തിരുവനന്തപുരം കണ്ണാശുപത്രി; പുതിയ കെട്ടിടം എത്രയും വേഗം പ്രവര്ത്തനസജ്ജമാക്കാന് മന്ത്രി കെ.കെ. ശൈലജ ടീച്ചറുടെ നേതൃത്വത്തില് അടിയന്തര യോഗം
തിരുവനന്തപുരം: റീജിയണല് ഇന്സ്റ്റിറ്റിയൂട്ട് ഓഫ് ഒഫ്ത്താല്മോളജിയിലെ (ആര്.ഐ.ഒ.) പുതിയ കെട്ടിടം എത്രയും വേഗം പ്രവര്ത്തനസജ്ജമാക്കാന് ആരോഗ്യ സാമൂഹ്യനീതി വനിത ശിശു വികസന വകുപ്പ് മന്ത്രി കെ.കെ. ശൈലജ ടീച്ചറുടെ നേതൃത്വത്തില് നിയമസഭ മന്ദിരത്തില് അടിയന്തരയോഗം ചേര്ന്നു. അന്തിമഘട്ടത്തിലായ ജോലികളില് ശേഷിക്കുന്ന ഇ-ഹെല്ത്ത് ഉള്പ്പെടെയുള്ളവ ത്വരിതഗതിയില് പൂര്ത്തിയാക്കാന് മന്ത്രി നിര്ദേശം നല്കി. ആരോഗ്യ വകുപ്പ് അഡീഷണല് ചീഫ് സെക്രട്ടറി രാജീവ് സദാനന്ദന് ഐ.എ.എസ്., ആരോഗ്യ വിദ്യാഭ്യാസ വകുപ്പ് ഡയറക്ടര് ഡോ. എ. റംലാ ബീവി, മെഡിക്കല് കോളേജ് പ്രിന്സിപ്പല് ഡോ. തോമസ് മാത്യു, ആര്.ഐ.ഒ. ഡയറക്ടര് ഡോ. സഹസ്രനാമം, പി.ഡബ്ലിയു.ഡി., വാട്ടര് അതോറിറ്റി, കെ.എസ്.ഇ.ബി., ഇ-ഹെല്ത്ത്, കെ.എം.എസ്.സി.എല്. തുടങ്ങിയ വിവിധ വിഭാഗങ്ങളിലെ ഉദ്യോഗസ്ഥര് എന്നിവര് യോഗത്തില് പങ്കെടുത്തു.
പുതിയ കെട്ടിടം പ്രവര്ത്തനക്ഷമമാക്കുന്നതിന്റെ ഭാഗമായി 54 അധിക തസ്തികകള് സൃഷ്ടിക്കാന് മന്ത്രിസഭായോഗം അടുത്തിടെ അനുമതി നല്കിയിരുന്നു. ഇതുകൂടാതെ 30 ഹോസ്പിറ്റല് അറ്റന്റര്മാരെയും 8 സെക്യൂരിറ്റിക്കാരെയും നിയമിക്കാനും അനുമതി നല്കിയിരുന്നു. ആര്.ഐ.ഒ.യെ നവീകരിച്ച് അത്യാധുനിക നേത്ര ചികിത്സ ലഭ്യമാക്കുന്നതിനായി അടുത്തിടെ 3.72 കോടി രൂപ അനുവദിച്ചിരുന്നു.
സ്ഥല പരിമിതിയാല് ബുദ്ധിമുട്ടുന്ന കണ്ണാശുപത്രിയ്ക്ക് ഏറെ ആശ്വാസമാകും പുതിയ കെട്ടിടം. ഏഴുനിലകളുള്ള ഈ ബഹുനിലമന്ദിരം പ്രവര്ത്തന സജ്ജമാകുന്നതോടെ റഫറല് ഒ.പി.യും പ്രധാനപ്പെട്ട സ്പെഷ്യാലിറ്റി ക്ലിനിക്കുകളും മാറ്റി സ്ഥാപിക്കും. ഒരു ആധുനിക തീയറ്റര് കോംപ്ലക്സ്, ലാബ് സമുച്ചയം, ഡേകെയര് വാര്ഡ് എന്നിവയും ഇവിടെ സജ്ജീകരിക്കുന്നുണ്ട്. ഇത് പൂര്ണമായും പ്രവര്ത്തന സജ്ജമാകുന്നതോടെ തെക്കേ ഇന്ത്യയിലെ തന്നെ ഏറ്റവും വലിയ കണ്ണാശുപത്രികളില് ഒന്നായി തിരുവനന്തപുരം ആര്.ഐ.ഒ. മാറും.
https://www.facebook.com/Malayalivartha
