ.പി.സി.സി വര്‍ക്കിംഗ് പ്രസിഡന്റ് കെ.സുധാകരന്‍ രംഗത്ത്. കേരളത്തിലെ ബി.ജെ.പിക്കാര്‍ക്ക് അന്തസുണ്ടെങ്കില്‍ ശബരിമല യുവതി പ്രവേശന വിഷയത്തില്‍ ഓര്‍ഡിനന്‍സ് പുറപ്പെടുവിക്കാന്‍ കേന്ദ്രസര്‍ക്കാരിനെ സമീപിക്കണമെന്ന് സുധാകരന്‍ പറഞ്ഞു. അവസരവാദം രാഷ്ട്രീയം ഉപേക്ഷിച്ച്‌ ബി.ജെ.പി ഓര്‍ഡിനന്‍സ് പുറപ്പടുവിക്കണം,​ ഓര്‍ഡിനന്‍സ് ഇറക്കാതെ അണികളെ ബലികൊടുത്ത് അരക്ഷിതാവസ്ഥ ഉണ്ടാക്കുന്നത് എന്തിനാണെന്നും അദ്ദേഹം കൂട്ടിച്ചേര്‍ത്തു.

തറവാട്ടില്‍ പിറന്ന സ്ത്രീകള്‍ ശബരിമലയില്‍ പോകില്ല. കോണ്‍ഗ്രസ് അധികാരത്തില്‍ വന്നാല്‍ ശബരിമലയ്ക്ക് വേണ്ടി നിയമനിര്‍മ്മാണം നടത്താന്‍ ആവ‌ശ്യമായ നടപടികള്‍ സ്വീകരിക്കും. ഇതിനുവേണ്ടി കോണ്‍ഗ്രസ് ഹൈക്കമാന്റില്‍ സമ്മര്‍ദ്ദം ചെലുത്തും. സന്നിധാനത്ത് ദര്‍ശനം നടത്തിയ യുവതികള്‍ക്ക് മുറി ഒരുക്കിക്കൊടുത്തത് കണ്ണൂര്‍ സ്വദേശിയായ ഷിജിത്ത് എന്ന് പൊലീസുകാരനാണ്. ആരുടെ നിര്‍ദ്ദേശപ്രകാരമാണ് അവിടെ എത്തിയതെന്ന് വ്യക്തമാക്കണം- സുധാകരന്‍ പറഞ്ഞു. സംസ്ഥാനത്തിന്റെ സമാധാനം തകര്‍ത്തതിന്റെയും അക്രമസംഭവങ്ങളുടേയും പൂര്‍ണ ഉത്തരവാദിത്തം മുഖ്യമന്ത്രിയാണെന്നും അദ്ദേഹം കൂട്ടിച്ചേര്‍ത്തു.