സമാധാനത്തോടെ ശബരിമല തീര്‍ത്ഥാടനം തീരാന്‍ കാത്തിരിക്കുകയാണ് മലയാളികള്‍. ശബരിമലയ്ക്ക് പിന്നാലെ വാവര് പള്ളിയിലും അശാന്തി വിതയ്ക്കാന്‍ ശ്രമിക്കുകയാണ് ചിലര്‍. വാവര് പള്ളിയില്‍ യുവതികളെ കയറ്റാന്‍ വീണ്ടും ശ്രമമുണ്ടാക്കുകയാണ്. എരുമേലി വാവരുപള്ളിയിലും കേരളത്തിലെ ആരാധനാലയങ്ങളിലും പ്രവേശിക്കാനായി പുറപ്പെട്ട ഹിന്ദുമക്കള്‍ കക്ഷി പ്രവര്‍ത്തകരായ 17 പേരെക്കൂടിയാണ് തമിഴ്‌നാട് പൊലീസ് കസ്റ്റഡിയിലെടുത്തത്. തിരുപ്പൂരില്‍ യോഗം ചേര്‍ന്ന ശേഷം മൂന്നു വാഹനങ്ങളിലായി കേരളത്തിലേക്കു പുറപ്പെട്ടവരെയാണു സേലത്തും തിരുപ്പൂരിലുമായി പിടികൂടിയത്. ഇവരെ കരുതല്‍ തടങ്കലില്‍ വയ്ക്കാനാണു തീരുമാനം.

ഹിന്ദുമക്കള്‍ കക്ഷിയുടെ നീക്കത്തില്‍ ജാഗ്രതയും അടിയന്തര ഇടപെടലും വേണമെന്നു കഴിഞ്ഞ ദിവസം സംസ്ഥാന പൊലീസ് മേധാവി ലോകനാഥ് ബെഹ്‌റ തമിഴ്‌നാട് പൊലീസ് മേധാവിയോട് ആവശ്യപ്പെട്ടിരുന്നു. കൂടുതല്‍ പേര്‍ കേരളത്തിലേക്കു പുറപ്പെടാന്‍ സംഘടിക്കുന്നുവെന്നു വിവരം ലഭിച്ചതിനെത്തുടര്‍ന്നു പാലക്കാട് ജില്ലാ പൊലീസ് മേധാവി ദേബേഷ്‌കുമാര്‍ ബെഹ്‌റയുടെ നിര്‍ദേശ പ്രകാരം പ്രത്യേക പൊലീസ് സംഘം വീണ്ടും തിരുപ്പൂരിലെത്തി വിവരങ്ങള്‍ ശേഖരിച്ചു.

അതേസമയം പള്ളിയുടെ മുന്നിലെത്തി ദര്‍ശനം നടത്തി നേര്‍ച്ചയിട്ട് പേട്ട തുള്ളി പോകുന്നതിന് വിലക്കില്ലെന്നാണ് പറയുന്നത്. ശബരിമല തീര്‍ഥാടകര്‍ക്ക് വാവരുപള്ളിയില്‍ വിലക്ക് ഏര്‍പ്പെടുത്തിയിട്ടില്ലെന്ന് എരുമേലി നൈനാര്‍ പള്ളി(വാവരുപള്ളി) മഹല്ല് കമ്മിറ്റി പ്രസിഡന്റ് അഡ്വ. സി എച്ച് ഷാജഹാനും വ്യക്തമാക്കിയിരുന്നു. 

കൊച്ചമ്പലത്തില്‍നിന്നും പേട്ട തുള്ളി എത്തുന്നവര്‍ പള്ളിയ്ക്ക് വലംവയ്ക്കുകയാണ് പതിവ്. നേര്‍ച്ചയായ നാളികേരം ഉടച്ച് കാണിക്കയും നിക്ഷേപിക്കും. തുടര്‍ന്ന് വലിയമ്പലത്തിലേക്കുപോയി പേട്ടതുള്ളി അവസാനിപ്പിക്കും. ഇതാണ് കാലങ്ങളായി ഇവിടെ നടക്കുന്നത്. പള്ളിയിലെത്തി പ്രദക്ഷിണം വയ്ക്കാനും നാളികേരം ഉടയ്ക്കാനുമുള്ള സൗകര്യങ്ങള്‍ വര്‍ഷങ്ങളായി പള്ളി ജമാഅത്തിന്റെ നേതൃത്വത്തില്‍ തുടരുന്നതാണ്. അത് ഈ വര്‍ഷവും തടസമില്ലാതെ നടക്കുന്നുണ്ട്. ശബരിമല തീര്‍ഥാടനവുമായി ബന്ധപ്പെട്ട് തീര്‍ഥാടകരാരും പള്ളിയ്ക്കകത്ത് പ്രവേശിക്കണമെന്ന് പറഞ്ഞിട്ടില്ലെന്നും അദ്ദേഹം പറഞ്ഞു.

