ലോക്‌സഭാ തെരഞ്ഞെടുപ്പില്‍ കേരളാ കോണ്‍ഗ്രസ് മാണിയും മുസ്്‌ലിംലീഗും കൂടുതല്‍ സീറ്റുകള്‍ ആവശ്യപ്പെട്ടതോടെ കോണ്‍ഗ്രസ് വെട്ടിലായി. കേരളത്തിലെ കാര്യങ്ങള്‍ ഇവിടെ തീരുമാനിക്കാന്‍ കോണ്‍ഗ്രസ് അധ്യക്ഷന്‍ രാഹുല്‍ഗാന്ധി യു.ഡി.എഫ് നേതൃത്വത്തിന് നിര്‍ദ്ദേശം നല്‍കിയതിന് പിന്നാലെയാണ് രണ്ട് ഘടകക്ഷികളും കോണ്‍ഗ്രസിനെ പ്രതിസന്ധിയിലാക്കിയത്. നിലവില്‍ ലീഗിന് രണ്ട് സീറ്റും കേരളാ കോണ്‍ഗ്രസിന് ഒരു സീറ്റുമാണുള്ളത്. കേരളാ കോണ്‍ഗ്രസിന് രാജ്യസഭാ എം.പിയുമുണ്ട്. അതിന് പുറമേ ഒരു സീറ്റുകൂടി വേണമെന്നാണ് അവരുടെയും ലീഗിന്റെയും ആവശ്യം. രണ്ട് സീറ്റ് വേണമെന്ന ആവശ്യം മാണിയേക്കാള്‍ ജോസഫ് വിഭാഗമാണ് മുന്നോട്ടുവയ്ക്കുന്നത്. മാണിയുടെ ചില സ്വകാര്യതാല്‍പര്യങ്ങള്‍ പൊളിച്ചടുക്കാന്‍ കോണ്‍ഗ്രസ് പി.ജെ. ജോസഫിനെ മുന്നില്‍ നിര്‍ത്തി കളിക്കുകയാണെന്നും പറയുന്നു.

ദേശീയതലത്തില്‍ കോണ്‍ഗ്രസിന് അനുകൂലമായ സാഹചര്യമാണുള്ളത്. അതിനാല്‍ എല്ലാ സംസ്ഥാനങ്ങളില്‍ നിന്നും കൂടുതല്‍ എം.പിമാര്‍ വേണമെന്ന് രാഹുല്‍ഗാന്ധി നിര്‍ദ്ദേശിച്ചിട്ടുണ്ട്. ഈയൊരു സാഹചര്യത്തില്‍ പാര്‍ട്ടിയുടെ സീറ്റുകള്‍ വിട്ടുകൊടുക്കാന്‍ കോണ്‍ഗ്രസ് തയ്യാറായേക്കില്ല. അങ്ങനെയെങ്കില്‍ സീറ്റ് തര്‍ക്കം മുറുകുകയും യു.ഡി.എഫില്‍ തമ്മിലടിക്കുള്ള കളമൊരുങ്ങുകയും ചെയ്‌തേക്കാം. അത് തെരഞ്ഞെടുപ്പിനെ ബാധിക്കാനിടയുണ്ട്. അതുകൊണ്ട് പ്രശ്‌നം ഗുരുതരമാകാതെ എങ്ങനെ പരിഹരിക്കുമെന്ന് കാത്തിരുന്ന് കാണാം. സ്വന്തം ഇഷ്ടപ്രകാരം യു.ഡി.എഫില്‍ നിന്ന് ഇറങ്ങിപ്പോയി, എല്‍.ഡി.എഫിനൊപ്പം സഹകരിക്കാന്‍ എ.കെ.ജി സെന്ററിന്റെ പടിവാതില്‍ക്കല്‍ വരെ എത്തുകയും ചെയ്ത കെ.എം മാണിയെ മുന്നണിയില്‍ എടുത്തതിനോട് വി.എം സുധീരന്‍ അടക്കമുള്ള നേതാക്കള്‍ക്ക് കടുത്ത അതൃപ്തിയാണുളളത്. സാധാരണ പ്രവര്‍ത്തകരുടെ വികാരവും അതാണ്.

രാജ്യസഭാ സീറ്റും കോട്ടയം സീറ്റും തങ്ങള്‍ക്ക് ലഭിക്കാത്തത് കൊണ്ടാണ് ജോസഫ് വിഭാഗം മാണിയുമായി ഇടഞ്ഞ് നില്‍ക്കുന്നത്. ജോസ് കെ. മാണിക്ക് മുകളില്‍ ഒരു നേതാവിനേയും വളരാന്‍ കെ.എം മാണി അനുവദിക്കുന്നില്ലെന്നാണ് അവരുടെ മറ്റൊരു ആക്ഷേപം. കോട്ടയം സീറ്റില്‍ മരുമകള്‍ നിഷയെ മത്സരിപ്പിക്കാന്‍ മാണി തീരുമാനിച്ചതോടെയാണ് അവിടെ ഉമ്മന്‍ചാണ്ടി മത്സരിക്കണമെന്ന് കോണ്‍ഗ്രസുകാര്‍ ആവശ്യപ്പെട്ടത്. അതോടെ അപകടം മണത്ത മാണി മരുമകളെ കൊണ്ട് വാര്‍ത്താസമ്മേളനം നടത്തിക്കുകയായിരുന്നു. ഇപ്പോള്‍ ജോസഫ് എം. പുതുശേരിയോ, ജോയി എബ്രഹാമോ ആയിരിക്കും കോട്ടയത്ത് നിന്ന് മത്സരിക്കുന്നതെന്ന് അറിയുന്നു.

ലീഗ് മൂന്ന് സീറ്റ് ആവശ്യപ്പെടണമെന്ന് സമസ്തയാണ് ആദ്യം ആവശ്യപ്പെട്ടത്. ലീഗുമായി ഏറെ അടുപ്പമുള്ള സമുദായ സംഘടനയാണ് സമസ്ത. അതിനോട് ലീഗ് നേതൃത്വം തണുത്ത പ്രതികരണമാണ് നടത്തിയത്. എന്നാല്‍ ഇന്നലെ രാഹുല്‍ഗാന്ധിയെ കണ്ടപ്പോള്‍ ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടിയും സംസ്ഥാന ജനറല്‍ സെക്രട്ടറി കെ.പി.എ മജീദും മൂന്നാം സീറ്റ് ആവശ്യപ്പെട്ടു. അതിനാല്‍ സമസ്തയെ മുന്നില്‍ നിര്‍ത്തി ലീഗ് കളിച്ച കളിയാണെന്നും കോണ്‍ഗ്രസില്‍ ആക്ഷേപമുണ്ട്. നിര്‍ണായകമായ ഒരു തെരഞ്ഞെടുപ്പ് വന്നതോടെ രണ്ട് പാര്‍ട്ടികളും കോണ്‍ഗ്രസിനെ ചക്രവ്യൂഹത്തിലേക്ക് തള്ളിവിടാനാണ് നോക്കുന്നതെന്നും പല നേതാക്കളും ആരോപിക്കുന്നു. നിലവിലുള്ള ഒരു സീറ്റും വിട്ടുകൊടുക്കേണ്ടെന്ന നിലപാടാണ് കോണ്‍ഗ്രസിലെ ഭൂരിപക്ഷം നേതാക്കളും സ്വീകരിച്ചിരിക്കുന്നത്. അതിനാല്‍ മാണിയേയും കോണിയേയും എങ്ങനെ അനുനയിപ്പിക്കുമെന്ന് കാത്തിരുന്ന് കാണാം.