പ്രളയബാധിത പ്രദേശങ്ങളിലെ വനിതകള്‍ക്കുള്ള വനിത വികസന കോര്‍പറേഷന്റെ പ്രത്യേക പദ്ധതിയുടെ ഉദ്ഘാടനം ജനുവരി 26-ാം തീയതി ശനിയാഴ്ച രാവിലെ 9.00 മണിക്ക് ആറന്മുള ശ്രീകൃഷ്ണ ഓഡിറ്റോറിയത്തില്‍ വച്ച് ആരോഗ്യ സാമൂഹ്യനീതി വനിത ശിശു വികസന വകുപ്പ് മന്ത്രി കെ.കെ. ശൈലജ ടീച്ചര്‍ നിര്‍വഹിക്കുന്നു. വീണ ജോര്‍ജ്ജ് എം.എല്‍.എ. ചടങ്ങില്‍ അധ്യക്ഷത വഹിക്കും. ഇതോടൊപ്പം കേന്ദ്ര ന്യൂനപക്ഷ ധനകാര്യ വികസന കോര്‍പ്പറേഷന്റെ (NMDFC) സഹായത്തോടെ വനിതാ വികസന കോര്‍പ്പറഷന്‍ സംസ്ഥാനത്ത് നടപ്പിലാക്കുന്ന വിവിധ വായ്പാ പദ്ധതികളുടെ ബോധവല്‍ക്കരണ പരിപാടിയും ഉണ്ടായിരിക്കുന്നതാണ്.

സമാനതകളില്ലാത്ത പ്രളയത്തിനാണ് സംസ്ഥാനം കഴിഞ്ഞ വര്‍ഷം സാക്ഷ്യം വഹിച്ചത്. നിരവധി കുടുംബങ്ങള്‍ക്ക് വാസസ്ഥലവും അനേകായിരങ്ങള്‍ക്ക് തൊഴിലും ജീവിത മാര്‍ഗവും നഷ്ടപ്പെട്ടിരുന്നു. ഇത്തരം ദുരന്തങ്ങള്‍ ഏത് സമൂഹത്തിലും ഗുരുതരമായി ബാധിക്കുന്നത് സ്ത്രീകളെയും കുട്ടികളെയുമാണ്. ഇതിന്റെയടിസ്ഥാനത്തില്‍ മന്ത്രി കെ.കെ. ശൈലജ ടീച്ചറുടെ നിര്‍ദേശമനുസരിച്ച് കേരള പ്ലാനിംഗ് ബോര്‍ഡിന്റെയും സംസ്ഥാന ജെന്റര്‍ അഡൈ്വസറിന്റെയും നേതൃത്വത്തില്‍ സംസ്ഥാനത്തെ ആറ് പ്രളയ ബാധിത ജില്ലകളില്‍ പഠനം നടത്തി. തെരഞ്ഞെടുക്കപ്പെട്ട ആറ് ഗ്രാമപഞ്ചായത്തുകളിലെ സ്ത്രീകള്‍ക്ക് ജീവിത സാഹചര്യം മെച്ചപ്പെടുത്തുന്നതിലേക്കായി വിവിധ പദ്ധതികള്‍ നടപ്പിലാക്കുന്നതിന് സമിതി ശുപാര്‍ശ ചെയ്തു.

ഈ റിപ്പോര്‍ട്ടിന്റെ അടിസ്ഥാനത്തില്‍ സര്‍ക്കാര്‍ ഈ പ്രദേശങ്ങളില്‍ വിവിധ ദുരിത നിവാരണ പദ്ധതികള്‍ ആസൂത്രണം ചെയ്തുവരുന്നു. ഇതിന്റെ ഭാഗമായി സ്ത്രീകളുടെ സാമ്പത്തിക ശാക്തീകരണ പ്രവര്‍ത്തനങ്ങള്‍ ഏറ്റെടുത്ത് നടത്തുന്നതിന് സംസ്ഥാന വനിതാ വികസന കോര്‍പ്പറേഷനെ ചുമതലപ്പെടുത്തി. ഇതിന്റെ തുടക്കമെന്ന നിലയില്‍ ആറന്മുള ഗ്രാമപഞ്ചായത്തിലെ തയ്യല്‍ ജോലികള്‍ അറിയാവുന്ന 28 വനിതകള്‍ക്ക് തയ്യല്‍ മെഷീനും അനുബന്ധ സാമഗ്രികളും വാങ്ങുന്നതിലേക്കായി കേരള സംസ്ഥാന വനിതാ വികസന കോര്‍പ്പറേഷന്‍ മുഖാന്തിരം പ്രത്യേക സ്വയംതൊഴില്‍ വായ്പാ പദ്ധതി രൂപീകരിച്ചിരിക്കുന്നു. ഇതിന്റെ ഉദ്ഘാടനമാണ് നടക്കുന്നത്.

ഇതുകൂടാതെ മറ്റ് പഞ്ചായത്തുകളിലും പ്രളയ ബാധിത വനിതകള്‍ക്ക് ജീവിതോപാധി നേടിക്കൊടുക്കുന്നതിനുള്ള വിവിധങ്ങളായ പദ്ധതികള്‍ ആവിഷ്‌ക്കരിച്ച് നടപ്പിലാക്കാനുള്ള പ്രവര്‍ത്തനത്തിലാണ് കേരള സംസ്ഥാന വനിതാ വികസന കോര്‍പ്പറേഷന്‍.