അരിയെ പറയുന്നത് പോളണ്ടിനെ പറ്റി പറയന്നതു പോലെയാകുമെന്നറിയാതെയല്ല. ചിലർക്ക് അലോസരമാകാം. എന്നാലും ചില ശാസ്ത്ര വിവരങ്ങൾ പറയാതെ വയ്യ.

അരി എന്ന് പറയുമ്പോൾ ഉദ്ദേശിക്കുന്നത് അരി മാത്രമല്ല എന്ന് മുൻകൂർ പറയട്ടെ. അരി, ഗോതമ്പ്, കിഴങ്ങ് എന്നിവയൊക്കെ ഒരു പോലെയാണ്. എല്ലാത്തിലുമുള്ളത് അന്നജം തന്നെ. പഴങ്ങളിലും, പച്ചക്കറികളിലും അന്നജമാണെങ്കിലും, മുൻ പറഞ്ഞ സ്റ്റാർച്ച് എന്ന വിഭാഗത്തെ അപേക്ഷിച്ച് ധാരാളം നാരുണ്ടെന്നതിനാൽ കലോറി (*ഊർജ്ജത്തിന്റെ അളവ് ) നന്നെ കുറവാണ്, പോഷകമൂല്യം കൂടുതലും. അതിനാൽ ഫലങ്ങളും, പച്ചകറികളും നല്ല അന്നജമായി കരുതപെടുന്നു.

അന്നജം ഭക്ഷണത്തിന്റെ പ്രധാന ഘടകങ്ങളിൽ ഒന്നാണ് (പ്രോട്ടീൻ, കൊഴുപ്പ് എന്നിവയാണ് മറ്റ് പ്രധാന ഘടകങ്ങൾ). ഊർജ്ജത്തിന്റെ പ്രധാന ശ്രോതസ്സ് അന്നജമാകണമെന്നാണ് കരുതി പോന്നിരുന്നത്. അതിനാൽ ഭക്ഷണ-ഊർജ്ജത്തിന്റെ 50-60 ശതമാനവും അന്നജത്തിൽ നിന്നാകണമെന്ന് നിലവിലെ പല മാർഗ്ഗരേഖകളും നിർദ്ദേശിക്കുന്നു. യഥാർത്ഥത്തിൽ ഇതിലും എത്രയോ അധികം അന്നജമാണ് പലരും കഴിക്കുന്നത്. നമ്മെ സംബന്ധിച്ച് ചോറും, കഞ്ഞിയും, അപ്പവും, പുട്ടും ഒക്കെ ഇതിലുൾപ്പെടും, ഉത്തരേന്ത്യയിൽ ചപ്പാത്തിയും.

എന്നാൽ നിലവിൽ കഴിക്കുന്ന അന്നജം തന്നെ അധികമെന്നാണ് പുതിയ ഗവേഷണ ഫലങ്ങൾ സൂചിപ്പിക്കുന്നത്. പ്രശസ്ത ശാസ്ത്രജ്ഞൻ ഡോ. സലീം യൂസഫിന്റെ നേതൃത്യത്തിൽ 18 രാജ്യങ്ങളിലായി, 1,35,00ലധികം പേരെ ഉൾപ്പെടുത്തി, നടന്നു വരുന്ന പ്യുർ (PURE Prospective Urban Rural Epidemiology study) എന്ന ആഗോള പഠനം ആശങ്കപെടുത്തുന്ന വിവരങ്ങളാണ് പുറത്ത് വിട്ടിരിക്കുന്ന്. അധിക അന്നജം കഴിച്ചവരിൽ മരണ നിരക്ക് കൂടുതലായിരുന്നത്രെ. മറ്റ് പല പഠനങ്ങളും അന്നജത്തിന്റെ ദൂഷ്യ ഫലങ്ങൾ ചൂണ്ടി കാണിക്കുന്നുണ്ട്. അമിതവണ്ണം, ട്രൈഗ്ലിസറൈഡ്, LDL തുടങ്ങിയ ദുഷിച്ച കൊളസ്ട്രോൾ, കരളിൽ കൊഴുപ്പടിയുന്ന അവസ്ഥ എന്നിവയ്ക്കൊക്കെ അമിത അന്നജം കാരണമാകാം. എന്നാൽ പഴങ്ങളും, പച്ചക്കറികളും ഏറെ നല്ലതാണ് എന്ന് പ്യൂർ ഉൾപ്പെടെ എല്ലാ പഠനങ്ങളും വിലയിരുത്തുന്നു.

അപ്പോൾ ഉത്തരം ലളിതമാണ്‌, ചോറിനോട് ഏറെ കൂറ് വേണ്ട. വലിയ അളവിൽ ചോറും സമാനമായ അന്നജവും കഴിക്കുന്നതാണ് മലയാളികളിൽ ഇത്രയധികം ജീവിത ശൈലി രോഗങ്ങൾ ഉണ്ടാക്കുന്നത്. പൊണ്ണത്തടി, പ്രമേഹം, കൊളസ്ട്രോൾ, കരൾ കൊഴുപ്പ് തുടങ്ങി അമിതവണ്ണം വഴി ഉണ്ടാകുന്ന ചില കാൻസറുകൾ വരെ ഇതിൽ ഉൾപ്പെടുന്നു. മറ്റൊരു പ്രധാന വില്ലൻ മധുരമാണ്, ഇതും അന്നജം തന്നെ. രോഗാതുരത കുറയ്ക്കാൻ ഭക്ഷണത്തിൽ അന്നജ്ജം നാം കുറച്ചെ മതിയാകൂ. അരി, ഗോതമ്പ്, കിഴങ്ങ് തുടങ്ങിയ സ്റ്റാർച്ചിന് പകരം പഴങ്ങും പച്ചക്കറികളും ശീലമാക്കണം, ഒപ്പം കൂടുതൽ പ്രോട്ടീനും, നല്ല കൊഴുപ്പുമാകാം. രോഗങ്ങൾ ഉണ്ടാകാതിരിക്കുവാനും, ഉള്ളവ കുറയ്ക്കാനും ഇത് പ്രധാനമാണ്.

വ്യകതികൾക്കൊപ്പം, സമൂഹവും, സർക്കാരും ശ്രദ്ധിക്കേണ്ടതുണ്ട്. റേഷൻ കടകളിൽ അരി വേണോ, പച്ച കറിവേണോ എന്നു ചിന്തിക്കേണ്ട സമയമായി. ഇതുൾപെടെ ഭക്ഷ്യമേഘലയിൽ പല പരിഷ്കാരങ്ങളും ആധുനിക കാലഘട്ടത്തിൽ അനിവാര്യമാണ്.