സന്നിധാനത്തെ സമരം പൊളിഞ്ഞതിന് പിന്നാലെയാണ് വാവരുപള്ളിയുടെ പേരില്‍ പുതിയ വിവാദം സൃഷ്ടിക്കാന്‍ ശ്രമം ആരംഭിച്ചത്. ഹിന്ദുമക്കള്‍ കക്ഷി തമിഴകം ഭാരവാഹികളായ മൂന്നു സ്ത്രീകള്‍ ഉള്‍പ്പെടെ ആറുപേരെ കഴിഞ്ഞദിവസം പാലക്കാട് കൊഴിഞ്ഞാമ്പാറ പൊലീസ് അറസ്റ്റ് ചെയ്തിരുന്നു. 

വിവാദങ്ങള്‍ ഇങ്ങനെ പുരോഗമിക്കുമ്പോഴും ശബരിമല തീര്‍ഥാടനത്തോട് അനുബന്ധിച്ച് നടക്കുന്ന പ്രധാന ചടങ്ങുകളിലൊന്നായ പേട്ട തുള്ളല്‍ ആഘോഷങ്ങള്‍ക്കായി എരുമേലി ഒരുങ്ങിയിട്ടുണ്ട്. അമ്പലപ്പുഴ,ആലങ്ങാട് സംഘങ്ങളുടെ പേട്ട തുള്ളല്‍ ഇന്നാണ് നടക്കുന്നത്.

വെള്ളിയാഴ്ച ഉച്ചയോടെയാണ് സമൂഹപെരിയോന്‍ കളത്തില്‍ ചന്ദ്രശേഖരന്‍നായരുടെ നേതൃത്വത്തില്‍ അമ്പലപ്പുഴ പേട്ടതുള്ളല്‍ പേട്ട ശാസ്താക്ഷേത്രത്തില്‍ തുടങ്ങുന്നത്. നൈനാര്‍ മസ്ജിദില്‍ (വാവരുപള്ളി) വലംവെച്ച് സ്വീകരണങ്ങള്‍ ഏറ്റുവാങ്ങി ധര്‍മ്മശാസ്താക്ഷേത്രത്തില്‍ പേട്ടതുള്ളല്‍ സമാപിക്കും. 

ഉച്ചകഴിഞ്ഞ് മൂന്നുമണിയോടെ യോഗം പെരിയോന്‍ അമ്പാടത്ത് എ.കെ.വിജയകുമാറിന്റെ നേതൃത്വത്തിലാണ് ആലങ്ങാട് സംഘത്തിന്റെ പേട്ടതുള്ളല്‍. അമ്പലപ്പുഴ സംഘത്തിനൊപ്പം വാവരുസ്വാമി യാത്രതിരിച്ചു എന്ന വിശ്വാസത്തില്‍ മസ്ജിദില്‍ കയറാതെ ആലങ്ങാട് പേട്ടതുള്ളല്‍ ധര്‍മ്മശാസ്താക്ഷേത്രത്തിലേക്ക് നീങ്ങും.

രണ്ട് പേട്ടതുള്ളലിനും ക്ഷേത്രത്തില്‍ ദേവസ്വംബോര്‍ഡും അയ്യപ്പസേവാസംഘം പ്രതിനിധികളും വിവിധ സന്നദ്ധ, സമുദായസംഘടനകളും ജനപ്രതിനിധികളും ഉദ്യോഗസ്ഥരും സ്വീകരണമൊരുക്കും. അയ്യപ്പ ചരിത്രവുമായി ബന്ധപ്പെട്ട എരുമേലി പുത്തന്‍വീട്ടിലും സ്വീകരണമുണ്ട്.