തിരക്കിട്ടോടുന്ന മാധ്യമ പ്രവർത്തകർക്ക് അൽപ്പം ആശ്വാസം; കുടുംബാംഗങ്ങള്ക്കൊപ്പം ഗോള്ഫ് ക്ലബില് പ്രസ്ക്ലബ് കുടുംബമേള ആഘോഷമാക്കി മാധ്യമ പ്രവർത്തകർ
തിരുവനന്തപുരം: തിരുവനന്തപുരം പ്രസ്ക്ലബിന്റെ ഈ വര്ഷത്തെ കുടുംബമേള കവടിയാര് ഗോള്ഫ് ക്ലബില് മുഖ്യമന്ത്രി പിണറായി വിജയന് ഉദ്ഘാടനം ചെയ്തു. കുടുംബാംഗങ്ങള്ക്കൊപ്പം അധികസമയം ചെലവഴിക്കാന് സാധിക്കാത്തവരാണ് മാധ്യമപ്രവര്ത്തകരെന്ന് മുഖ്യമന്ത്രി പറഞ്ഞു. എന്നാല് പ്രസ്ക്ലബ് കുടുംബമേളയിലെ പത്രപ്രവര്ത്തകരുടെയും കുടുംബാംഗങ്ങളുടെയും പങ്കാളിത്തം ഏറെ സന്തോഷം നല്കുന്നുവെന്നും അദ്ദേഹം പറഞ്ഞു. ഭാര്യ കമല, ചെറുമകന് ഇഷാന് എന്നിവര്ക്കൊപ്പം കുടുംബമേളയില് പങ്കെടുക്കാനെത്തിയ മുഖ്യമന്ത്രി ഏവര്ക്കും ആശംസകളര്പ്പിച്ചാണ് മടങ്ങിയത്. വിവിധ മാധ്യമ അവാര്ഡുകള് നേടിയ മുതിര്ന്ന പത്രപ്രവര്ത്തകരെ മുഖ്യമന്ത്രി ആദരിച്ചു.
എംപിമാരായ ഡോ.ശശി തരൂര്, സുരേഷ് ഗോപി, ഒ.രാജഗോപാല് എംഎല്എ, മേയര് വി.കെ.പ്രശാന്ത്, സംസ്ഥാന വിവാരാവകാശ കമ്മീഷ്ണര് കെ.വി.സുധാകരന്, മീഡിയ അക്കാദമി ചെയര്മാന് ആര്.എസ്.ബാബു, ഡിജിപി ലോക്നാഥ് ബഹ്റ, സിറ്റി പോലീസ് കമ്മീഷ്ണര് എസ്. സുരേന്ദ്രന്, ഗായിക രാജലക്ഷ്മി തുടങ്ങിയവര് പങ്കെടുത്തു. പ്രസിഡന്റ് ജി.പ്രമോദ് അധ്യക്ഷനായിരുന്ന ഉദ്ഘാടന സമ്മേളനത്തിനു പ്രസ്ക്ലബ് സെക്രട്ടറി എം.രാധാകൃഷ്ണന് സ്വാഗതവും ട്രഷറര് ആര്.ശ്രീകേഷ് നന്ദിയും പറഞ്ഞു. മാധ്യമ അവാര്ഡ് ജേതാക്കളെ ആദരിക്കല്, എസ്എസ്എല്സി, പ്ലസ്ടു പരീക്ഷകളില് ഫുള് എ പ്ലസ് കരസ്ഥമാക്കിയ വിദ്യാര്ഥികളെ അനുമോദിക്കല്, സ്പോര്ട്സ് ഡേ മത്സര വിജയികള്ക്കുള്ള സമ്മാനവിതരണം തുടങ്ങിയ പരിപാടികളും സംഘടിപ്പിച്ചിരുന്നു. തുടര്ന്ന് കുടുംബാംഗങ്ങളുടെ കലാപരിപാടികളും ഗാനമേളയും കോമഡി ഉത്സവ് ടീം അണിനിരന്ന സ്റ്റേജ് ഷോയും അരങ്ങേറി. മൂവായിരത്തോളം പേര് പങ്കെടുത്ത പരിപാടിയില് നറുക്കെടുപ്പിലൂടെ ഐ പാഡ്, ടിവി, ഫ്രഡ്ജ്, വാഷിംഗ് മെഷീന്, സ്വര്ണനാണയങ്ങള്, മൊബൈല് ഫോണുകള് തുടങ്ങിയ സമ്മാനങ്ങളും വിതരണം ചെയ്തു.
https://www.facebook.com/Malayalivartha
