കണ്ണാടി തുണയായി, ബൈക്ക് യാത്രികനെ ഇടിച്ചിട്ട ശേഷം നിര്‍ത്താതെ പോയ കാര്‍ പൊലീസ് കണ്ടെത്തി. എംസി റോഡില്‍ തുരുത്തിയില്‍ കഴിഞ്ഞ 14-ന് രാത്രി 10.45 നായിരുന്നു അപകടം.

ബൈക്ക് യാത്രികന്‍ കുറിച്ചി സ്വദേശി സനല്‍കുമാര്‍ (46) ചങ്ങനാശേരി ഭാഗത്തു നിന്നു വരികയായിരുന്നു. എതിര്‍ ദിശയിലൂടെ വന്ന കാറാണ് ബൈക്കില്‍ ഇടിച്ചത്. അപകടമുണ്ടായിട്ടും കാര്‍ നിര്‍ത്താതെ പോയി. ഗുരുതരമായി പരുക്കേറ്റ് റോഡില്‍ കിടന്ന സനലിനെ നാട്ടുകാരാണ് ആശുപത്രിയിലെത്തിച്ചത്. സമീപത്തുള്ള കടയിലെ സിസിടിവി ക്യാമറയില്‍ കാറിടിക്കുന്ന ദൃശ്യങ്ങള്‍ പതിഞ്ഞിരുന്നെങ്കിലും കാറിന്റെ നമ്പര്‍ വ്യക്തമായില്ല.

എന്നാല്‍ ബൈക്കില്‍ ഇടിച്ചപ്പോള്‍ പൊട്ടി വീണ കാറിന്റെ കണ്ണാടി (റിയര്‍ വ്യൂ മിറര്‍) കിട്ടി. കണ്ണാടിയില്‍ രേഖപ്പെടുത്തിയ വിവരങ്ങള്‍ ഉപയോഗിച്ച് സൈബര്‍ സെല്ലിന്റെ സഹായത്തോടെ പൊലീസ് അന്വേഷണം നടത്തി. അങ്ങനെ കാറിന്റെ മോഡല്‍ കണ്ടെത്തി. തുടര്‍ന്ന് സമീപ ജില്ലകളിലെയും കാര്‍ ഷോറൂമുകളിലും വര്‍ക് ഷോപ്പുകളിലും അന്വേഷിച്ചു.

ഇടതു വശത്തെ റിയര്‍വ്യു മിറര്‍ ഇളകിയ നിലയില്‍ അറ്റകുറ്റപ്പണികള്‍ക്കായി ഒരു കാര്‍ കോട്ടയത്തെ വര്‍ക് ഷോപ്പില്‍ എത്തിച്ചതായി കണ്ടെത്തി. അതോടെ നാലുകോടി സ്വദേശി ജോസഫ് സേവ്യറിന്റെ ഉടമസ്ഥതയിലുള്ളതാണ് കാര്‍ എന്ന് ചങ്ങനാശേരി പൊലീസ് കണ്ടെത്തി. തുടര്‍ന്ന് ഉടമയുടെ ഫോണിന്റെ മൊബൈല്‍ ടവര്‍ ലൊക്കേഷന്‍ ഉള്‍പ്പെടെയുള്ള വിവരങ്ങള്‍ പൊലീസ് ശേഖരിച്ചു.

അപകടമുണ്ടായ സമയത്ത് തുരുത്തി ടവറിനു കീഴില്‍ ജോസഫ് ഉണ്ടായിരുന്നതായും അവിടെ നിന്ന് ഫോണ്‍ വിളിച്ചിരുന്നതായും പൊലീസ് കണ്ടത്തി. സനല്‍കുമാര്‍ കോട്ടയം മെഡിക്കല്‍ കോളജില്‍ ചികിത്സയിലാണ്. ജോസഫ് സേവ്യറിനെതിരെ കേസെടുത്ത് ജാമ്യത്തില്‍ വിട്ടയച്ചു.