ഹര്‍ത്താലുമായി ബന്ധപ്പെട്ട് ഇതുവരെയുളള കണക്കനുസരിച്ച് സംസ്ഥാനത്ത് 1286 കേസുകള്‍ രജിസ്റ്റര്‍ ചെയ്തതായി സംസ്ഥാന പോലീസ് മേധാവി ലോകനാഥ് ബെഹറ അറിയിച്ചു. ആകെ കേസുകളില്‍ 37,979 പേര്‍ പ്രതികളാണ്. ഇതുവരെ 3178 പേര്‍ അറസ്റ്റിലായിട്ടുണ്ട്. ഇവരില്‍ 487 പേര്‍ റിമാന്റിലാണ് 2691 പേര്‍ക്ക് ജാമ്യം ലഭിച്ചു. യുവതികള്‍ മലകയറി മൂന്ന് ദിവസം പിന്നിട്ടിട്ടും ആര്‍.എസ്.എസ് നടത്തുന്ന ആക്രമണങ്ങളും സി.പി.എമ്മിന്റെ നേതൃത്വത്തില്‍ നടക്കുന്ന പ്രത്യാക്രമണങ്ങളും അവസാനിക്കുന്നില്ല. കണ്ണൂരില്‍ സമാധാനയോഗം നടക്കുമ്പോഴാണ് എ.എന്‍ ഷംസീര്‍ എം.എല്‍.എയുടെ വീടിന് നേരെ ആക്രമണം നടന്നത്. അതിന് ശേഷം വി.മുരളീധരന്‍ എം.പിയുടെയും പി.ശശിയുടെയും വീടിന് നേരെ ആക്രമണം നടന്നു.

ഇന്ന് മലപ്പുറം ചേളാരിയില്‍ ബി.ജെ.പി പ്രവര്‍ത്തകന്റെ കട അടിച്ച് തകര്‍ത്തു. എ.എന്‍.ഷംസീര്‍ എം.എല്‍.എയുടെ വീടിന് നേരെ ബോംബെറിഞ്ഞത് ആര്‍.എസ്.എസ് പ്രവര്‍ത്തകരാണെന്ന് പൊലീസ് വ്യക്തമാക്കി. തിരുവനന്തപുരം നെടുമങ്ങാട്ടും മറ്റും സംഘര്‍ഷഭരിതമായ അവസ്ഥയിലാണ്. ഇവിടെ നിരോധനാഞ്ജ തുടരുകയാണ്. നെടുമങ്ങാട് പൊലീസ് സ്റ്റേഷന് നേരെ ബോംബെറിഞ്ഞത് ആര്‍.എസ്.എസ് പ്രചാരക് ആണെന്ന് സി.സി.ടി.സി ദൃശ്യങ്ങളില്‍ നിന്ന് വ്യക്തമായി. കണ്ണൂരും തലശേരിയിലും അടൂരും പരക്കെ അക്രമണം തുടരുകയാണ്. അടൂരില്‍ കഴിഞ്ഞ ദിവസം മൊബൈല്‍ കടയ്ക്ക് നേരെ ബോംബാക്രമണം നടന്നിരുന്നു. 

കണ്ണൂര്‍ ജില്ലയിലെ അക്രമ സംഭവങ്ങള്‍ തടയാന്‍ കനത്ത ജാഗ്രത പുലര്‍ത്തി വരികയാണെന്ന് സംസ്ഥാന പൊലീസ് മേധാവി ലോകനാഥ് ബെഹറ അറിയിച്ചു. സംസ്ഥാനമൊട്ടാകെ ജാഗ്രത തുടരും. രാഷ്ട്രീയ നേതാക്കളുടെ വീടിനു നേര്‍ക്ക് നടന്ന ആക്രമണങ്ങള്‍ക്ക് ഉത്തരവാദികളായവരെ പിടികൂടി നടപടി സ്വീകരിക്കാന്‍ കണ്ണൂര്‍ ജില്ലാ പൊലീസ് മേധാവിക്ക് നിര്‍ദ്ദേശം നല്‍കി. കഴിഞ്ഞ രാത്രിയില്‍ 19 പേരെ കരുതല്‍ തടങ്കലില്‍ എടുത്തിട്ടുണ്ട്. ജില്ലയില്‍ പോലീസ് പട്രോളിങ്ങും പിക്കറ്റിങ്ങും പരിശോധനയും ശക്തമാക്കി.

ക്രമസമാധാനം നിലനിര്‍ത്തുന്നതിനും സാമാന്യ ജീവിതം ഉറപ്പുവരുത്തുന്നതിനും ആവശ്യമായ എല്ലാ നടപടികളും സ്വീകരിക്കാന്‍ ജില്ലാ പൊലീസിന് നിര്‍ദ്ദേശം നല്‍കിയിട്ടുണ്ട്. പത്തനംതിട്ട ജില്ലയില്‍ നടന്ന അക്രമങ്ങളുമായി ബന്ധപ്പെട്ട് 76 കേസുകള്‍ രജിസ്റ്റര്‍ ചെയ്തു. ഇതില്‍ ഒന്‍പത് കേസുകള്‍ അടൂരിലാണ്. അവിടെ അധികമായി പൊലീസിനെ വിന്യസിച്ചിട്ടുണ്ട്. ജില്ലയില്‍ ഇതുവരെ 110 പേര്‍ അറസ്റ്റിലായി. ഇവരില്‍ 85 പേര്‍ക്ക് ജാമ്യം ലഭിച്ചു. 25 പേരെ റിമാന്റ് ചെയ്തു. ജില്ലയില്‍ 204 പേര്‍ കരുതല്‍ തടങ്കലിലാണ്. 

അക്രമങ്ങളിലെ ജില്ല തിരിച്ചുള്ള കണക്ക് താഴെ പറയുന്ന പ്രകാരമാണ്. (ജില്ല, കേസുകളുടെ എണ്ണം, പ്രതികളുടെ എണ്ണം, ആകെ അറസ്റ്റിലായവര്‍, റിമാന്റിലായവര്‍, ജാമ്യം ലഭിച്ചവര്‍ എന്ന ക്രമത്തില്‍) തിരുവനന്തപുരം സിറ്റി 28, 1201, 44, 17, 27 തിരുവനന്തപുരം റൂറല്‍ 74, 1166, 98, 6, 92 കൊല്ലം സിറ്റി 65, 2600, 47, 36, 11 കൊല്ലം റൂറല്‍ 46, 1021, 70, 5, 65 പത്തനംതിട്ട 77, 1601, 110, 25, 85 ആലപ്പുഴ 80, 2526, 328, 12, 316 ഇടുക്കി 82, 640, 234, 17, 217 കോട്ടയം 42, 1541, 133, 11, 122 കൊച്ചി സിറ്റി 32, 1171, 236, ഒന്ന്, 235 എറണാകുളം റൂറല്‍ 48, 3019, 250, 79, 171 തൃശ്ശൂര്‍ സിറ്റി 66, 3097, 199, 47, 152 തൃശ്ശൂര്‍ റൂറല്‍ 57, 3337, 149, 12, 137 പാലക്കാട് 166, 4946, 410, 84, 326 മലപ്പുറം 47, 1537, 170, 19, 151, കോഴിക്കോട് സിറ്റി 66, 3763, 134, 26, 108 കോഴിക്കോട് റൂറല്‍ 32, 748, 47, 17, 30 വയനാട് 20, 190, 54, 23, 31 കണ്ണൂര്‍ 169, 998, 304, 33, 271 കാസര്‍ഗോഡ് 89, 2877, 161, 17, 144.